2 Oj walel skꞌaneal ja camcꞌulal, yutol cꞌam chi qꞌuexlabꞌi tzet cha walaꞌ, laan jaxca wan tzetyetal ey bꞌey satcan.

3 Ey jun ja wa kꞌane jix ja waꞌne can yetoj David; jaꞌton jun ja chejabꞌ sicꞌbꞌil el ja wu, yet jix ja walon can tet jaxca tiꞌ:

4 Jaꞌ ebꞌ ja wicꞌaal yet bꞌakꞌin oj waoc ebꞌ yin reyalil ja qꞌuexeloj, ja chi.

5 Jaach Jehová, masanil ebꞌ chach akꞌon servil bꞌey satcan, chi sbꞌitne ja watxꞌilal ebꞌ cꞌal jantaj tzet qꞌueyubꞌtaj yili jix ja waꞌne, yutol chi yun cꞌal tzet cha walaꞌ.

6 Cꞌam junojxa dios, tam wal junoj ey bꞌey satcan laan yipalil ja wetoj.

7 Asanne jaach miman ja weloc apnoj xol ebꞌ ángel. Ecꞌbꞌan ja wipal yintaj ebꞌ joyan oc ja winlaj bꞌey satcan tuꞌ.

8 Jaach jin Diosal, yaaw jaach yibꞌan masanil, ¿mac junojxa laan ja wetoj? Yutol chi skeꞌ cꞌal ja wu, chi yun masanil tzet cha walaꞌ.

9 Jaach cha mitxꞌoc tucan jaꞌ mar yet chi a pomna sat jaꞌ, chi oc numna jaꞌ yet chi bꞌilwi jaꞌ.

10 Jaꞌ noꞌ noꞌ ey smey yul jaꞌ mar, jix ja tecꞌey noꞌ jaxca junoj camnaj noꞌ. Yetoj ja wipalil jix ja wujte sajlemtoj ebꞌ chi jowi oc ja win.

11 Jaꞌ satcan cꞌal txꞌotxꞌ txꞌotxꞌ ja wet toni; jaach jix ja waꞌne yul yibꞌankꞌinal, cꞌal masanil tzetyetal ey bꞌey.

12 Jaꞌ bꞌey norte, masantaꞌcꞌal bꞌey sur, jaach jix ja waꞌne a masanil. Jaꞌ txꞌotxꞌ wonan Tabor, cꞌal txꞌotxꞌ yet Hermón, chi bꞌitni ey jaach.

13 Caw ey ja wipal sicꞌlebꞌil, jaꞌ ja watxꞌ kꞌabꞌ caw ey yip, chi skeꞌ cꞌal yu masanil.

14 Jaꞌ bꞌey ja despacho caw tzꞌajan yeoc yetoj sjichanil ja wopiso. Chi txeclo el masanil ja camcꞌulal, catuꞌ chi yun cꞌal tzet cha walaꞌ.

15 Jaach jin Diosal, caw tzalacꞌulal yet ebꞌ ánima chach bꞌitnen bꞌey junjun conobꞌ; yutol ey jaach ecꞌ yetoj ebꞌ, yutol chi sjije ja chejbꞌanil ebꞌ.

16 Jaꞌ ja win chi yakꞌ tzalabꞌoj scꞌul ebꞌ, jaxa ja watxꞌilal oj iꞌon cꞌal a can ebꞌ.

17 Caw yel, miman ja wipal cha wakꞌ ey jon, catuꞌ yu ja watxꞌcꞌulal yuxan chi cꞌal skeꞌ ku jon.

18 Jaach Jehová jin Diosal, jix ja wakꞌ jun cu Colomal jon. Jix ja wakꞌon jun cu Reyal jon.

19 Jaꞌ yet peyxa tuꞌ, jix jaach kꞌanabꞌ yin weyicheal, yet jix ja walon tet ebꞌ ja chejabꞌ tol jijem chi yute sbꞌa ebꞌ ey jaach, jix ja walon can jaxca tiꞌ: Ey jun jelan yakꞌon jowal jix jin sicꞌ eltej xol ebꞌ jin conobꞌ, tol caw bꞌinabꞌil yin yopiso, jain chin colwa yetoj.

20 Jix ilcha jun jin chejabꞌ wu, jaꞌton David. Jaꞌ yetoj waceite olivo yet sicꞌwal, jaꞌ chi txꞌoxon eloj tol rey xa yeoc naj tinaniꞌ.

21 Man oj oc tucan jin colwa yetoj, yutol jaꞌ wipalil oj oc yetoj.

22 Jaꞌ ebꞌ chi jowi oc yin, ma skeꞌ yoc mitxꞌan ebꞌ yin. Jaꞌ ebꞌ chi unen spenail, man oj tzaji ebꞌ tet.

23 Sattaj wal jun jin chejabꞌ tuꞌ, oj jin tecꞌey ebꞌ chi jowi oc yin, oj wakꞌ cam ebꞌ chi chichon oc scꞌul yin.

24 Oj jin eecꞌal ecꞌ yetoj, yutol ey jin camcꞌulal yin. Oj wakꞌ eloc tzet chi walaꞌ. Wu, yuxan oj skeꞌ cꞌal yu masanil.

25 Oj wakꞌ mimanbꞌoj bꞌey oj yakꞌ yaawil. Oj ẍaꞌel yich bꞌey jaꞌ mar Mediterráneo masantaꞌcꞌal bꞌey jaꞌ miman Éufrates.

26 Oj yalon naj ey jin jaxca tiꞌ: Jin Mam jaach an, catuꞌ jin Diosal jaach; jin Colomal jaach cꞌaltaꞌa, yutol jaach cha wakꞌ wip, ẍi, oj yaloni.

