2 Jix ja joꞌqꞌuey cu penail jaon ja conobꞌ jon tiꞌ, jix ja wakꞌon lawoj masanil cu mul jon.

3 Jix ja mitxꞌon oc tucan sjowal ja cꞌul, cꞌal ja kꞌakꞌalcꞌulal.

4 Jaach jin Diosal, cu Colomal jaach, ocan cꞌal ketoj junelxa. Cꞌam ojabꞌ cꞌal chi tit ja jowal kin jon.

5 ¿Tumi quey cꞌal tiꞌ stit ja jowal kin jon?

6 ¿Tumi manxa oj ja wakꞌ cu cawil jon, yet watxꞌ chi cu tzala ja wetoj jaon ja conobꞌ jon tiꞌ?

7 Jaach Jehová jin Diosal, txꞌox ja camcꞌulal ey jon, catuꞌ chon ja coloni.

8 Oj wabꞌ tzetyetal oj yal Jehová jin Diosal ey jin. Oj yakꞌ swatxꞌcꞌulal kibꞌan jaon sconobꞌ jon tiꞌ, yet watxꞌ manxa oj cu bꞌeybꞌalne junoj tzetyetal man watxꞌoj.

9 Yel toni, cawil eyecꞌ Dios, bꞌejan scꞌul scolwa yetoj ebꞌ chi oc yin eyilal tet, catuꞌ ey cꞌal ecꞌ stzejejial cu xol.

10 Oj xꞌox scamcꞌulal Dios xol ebꞌ sconobꞌ, yet watxꞌ jijem chi yute sbꞌa ebꞌ tet. Jaꞌ ebꞌ ánima watxꞌ snaꞌbꞌal jaxca tol oj slakꞌle sbꞌa ebꞌ yetoj swatxꞌcꞌulal Dios.

11 Ta jijem cꞌal chi yute sbꞌa ebꞌ ánima, ey cꞌal ecꞌ sjichanil yu ebꞌ sat txꞌotxꞌ txꞌotxꞌ tiꞌ, jaxa Dios tꞌanan eytej bꞌey satcan yet chi colwal yin ebꞌ.

12 Jaꞌ Jehová oj aon eytej nabꞌ yibꞌan txꞌotxꞌ txꞌotxꞌ tiꞌ, catuꞌ oj yakꞌon syaaxilal yibꞌan masanil tzetyetal chi awle sat txꞌotxꞌ txꞌotxꞌ tiꞌ.

13 Jaꞌ sjichanil bꞌabꞌel stit sattaj Jehová, catuꞌ jaꞌ oj waꞌnen sbꞌe yet chi juli.