2 Col jin eloj. Ilaꞌ tol jijem jin cꞌal ey jaach. Col jin el jain ja chejabꞌ jin tiꞌ, yutol chach waoc yipoj jin cꞌul.

3 Jaach Jehová jin Diosal, okꞌ ojabꞌ ja cꞌul win, yutol masanil cꞌu chi wal jin bꞌa ey jaach.

4 Jaach jin Diosal, akꞌ tzala jin cꞌul jain ja chejabꞌ jin tiꞌ, yutol jaꞌ ey jaach chin txali.

5 Yutol caw watxꞌ ja naꞌbꞌal, akꞌom jaach tan spenail. Ey ja mimancꞌulal, ey pax ja camcꞌulal yin ebꞌ chi yal sbꞌa ey jaach.

6 Jaach Jehová, jin Diosal, abꞌ tzet chi wal yin jin txa yet chin kꞌanon ja colwal wibꞌan.

7 Jaꞌ yet ey jin oc xol syaꞌilal, chi walon jin bꞌa ey jaach, yin eymanil cha pajtze jin txa.

8 Yutol cꞌam junojxa Dios laan jaxca jaach, cꞌam junojxa chi skeꞌ yunen jaxca tzet jix ja waꞌne.

9 Jaach jin Diosal, jaach jix ja waꞌne masanil mimej conobꞌ. Oj yiꞌey sbꞌa ebꞌ ey jaach, oj yalon watxꞌ kꞌane ey jaach.

10 Yutol asanne jaach, Dios jaach, catuꞌ miman ja weloc apnoj, catuꞌ qꞌueyubꞌtaj xacꞌal yili tzet jix ja waꞌne.

11 Jaach Jehová, jin Diosal, txꞌox ja bꞌeybꞌal ey jin, yet watxꞌ chin bꞌeybꞌalne jijemal. Aoc yin jin naꞌbꞌal yet chi wiꞌon a can ja bꞌi.

12 Jaach Waawil, jaach jin Diosal, oj wal jin watxꞌ kꞌane ey jaach yin masanil jin cꞌul. Oj wiꞌon a can ja bꞌi.

13 Yel xacꞌal miman ja camcꞌulal win, yuxan ma jin ja chaꞌ eyqꞌuey bꞌey smujbꞌanil ebꞌ camom.

14 Jaach jin Diosal, ey jun bꞌulan ebꞌ cꞌam swatxꞌil snaꞌbꞌal chi tit win. Cꞌam niꞌoj scamcꞌulal ebꞌ; chi yoche ebꞌ chin yakꞌ camoj. Cꞌam ja weloc apnoj niꞌoj yul sat ebꞌ.

15 Jaxa jaach jin Diosal, caw chi okꞌ ja cꞌul win, catuꞌ ey ja camcꞌulal. Man cꞌuun oj stit ja jowal, caw watxꞌ ja naꞌbꞌal, cha wakꞌon eloc tzet cha wal ey jon.

16 Il jintej xin, okꞌ ojabꞌ ja cꞌul win. Col jin el jain ja chejabꞌ jin tiꞌ, catuꞌ cha wakꞌon ja wipal ey jin.

17 Tzꞌajan ojabꞌ chi yun ja wakꞌon ja watxꞌcꞌulal ey jin, jaxa yet oj yilon oc ebꞌ chi jowi oc win, oj qꞌuixwoj a ebꞌ, yutol jaach chach colwa wetoj, catuꞌ chin ja mimancꞌulneni.