Il Jontej Yetoj Ja Watxꞌcꞌulal
Jaꞌ sbꞌit naj Asaf
80
Jaach kilomal jaon conobꞌ Israel jon tiꞌ.Teyne jon jaon yicꞌaal naj José tiꞌ. Tol chotan jaach ey yibꞌan ebꞌ querubín.
2 Txꞌox ja tzejejial cu sattaj jaon yicꞌaal jon Efraín, cꞌal Benjamín, yetoj cꞌal Manasés. Akꞌbꞌalne ja wipal yet chon ja colon eloj.
3 Jaach jin Diosal, colwaan ketoj snan xol cu cuscꞌulal jon. Txꞌox ja watxꞌcꞌulal ey jon, catuꞌ chon ja colon eloj.
4 Jaach Jehová jin Diosal, tol miman yeoc ja wipalil. ¿Bꞌakꞌin wal oj lawoj ecꞌ sjowal ja cꞌul yet cha wabꞌen xali ebꞌ ja conobꞌ tiꞌ?
5 Jaꞌ cu cuscꞌulal jix ja wakꞌ cu loꞌbꞌeoj jon, jaꞌ yal cu sat chi el yu cuscꞌulal jaꞌ jix ja wakꞌ sqꞌuexeloj jaꞌ jaꞌ chi kuqꞌueytoj jon.
6 Jix jon ja chaꞌ bꞌuchle yu ebꞌ ánima caan cu cawilal jon. Caw chi cu tzeele yu ebꞌ chi jowi oc kin jon.
7 Jaach jin Diosal, yaaw jaach yibꞌan masanil, colwaan ketoj snan xol cu cuscꞌulal tiꞌ jon. Txꞌox ja watxꞌcꞌulal ey jon, catuꞌ chon ja colon eloj.
8 Jaach jin Diosal, jaꞌ bꞌey txꞌotxꞌ Egipto jix jon ja wiꞌeltej jaxca junoj steꞌal uva, jix ja wujten el wan txꞌoj conobꞌal sat xꞌotxꞌ tuꞌ, catuꞌ jix ja waon can ey xeꞌ jaxca junoj awo.
9 Jix ja wiꞌon el yakꞌinal, jix elol xeꞌ an uva tuꞌ, catuꞌ jix noel sat txꞌotxꞌ txꞌotxꞌ tiꞌ yu an.
10 Jix oc yenel an yibꞌanlaj sjolomlaj wonan. Jix maji cꞌal pax el teꞌ teꞌ mimej steel yu an.
11 Jix apni xaamlaj yakꞌil an bꞌey stiꞌlaj jaꞌ mar, catuꞌ jix apni oc swol yibꞌanlaj jaꞌ miman Éufrates.
12 ¿Tzet yu, yuxan jix ja wiꞌ can el scolalil an eyocoj. Yutol jaxa ebꞌ ánima chi ecꞌabꞌi chi ecꞌ iꞌon el sat an?
13 Lalan slawi el an yu noꞌ scꞌultajil txitam, cꞌal noꞌ xol-laj teꞌal noꞌ chi loꞌontoj sat an.
14 Jaach jin Diosal, yaaw jaach Yin Masanil, meltzaantej tꞌanan kin cu kꞌanaꞌ. Il jon eytej bꞌey satcan tuꞌ, catuꞌ cha naꞌontej an uva tiꞌ;
15 an uva tol jaach caw jix ja wawaꞌ, an wole tol jaach caw jix ja waoc yip, jaon ton ja conobꞌ jon tiꞌ.
16 Jaꞌ ebꞌ jix tzꞌokꞌon el an, cꞌal ebꞌ jix nuson tzꞌaꞌ an, akꞌ cam ebꞌ yetoj sjowal ja cꞌul.
17 Asan xin, ocan yetoj jun mac jix ja sicꞌ can eloj, jaꞌton naj rey tol jaach caw jix ja waoc yin yopiso.
18 Cꞌam bꞌakꞌin oj kiꞌel cu bꞌa ja wintaj. Akꞌ cu kꞌinal jon, asanne ojabꞌ ey jaach oj kal cu bꞌa.
19 Jaach jin Diosal, yaaw jaach yibꞌan masanil, colwaan ketoj snan xol cu cuscꞌulal tiꞌ jon. Txꞌox ja watxꞌcꞌulal ey jon, catuꞌ chon ja colon eloj.