2 Oj wal wan kꞌane tol miman yeloc apnoj ey jex. Jaꞌ tzetyetal cꞌam cꞌaltaꞌ chi al-le eloj, jaꞌ oj walaꞌ, wan tol cꞌam chi al-le el yet peyxa.

3 Jaꞌ wan tzetyetal jix kabꞌe, cꞌal tzetyetal kotaj; jaꞌ ebꞌ cu mam icham jix alon kabꞌe.

4 Sowalil oj kal tet ebꞌ kuninal. Jaꞌ wan tzet qꞌueyubꞌtaj jix yun Jehová yetoj yipalil, oj kal tet ebꞌ tol to oj aloj.

5 Jaꞌ Dios jix akꞌon can jun watxꞌ bꞌeybꞌale ey jon, jaon yicꞌaal jon Jacob tiꞌ, jix yakꞌon jun chejbꞌanile tiꞌ ey jon jaon Israel jon tiꞌ. Jix yalon can pax tet ebꞌ kichmamwej tol chi cu scuycan ebꞌ yin wan chejbꞌanile tiꞌ. Jaxa jon jaon tiꞌ, oj kakꞌ scuy ebꞌ kuninal,

6 yet watxꞌ chi yotajne el ebꞌ kuninal yet bꞌakꞌin, jaꞌton ebꞌ tol to oj aloj. Jaxa pax ebꞌ kuninal tuꞌ, oj yal pax ebꞌ tet yuninal yet bꞌakꞌin.

7 Yet watxꞌ tol jaꞌ Dios oj yaoc ebꞌ yipoj scꞌul, catuꞌ cꞌam bꞌakꞌin chi too qꞌueycꞌulal jantaj tzet jix yun Dios yu ebꞌ, yet watxꞌ jijem oj yute sbꞌa ebꞌ tet ẍejbꞌanil Dios.

8 Yet watxꞌ man oj yute sbꞌa ebꞌ jaxca jix yute sbꞌa ebꞌ cu mam icham, yutol ma ẍaꞌ yabꞌ scuybꞌanil Dios ebꞌ, pit yutenaj sbꞌa ebꞌ. Man watxꞌoj yutenaj sbꞌeybꞌal ebꞌ, ma sjije ebꞌ tzet jix yal Dios.

9 Jaꞌ ebꞌ soldado yet Efraín, ey smitxꞌkꞌabꞌ yet jowal ebꞌ, jaxa yet jix oc jowal xin, tol jix el ebꞌ yu xiwcꞌulal.

10 Cꞌam yeloc apnoj swa kꞌane Dios yul sat ebꞌ, tam wal jix yoche scꞌul ebꞌ jix sjije scuybꞌanil Dios.

11 Masanil tzet qꞌueyubꞌtaj jix yun Dios, pilan jix too qꞌueycꞌulal yu ebꞌ.

12 Jaꞌ Dios jix xꞌox wan tol qꞌueyubꞌtaj jix yun sattaj ebꞌ kichmam bꞌey txꞌotxꞌ Soan, yul yet Egipto.

13 Jix poꞌocha ey snan jaꞌ mar yu, catuꞌ jix chejle ecꞌtoj ebꞌ snan jaꞌ jaꞌ tuꞌ. Jix mitxꞌle oc tucan jaꞌ catuꞌ jix can bꞌulan jaꞌ jaxca junoj muro.

14 Jaꞌ yet cꞌualil jix iꞌle bꞌey ebꞌ yu jun asun yu Dios; jaxa yet akꞌbꞌalil txequel jun kꞌakꞌ jix ijbꞌan bꞌey ebꞌ.

15 Jaxa bꞌey txꞌotxꞌ cusiltaj txꞌotxꞌ jix spoꞌo sbꞌa chꞌen mimej chꞌen yu, yet watxꞌ chi yucꞌ jaꞌ ebꞌ sconobꞌ.

16 Jaꞌ bꞌey satlaj chꞌen miman chꞌen tuꞌ jix eltej secna jaꞌ mimej jaꞌ yu Dios.

17 Caxcꞌal mi jix yil jun tuꞌ ebꞌ, jacꞌalaꞌ jix oc cꞌal spenail ebꞌ tet Dios bꞌey txꞌotxꞌ cusiltaj txꞌotxꞌ tuꞌ. Jix chichon oc scꞌul ebꞌ yin Dios, Naj Tol Jaxa Cꞌal Ocoj.