27 Jain xa oj wakꞌ yopiso jaxca smajul junoj bꞌabꞌel uninale. Yel xacꞌal miman oj yun yeloc naj yintaj masanil ebꞌ rey bꞌey yul yibꞌankꞌinal tiꞌ.

28 Ey cꞌal ecꞌ jin camcꞌulal yin naj masanil tiempo. Man oj jin qꞌuextoj bꞌey jix wakꞌcan jin tiꞌ tet naj.

29 Jaꞌ ebꞌ yicꞌaal naj oj waoc yin reyal sqꞌuexeloj yet bꞌakꞌin, yajbꞌan eyto ecꞌ satcan tiꞌ.

30 Ta tol jaꞌ ebꞌ yicꞌaal naj oj sbꞌejcan jin cuybꞌanil, catuꞌ ta manxa oj sbꞌeybꞌalne ebꞌ tzet chi walaꞌ,

31 ta cꞌam chi sbꞌeybꞌalne jin chejbꞌanil ebꞌ, catuꞌ cꞌamxa chi sjije jin kꞌane chi wakꞌ cuyle oj,

32 ta jaxca tuꞌ, oj waoc syaꞌilal ebꞌ yetoj kꞌaaxteꞌ, yu yecꞌnajilal ebꞌ cꞌal yu spenail ebꞌ.

33 Man yu oj tuꞌ, catuꞌ oj jin bꞌejcan naj jin chejabꞌ David, man oj jin bꞌej jin camcꞌulneni, oj wakꞌ eloc bꞌey jix wakꞌcan jin tiꞌ tet naj.

34 Man oj wakꞌ ecꞌ el jin wa kꞌane yetoj. Oj wakꞌ cꞌal eloc bꞌey jix wakꞌcan jin tiꞌ tet naj.

35 Yin junelne oj wun tzet jix wal can tet naj rey David, cꞌam bꞌey oj wakꞌ lekꞌtiꞌal yin tzet chi walaꞌ.

36 Jaꞌ ebꞌ yicꞌaal naj oj waoc yin reyal sqꞌuexeloj yet bꞌakꞌin, txequel cꞌal yeecꞌ yopiso naj jin sattaj jaxca yajan cꞌu.

37 Yelcꞌulal tol oj yakꞌ yaawil ebꞌ yin sjichanil, jaxca yeoc xꞌaaw bꞌey satcan.

38 Jaꞌ tinaniꞌ jaach jin Diosal, jix ja bꞌejcan naj rey jix ja sicꞌ eloj, catuꞌ jix ja wintajne can eloj. Jix tit sjowal ja cꞌul yin naj.

39 Ma eloc ja wa kꞌane jix ja wakꞌcan tet jun ja chejabꞌ tiꞌ. Jix ja kꞌojcan ey scorona naj sat txꞌotxꞌ.

40 Caw ecꞌal bꞌey jix jolchatoj smuroal sconobꞌ naj. Jaxa cꞌal yecꞌlobꞌen sconobꞌ naj txequel.

41 Jaxa masanil ebꞌ ánima chi ecꞌ tituꞌ, chi yelkꞌanetoj tzetyetal chi yoche ebꞌ. Jaxa ebꞌ caan scawilal chi bꞌuchwa ebꞌ yin.

42 Jaach jix el yin ja cꞌul yuxan caw chi tzala ebꞌ scajat naj, chi yiꞌon a skꞌabꞌ ebꞌ yutol jix eyqꞌuey naj yalon ebꞌ.

43 Jix iꞌle el yee chꞌen yespada naj, ma jaach colwa yetoj naj yet jix yakꞌon jowal.

44 Jix ja wiꞌecꞌ sjelanil cꞌal smimanbꞌilal. Jix ja kꞌojey naj sat txꞌotxꞌ yetoj yopiso.

45 Jix ja cꞌotxbꞌane skꞌinal, catuꞌ jix el sqꞌuixwil naj.

46 Jaach Jehová jin Diosal, ¿jantaj to tiempo oj ja webꞌa el ja bꞌa ey jin? ¿Tumi jacꞌalaꞌ cꞌal stit ja jowal win jaxca ẍaw xaj kꞌakꞌ?

47 Jaach jin Diosal, naꞌtej tol caw txenne jin kꞌinal jix ja wakꞌa. Yutol man mimanoj tiempo chi cu ecꞌ jaon ánima jon tiꞌ, yutol queytuꞌ jix el yin ja cꞌul.

48 Cꞌam junoj ánima tol iquis cꞌal ecꞌ yin junelne, yin tol cꞌam chi cami. Cꞌam mactxequel chi skeꞌ scolon sbꞌa tet camich.

49 Jaach jin Diosal, ¿bꞌeytuꞌ eyoc ja camcꞌulal jix ja txꞌox yet yalantoj, yutol jix ja wakꞌcan ja tiꞌ tet David, tol oj ja wakꞌ eloc tzet cha walaꞌ?

50 Tol ojabꞌ cha naꞌtej jaon ja chejabꞌ jon tiꞌ, yutol caw chi txꞌemwa ebꞌ conobꞌ kin, caw eyoc yin scꞌul ebꞌ cu yetneni.

51 Jaach jin Diosal, jaꞌ ebꞌ chi jowi oc ja win. Jaꞌton ebꞌ chi txꞌemwa oc yin junjun txolan yin naj ja chejabꞌ tol sicꞌbꞌil el ja wu.

52 ¡Al-le ojabꞌ watxꞌ kꞌane tet Jehová! Yun ojabꞌi.