2 Jix makꞌle cam ebꞌ ja chejabꞌ jijem chi yute sbꞌa ey jaach yu ebꞌ, jaxa noꞌ miij cꞌal noꞌ chiꞌwawom noꞌ jix chiꞌon eytoj smimanil ebꞌ.

3 Jaxca chi yun smaltoj jaꞌ jaꞌ sat txꞌotxꞌ, queytuꞌ jix yun smaltoj ẍiqꞌuil ebꞌ ja chejabꞌ yu ebꞌ bꞌey yinlaj conobꞌ Jerusalén, cꞌamxa mactxequel chi mujon smimanil ebꞌ.

4 Chi cu bꞌuchle yu ebꞌ ánima caan cu cawilal tiꞌ jon, tzeebꞌetaj jon yu ebꞌ joyan oc kinlaj tiꞌ.

5 Jaach Jehová jin Diosal, ¿jantaj to tiempo jow jaach cꞌal ey jon xin? ¿Jacꞌalaꞌ mi cꞌal stit ja jowal kin jaxca ẍaw xaj kꞌakꞌ kꞌakꞌ?

6 Tit ojabꞌ sjowal ja cꞌul yin ebꞌ txꞌoj conobꞌal, yutol man yotaj oj jaach ebꞌ, cꞌam chi yiꞌey sbꞌa ebꞌ ey jaach.

7 Yutol jix cu qꞌueyle el jaon yicꞌaal jon Jacob tiꞌ yu ebꞌ, catuꞌ jix yetnetoj cu conobꞌ ebꞌ jon.

8 Cꞌam ojabꞌ chon ja wakꞌ ijtzan yu cu toolane el spenail ebꞌ kichmam tuꞌ jon. Yin ojabꞌ eymanil chi yun ja waontej ja watxꞌcꞌulal kibꞌan jon, yutol cꞌamxa kip jon.

9 Jaach jin Diosal, cu Colomal jaach cꞌaltaꞌa. Ocan ketoj jon, colwaan ketoj jon; akꞌ mimancꞌulal yibꞌan cu penail jon yetoj ja watxꞌcꞌulal, yet watxꞌ chi bꞌinale ja bꞌi.

10 Ta cꞌamaj oj yal ebꞌ txꞌoj conobꞌal jaxca tiꞌ: ¿Bꞌeytuꞌ eyoc je Diosal tuꞌ? ẍi mi ebꞌ, oj yalon ebꞌ. Akꞌ kil jon yet chi ẍaꞌon can spaj ebꞌ yu scamichal ebꞌ ja chejabꞌ jix makꞌle cam yu ebꞌ tuꞌ, yabꞌ ojabꞌ cꞌal oc ebꞌ txꞌoj conobꞌal jun tuꞌ.

11 Jaꞌ ebꞌ eyoc yul preso, lalan yalon sbꞌa ebꞌ ey jaach; ocan tꞌanan yin ebꞌ. Colcan el ebꞌ eyxa oc yul skꞌabꞌ camich.

12 Jaach Jehová jin Diosal, aecꞌ spaj jujeloj tet wan nación ey cu cawilal tiꞌ jon, yutol chi bꞌuchwa ebꞌ ja win.

13 Jaxa jon jaon ja conobꞌ jon tiꞌ, jaxca tol jaꞌ meꞌ keoc jon, tucꞌaltaꞌ oj kal yu diosalil ey jaach. Oj cu bꞌitne watxꞌ kꞌane ey jaach.