2 Cu bꞌitnewej sbꞌi yetoj pandereta, yetoj arpa watxꞌ yeoc xꞌanil, cꞌal yetoj salterio.

3 Cu xuꞌwej chꞌen trompeta yet chi ali xꞌaaw. Cu xuꞌwej cꞌal pax chꞌen yet caw ey yajan xꞌaaw, yutol miman kꞌin yet tzalacꞌulal.

4 Jaꞌton jun miman chejbꞌanile jix yakꞌ Dios ey jon, jaon Israel jon tiꞌ, jaon yicꞌaal jon Jacob tiꞌ,

5 jix al-le cꞌal pax ey jon jaon yicꞌaal jon José tiꞌ, yet jix yakꞌon jowal Dios bꞌey txꞌotxꞌ Egipto, jix kabꞌ jun kꞌane tiꞌ, asan ma naꞌcha el ku.

6 Jix yalon Dios jaxca tiꞌ: Tuxa jix wiꞌ can el je yijatz yin je yichin. Tuxa jix wiꞌ can el jun mulnail caw yaꞌtaj eyoc je yibꞌan.

7 Jix jin je yawte yet ey jex toj yin syaꞌtajil, catuꞌ jix jex jin colon eltej. Jix jin takꞌwi ey jex xol jun asun yet chi bꞌilwi cꞌu. Jix jex wakꞌ porobꞌal bꞌey jaꞌ jaꞌ yet Meribá.

8 Jex jin conobꞌ, abꞌwej tzet chi walaꞌ, yutol jain chin kꞌanabꞌ ey jex. Jex Israel, tol oj wal jijem che yute je bꞌa ey jin.

9 Cꞌam ojabꞌ sdiosal ebꞌ txꞌoj conobꞌal eyecꞌ yul-laj je na. Cꞌam ojabꞌ chex ey kaan tet comon dios.

10 Yutol jain ton Jehová je Diosal jin, jain ton jix jex wiꞌeltej bꞌey txꞌotxꞌ Egipto. Kꞌanwej tzet chi yoche je cꞌul, jain oj wakꞌ je loꞌbꞌe.

11 Jaꞌ jun jix je yunne ma je jije jin chejbꞌanil jaex jin conobꞌ Israel jex tiꞌ.

12 Yu jun tuꞌ, yuxan jix jex jin bꞌejcanoj yu je pital ey jin, catuꞌ jix je yakꞌon je naꞌbꞌal jaxca chi yoche je cꞌul.

13 Jex jin conobꞌ Israel, toloj wal che yabꞌ tzet chi walaꞌ, toloj wal che bꞌeybꞌalne jin chejbꞌanil.

14 Yin mi wal jun mutzꞌsatil chi yun wakꞌon eyqꞌuey ebꞌ chi jowi oc je yin, chim waoc syaꞌilal yibꞌan ebꞌ je cajat tuꞌ.

15 Jaꞌ ebꞌ cꞌam chin ocheni, chi ey mocꞌan ebꞌ yu xiwcꞌulal ey jin, jaxa syaꞌilal chi waoc yibꞌan ebꞌ.

16 Jaxa mi wakꞌon mimanoj loꞌbꞌe ey jex, jaxa mi wal wakꞌon ixim tiriw caw watxꞌ ey jex, chim tzala je cꞌul je yuqꞌuen noꞌ yal awcabꞌ chi eltej satlaj chꞌen, ẍi Jehová.