2 Manxa jantajoj swatxꞌil kalon el jantaj ja camcꞌulal yin junjun skꞌinibꞌal cꞌal kalon pax el ja watxꞌcꞌulal junjun akꞌbꞌal,

3 manxa jantajoj swatxꞌil jaach cu bꞌitnen yetoj masanil tujan mitxꞌkꞌabꞌe ey xꞌanil, cꞌal yetoj arpa tol watxꞌ yoc yul snukꞌ.

4 Jaach Jehová, jaach jix jin ja waoc yin tzalacꞌulal yu tzet jix ja waꞌne, chin bꞌitni yin tzalacꞌulal yu tzet cha wunne.

5 ¡Jaach jin Diosal, caw qꞌueyubꞌtaj yili tzetyetal jix ja waꞌne! ¡Cꞌam mactxequel chi tzajlo snaꞌbꞌal ja wintaj!

6 Jaꞌ ebꞌ cꞌam snaꞌbꞌal, cꞌam chi naꞌcha el jun tiꞌ yu ebꞌ.

7 Caxcꞌal mi chi oc ebꞌ etnem ánima yin bꞌeomal, jaxca chi yun ẍꞌibꞌa an cꞌultaj, txenne tiempo chi yakꞌ snaꞌbꞌal ebꞌ, chi lawi tuꞌ, chi qꞌueyle el ebꞌ yin junelne.

8 Jal jaach jin Diosal, miman ja weloc apnoj.

9 Caw yel ton jaach jin Diosal, oj ja wakꞌ qꞌueyle el ebꞌ chi jowi oc ja win. Masanil ebꞌ chi unen spenail oj ja wujte sajlemtoj ebꞌ.

10 Jal jin jain tiꞌ, lalan ja wakꞌon wip, jaxca yip junoj noꞌ xol-laj teꞌal icham wacax, catuꞌ cha wakꞌon cꞌal jin tzalacꞌulal.

11 Sowalil oj wil yeyqꞌuey ebꞌ chi jowi oc win. Catuꞌ oj wabꞌen yel yaw ebꞌ chi unen spenail yu syaꞌil.

12 Jal pax ebꞌ ánima watxꞌ snaꞌbꞌal, oj a can ebꞌ jaxca xumac teꞌ palma, catuꞌ oj chꞌibꞌ ebꞌ jaxca chi yun ẍꞌibꞌa teꞌ kꞌuteꞌ bꞌey Líbano.

13 Yutol ey cꞌal ecꞌ ebꞌ bꞌey stemplo Jehová, oj a can ebꞌ yutol ey cꞌal ecꞌ ebꞌ scawilal cu Diosal.

14 Caxcꞌal icham animaxa ebꞌ, laan ebꞌ jaxca junoj teꞌ teꞌ chi yakꞌ cꞌal sat, eyto cꞌal yip yili ebꞌ.

15 Queyton tuꞌ oj yun xꞌoxon el ebꞌ tol chach yaoc ebꞌ yipoj scꞌul. Caw jichan cꞌal ja naꞌbꞌal, yutol cꞌam spenail ey ja win.