2 Iltej ebꞌ chi jowi oc ja win, ebꞌ cꞌam chach ocheni, caw chi bꞌuchwa ebꞌ, catuꞌ chi chichon oc scꞌul ebꞌ ja win.

3 Jix swa alne ebꞌ, tol chi yoche ebꞌ ey tzet chi yaoc ebꞌ yibꞌan ja conobꞌ tol teynebꞌil ja wu.

4 Chi yoche ebꞌ tol chi cu qꞌueyle el yu ebꞌ jon, yet watxꞌ cꞌamxa chi cu bꞌina yin mimej nación, catuꞌ cꞌamxa chi cu naꞌletej jaon Israel jon tiꞌ.

5 Jix swa alne ebꞌ jun pena naꞌbꞌale ja win. Junxane jix yute snaꞌbꞌal ebꞌ.

6 Jaꞌ ebꞌ a Edom, cꞌal ebꞌ Ismaelita, cꞌal wanxa ebꞌ yicꞌaal ix Agar, cꞌal ebꞌ yet Moab,

7 ebꞌ Guebal, ebꞌ Amón, ebꞌ Amalec, ebꞌ Filisteo, ebꞌ caan bꞌey Tiro,

8 yetoj ebꞌ a Asiria, junxane jix yute sbꞌa yetoj ebꞌ yicꞌaal Lot.

9 Jaxca ojabꞌ jix ja wute ebꞌ Madián, quey ojabꞌ tuꞌ cha wute cꞌal pax ebꞌ, jaxca jix ja wute naj Sísara, cꞌal naj Jabín bꞌey stiꞌ jaꞌ Quisón.

10 Jaꞌton ebꞌ camnaj bꞌey Endor, jix oc can ebꞌ syaxiloj sat txꞌotxꞌ txꞌotxꞌ.

11 Jaxca jix ja wute naj Oreb, cꞌal naj Zeeb, quey ojabꞌ tuꞌ cha wute masanil ebꞌ mimej winaj yeoc xol ebꞌ tuꞌ; jaxca jix ja wute naj Zébah, cꞌal naj Salmuná, quey ojabꞌ tuꞌ cha wute ebꞌ mimej yaaw yeoc xol ebꞌ,

12 tol jix yoche scꞌul ebꞌ tol jix smajcan oc txꞌotxꞌ ja txꞌotxꞌ tiꞌ ebꞌ.

13 Jaach jin Diosal, jaxca ojabꞌ kꞌalem chi ijletoj yu cajxuchum kaꞌeꞌ, ma jaxca tajin xaj teꞌ chi iꞌletoj yu kaꞌeꞌ, jaxca ojabꞌ tuꞌ cha wute ebꞌ.

14 Jaxca ojabꞌ chi yun stoo bꞌolobꞌ xol-laj teꞌ, catuꞌ chi tzꞌaꞌtoj masanil an yaax cꞌultaj yu kꞌakꞌ.

15 Jaxca ojabꞌ sbꞌey cajxuchum kaꞌeꞌ, quey ojabꞌ tuꞌ chi yun ja wujten cantoj ebꞌ yetoj sjowal ja cꞌul.

16 Jaach jin Diosal, iꞌel sqꞌuixwil ebꞌ, yet watxꞌ chi oc tzajan ebꞌ ja wintaj.

17 Qꞌuixwoj ojabꞌ ebꞌ yin junelne. Cꞌam ojabꞌ chi tan el jun qꞌuixwilal tuꞌ yin ebꞌ,

18 yet watxꞌ chi yotajne el ebꞌ tol asan jaach Jehová jaach, asanne jaach ecꞌbꞌan jaach yibꞌan masanil tzet ey bꞌey yul yibꞌankꞌinal tiꞌ.