2 Manxa jantajoj chi yoche jin cꞌul chin eecꞌal ecꞌ bꞌey yamakꞌil snail ja kꞌane. Yin masanil jin cꞌul chin bꞌitni ey jaach yin tzalacꞌulal, yutol Dios yet kꞌinale jaach.

3 Ilaꞌ tax noꞌ kocꞌ tzꞌiquin, cꞌal noꞌ tzꞌunun, chi ilcha bꞌey chi wey noꞌ, catuꞌ chi swaꞌnen sweyubꞌ noꞌ bꞌey chi yakꞌ yuneꞌ bꞌey scawilal jun yet xaambꞌal, jal jaach Jehová, yaaw Jaach Yibꞌan Masanil, jin Reyal jaach, jin Diosal jaach.

4 Caw tzalacꞌulal yet ebꞌ caan ecꞌ bꞌey ja templo; cꞌam chi sbꞌej sbꞌitni ebꞌ ey jaach.

5 Caw tzalacꞌulal yet ebꞌ chach yaoc yipoj scꞌul; ebꞌ ey cꞌal oc yin snaꞌbꞌal stoo bꞌey ja templo yin eyilal.

6 Jaꞌ yet chi ecꞌ el ebꞌ bꞌey spananil sjobꞌeal yet cuscꞌulal, jaxca snukꞌ^a jaꞌlaj chi yun can el yu ebꞌ, jaxca chi yun snoel yul-laj jobꞌe yu jaꞌ yet chi yakꞌon nabꞌ.

7 Oj oc yip ebꞌ sicꞌlebꞌil, jaxa bꞌey wonan Sión oj yil ja win ebꞌ.

8 Jaach Jehová jin Diosal, yaaw Jaach Yin Masanil, jaach sDiosal Jacob, abꞌ tzet chi wal yin jin txa.

9 Jaach jin Diosal, iltej jun cu reyal tol jix ja sicꞌ can eloj. Akꞌ ja watxꞌcꞌulal yibꞌan.

10 Yel xacꞌal watxꞌ, tol ey jin ecꞌ junoj cꞌual bꞌey ja templo, yintaj pax junoj mil cꞌual naat ey jin el ja cꞌatan. Chi yoche jin cꞌul tol chin teyne spuertail ja templo, yintaj pax tol jaꞌ bꞌey sna ebꞌ penawom ey jin ecꞌoj.

11 Jaach Jehová jin Diosal, jaach cha wakꞌ sajkꞌinal ey jon, catuꞌ chon ja teyneni. Akꞌ ja watxꞌcꞌulal yibꞌan ebꞌ chi sbꞌeybꞌalne sjichanil, catuꞌ chi iꞌle a can ebꞌ ja wu. Cha wakꞌon masanil tzetyetal watxꞌ tet ebꞌ, yutol ey ja weloc apnoj yul sat ebꞌ.

12 Jaach Jehová jin Diosal, yaaw jaach yin masanil, tzalacꞌulal yet ebꞌ chach aon oc yipoj scꞌul.