2 jaꞌ ebꞌ chi alon jaxca tiꞌ: Jin Colomal jaach toni, ¡jaꞌ ja win chin col jin bꞌa yutol jin Diosal jaach, jaach ey jaach oc yipoj jin cꞌul!

3 Asanne Jehová chi skeꞌ yu cu scolon el yul skꞌabꞌ jun txꞌan yaal eey yin ewantajil, cꞌal tet syaꞌilal tol chi oc camich yu.

4 Oj jaach scꞌubꞌa a yetoj yipalil, jaxca junoj noꞌ xutx caẍlan chi smoa yuneꞌ yalan xicꞌ, yet watxꞌ cꞌam tzet oj jaach ioni. Jaꞌ oj jaach colon eloj, jaxca chi yun scolcha junoj mactxequel yu chꞌen majbꞌal sat julbꞌal, yutol chi cꞌal yun tzet chi yalaꞌ.

5 Man oj jaach xiw tet tzetyetal ey smey chi ecꞌ yet akꞌbꞌalil, tam wal tet julbꞌal chi aletej ja win yet cꞌualil.

6 Man oj jaach xiw tet junoj yaꞌbꞌil chi ecꞌ xol kꞌejkꞌinal, tam wal tet junoj chi akꞌon cam ánima yet cꞌualil.

7 Caxcꞌal ey mil ánima oj cam bꞌey ja qꞌuexan kꞌabꞌ, jaxa laonebꞌoj mil oj cam bꞌey ja watxꞌ kꞌabꞌ. Jal jaach xin, cꞌam tzet oj jaach ionoj.

8 Asan tucꞌal oj ja maj ja wilaꞌ tzet oj yun ẍaꞌon spaj ebꞌ penawom.

9 Yutol jaꞌ Jehová, Naj Tol Jaxa Cꞌal Ocoj, jaꞌ eyoc ja teynemaloj.

10 Yu jun tuꞌ xin, cꞌam junoj tzetyetal comon cꞌal oj tit ja wibꞌan, man oj apnoj oc yaꞌ jolom bꞌey ja na.

11 Jaꞌ Jehová oj ẍejtej ebꞌ yángel, yet watxꞌ chach teynele yu ebꞌ, yal cꞌal bꞌeytuꞌ chach eqꞌui.

12 Oj jaach quetzle bꞌey yu Naj, yet watxꞌ cꞌam bꞌey oj ja chakꞌoc ja wajan yin chꞌen.

13 Oj skeꞌ ja bꞌeyecꞌ xol noꞌ bꞌalam, cꞌal xol noꞌ mimej noꞌ ey smey, oj skeꞌ ja tecꞌon ey noꞌ labꞌa caxcꞌal caw jow noꞌ.

14 Jaꞌ Jehová chi alon jaxca tiꞌ: Jain oj jin colel mactxequel chin camcꞌulneni. Oj jin oc yeneloj ebꞌ, yutol chin yaloc ebꞌ sDiosaloj.

15 Jaꞌ yet oj jin yawten ebꞌ, oj jin takꞌwoj tet ebꞌ. Ey jin cꞌal ecꞌ yetoj ebꞌ, oj jin colwa yin ebꞌ yet eyoc ebꞌ xol syaꞌilal, catuꞌ oj wiꞌon a can ebꞌ.

16 Miman skꞌinal ebꞌ oj wakꞌa. Oj jin txꞌox jin colwal tet ebꞌ, ẍi Dios.