2 Chaꞌ ja wabꞌ jin txa, catuꞌ cha pajtzen tzet chin kꞌan ey jaach.

3 Yutol caw miman tzet chi jul wibꞌan, jaxca tol ey jin xa oc yul skꞌabꞌ camich chi wabꞌe.

4 Chi xa skeꞌ chin oc sbꞌisiloj ebꞌ camom, cꞌamxa wip chi wabꞌe.

5 Tuxa jix jin ja bꞌejcan xol ebꞌ camom chi wabꞌe. Jaxca wal ebꞌ jix cam yin jowal, tol mujbꞌilxa ebꞌ tinaniꞌ quey jin tuꞌ chi wabꞌe. Jaxca ebꞌ xax toocan qꞌueycꞌulal ja wu, tol cꞌamxa chach colwal yetoj ebꞌ, queytuꞌ weoc chi wabꞌe.

6 Naat yich jun jolan bꞌey jix jin ja wa can eytoj xol kꞌejkꞌinal jaxca bꞌey ey ebꞌ camom.

7 Jix syambꞌa oc sbꞌa sjowal ja cꞌul wibꞌan, caw miman tzetyetal jix tit wibꞌan.

8 Cꞌamxa chin yoche ebꞌ jin watxꞌil ánima, jix jin sbꞌejcan ebꞌ. Laan jin jaxca junoj mac eyoc yul preso cꞌam chi skeꞌ yeli.

9 Caw chin okꞌ sicꞌlebꞌil, cꞌamxa chi skeꞌ wilwani. Jaach Jehová jin Diosal, junjun cꞌal cꞌu chi wal jin bꞌa ey jaach, catuꞌ chin mobꞌan a jin kꞌabꞌ ey jaach.

10 ¿Tumi oj to ja txꞌox ja wipalil tet ebꞌ camom? Tumi oj to yal yu diosalil ebꞌ camom tuꞌ ey jaach.

11 Jaꞌ bꞌey mujan ebꞌ camom tuꞌ, tumi eyto mac oj bꞌinane ja camcꞌulal cꞌal ja watxꞌcꞌulal, cꞌal jantaj tzet cha walaꞌ.

12 Tumi eyto ebꞌ oj bꞌinanen ja watxꞌilal, cꞌal masanil tzetyetal qꞌueyubꞌtaj yili tzet jix ja waꞌne, yutol kꞌej jolinaj xacꞌal yili bꞌey cambꞌal tuꞌ, jaꞌ tituꞌ chi toocan qꞌueycꞌulal masanil tzetyetal.

13 Jal jin jain tiꞌ, jaach jin Diosal, jaꞌ ey jaach chi wal jin bꞌa. Jaꞌ yet skꞌinibꞌalil chin txali ey jaach.

14 ¿Jaach jin Diosal, tzet yuxan chin ja wintajne eloj? ¿Tzet yuxan cha webꞌa el ja bꞌa ey jin?

15 Yutol yin tax wachꞌeal ey jin cꞌaltoj xol syaꞌilal, ian chin cami. Jix jin ja wijbꞌa ecꞌ xol mimej syaꞌilal, jaxa tinaniꞌ cꞌamxa chi techa wu.

16 Jaꞌ sjowal ja cꞌul jix ecꞌ can el wibꞌan, tuxa jix jin eyqꞌuey yu,

17 masanil wan tuꞌ jix oc joyan ebꞌ win jaxca jaꞌ elom jaꞌ.

18 Jix ja wiꞌel ebꞌ jin watxꞌil ánima jin cꞌatan, cꞌal ebꞌ wet animail caan jin cawilal. Jaxa tinaniꞌ asan kꞌejkꞌinal junne we yetoj.