2 Yet tax cꞌal cꞌamto cha waꞌne txꞌotxꞌ mimej wonan, cꞌal yul yibꞌankꞌinal tiꞌ, masantaꞌcꞌal yet slawubꞌal, Dios jaach cꞌaltaꞌa.

3 Jaach chon ja wakꞌ meltzo oc yin pojojal junelxa, yet cha walon jaxca tiꞌ: Jex ánima, meltzaanwej can oc yin pojojal junelxa, ja chi.

4 Yel toni, tol jaꞌ junoj mil abꞌil, laan jaxca yet ewi yul ja sat, ma jaxca jayebꞌoj hora yet akꞌbꞌalil.

5 Jaxca wal chi yun yijletoj junoj tzetyetal yu jaꞌ elom jaꞌ, queytuꞌ chon ja wute jaon ánima jon tiꞌ, ma jaxca yecꞌ el junoj weyiche, queytuꞌ keoc jon.

6 Jaon ánima jon tiꞌ, laan jon jaxca an cꞌultaj chi chꞌibꞌaoj. Chi tit xumac an yet skꞌinibꞌal, jaxa yet chi jowbꞌi yajan cꞌu, chi tajeloj, catuꞌ chi camel an.

7 Yel toni, jaꞌ sjowal ja cꞌul chon akꞌon qꞌueyle eloj. ¡Tuxa cꞌal chi qꞌueycan a cu cꞌul kiloni!

8 Jaꞌ cu penail cꞌal cu mul jon, txequel yeoc ja sattaj.

9 Yel toni, jaꞌ yu sjowal ja cꞌul yuxan chi lawi ey cu kꞌinal jon. Eyman chi ecꞌ can el cu kꞌinal kibꞌan, jaxca yet chi kiꞌon juneloj cu kaꞌeꞌ.

10 Ey jon asanne 70 abꞌil cu kꞌinal catuꞌ chi cu cam jon. Jaxa ebꞌ naatil chi ecꞌ niꞌojxa, chi aapnoj ebꞌ yin 80 abꞌil. Asan xin yin xacꞌal syaꞌtajil cꞌal etnecꞌulal chi yun yecꞌ yu ebꞌ. Yin eymanil chi ecꞌ can el cu kꞌinal, catuꞌ chi cu qꞌueya jon.

11 ¿Tumi ey junoj mactxequel otajnen jantaj yipal sjowal ja cꞌul? ¿Tumi ey junoj mactxequel otajnen yet chi tit ja kꞌakꞌalcꞌulal?

12 Akꞌ kotajne eloj tol txenne cu kꞌinal, yet watxꞌ chi cu bꞌeybꞌalne jelanilal.

13 ¡Jaach jin Diosal, ocan cꞌal ketoj! ¿Jantaj to tiempo chi kechbꞌane yet chon ja coloni? Okꞌ ojabꞌ ja cꞌul kin jaon ja chejabꞌ jon tiꞌ.

14 Junjun cꞌal skꞌinibꞌalil cha wakꞌ tzalabꞌoj cu cꞌul yetoj ja camcꞌulal, yin tzalacꞌulal chach cu bꞌitne yajbꞌan iquis jon ecꞌoj.

15 Chi koche ecꞌal abꞌil cha wakꞌ cu tzalacꞌulal, jaxca ojabꞌ sbꞌisil abꞌil jix ja waoc cu yaꞌilal jon.

16 El ojabꞌ yin ja cꞌul, tol jaon ja chejabꞌ jon tiꞌ, cꞌal ebꞌ kicꞌaal yet bꞌakꞌin, chi yil masanil jantaj tzet qꞌueyubꞌtaj yili tzet jix ja waꞌne, cꞌal ja wipalil.

17 Jaach jin Diosal, jaꞌ ojabꞌ ja watxꞌcꞌulal eyoc ketoj jon, yutol cu Diosal jaach. Man ojabꞌ naꞌbꞌa oj cu mulnail jon. Txequel ojabꞌ cꞌal yeoc cu mulnail tiꞌ yin junelne.