18 Jix yakꞌ porobꞌal Dios ebꞌ, jix skꞌanon sloꞌbꞌe ebꞌ jaxca wal chi yoche scꞌul.

19 Jix yalon skꞌumal Dios ebꞌ jaxca tiꞌ: ¿Tumi oj skeꞌ yu Dios yakꞌon cu loꞌbꞌe bꞌey jun cusiltaj txꞌotxꞌ tiꞌ?

20 Yel toni, jix jattoj snan chꞌen miman chꞌen tuꞌ yu; jaꞌ yul chꞌen jix elol jaꞌ mimej jaꞌ, jix a paan jaꞌ sat txꞌotxꞌ txꞌotxꞌ tiꞌ. ¿Tumi taꞌ oj skeꞌ pax yakꞌon cu loꞌbꞌe tinaniꞌ? ¿Tumi taꞌ oj skeꞌ yakꞌon chiꞌbꞌe cu chiꞌ jaon sconobꞌ jon tiꞌ? ẍi ebꞌ.

21 Jix tit sjowal Jehová yet jix yabꞌen jun kꞌane jix yal ebꞌ conobꞌ tuꞌ. Jaxca wal junoj kꞌakꞌ jix yun stit sjowal, jix eyol kopna yin ebꞌ yicꞌaal Jacob,

22 yu cꞌal tol ma yaoc Dios ebꞌ yipoj scꞌul, tam wal jix yaoc scolwal Dios ebꞌ yipoj scꞌul.

23 Caxcꞌal jaxca tuꞌ jix yute sbꞌa ebꞌ, jix aletej jun asun yu Dios. Jix jajle spuertail satcan.

24 Jix eyol maná yibꞌan ebꞌ conobꞌ tuꞌ, jaxca yey yajan nabꞌ. Satcanil tiriw jix sloꞌ ebꞌ.

25 Jaꞌ sloꞌbꞌe ebꞌ ángel jix sloꞌ ebꞌ, yelcꞌulal jix akꞌle low ebꞌ yu Dios.

26 Jix lawi tuꞌ, yetoj yipal Dios jix yiꞌon jul jun kaꞌeꞌ chi tit bꞌey chi aol cꞌu, cꞌal bꞌey sur, jix tit xuyuyoj bꞌey satcan.

27 Jaꞌ xol jun kaꞌeꞌ tuꞌ jix jul bꞌuloloj noꞌ chiꞌbꞌe yibꞌan ebꞌ conobꞌ, manxa jantajoj noꞌ tzꞌiquin jix juli, jaxca xacꞌal yarenail stiꞌ jaꞌ mar.

28 Jaꞌ bꞌey eyecꞌ ebꞌ conobꞌ tuꞌ, jatuꞌ jix jul bꞌulan noꞌ tzꞌiquin tuꞌ, cꞌal bꞌey yinlaj skꞌap na ebꞌ.

29 Jix yakꞌ snaꞌbꞌal ẍiꞌon chiꞌbꞌe ebꞌ, yutol jix yakꞌ Dios tzet chi yoche scꞌul ebꞌ.

30 Jaxa jix yunne, jaꞌ yet cꞌam tocꞌal chi lawi noꞌ chiꞌbꞌe tuꞌ ẍiꞌon ebꞌ, yet eyto cꞌal octoj noꞌ chiꞌbꞌe tuꞌ yul stiꞌ ebꞌ,

31 catuꞌ jix tit sjowal scꞌul Dios yibꞌan ebꞌ. Jix akꞌle cam ebꞌ yu Dios, jaꞌton ebꞌ winaj tol ey yip xol ebꞌ ket Israelal.

32 Man yu oj jun tuꞌ, catuꞌ jix swaꞌnen oc snaꞌbꞌal ebꞌ. Tol jacꞌalaꞌ cꞌal yoc spenail ebꞌ. Ma yaon snaꞌbꞌal ebꞌ yu wan tzet qꞌueyubꞌtaj jix yun Dios tuꞌ.

33 Jaꞌ yu jun tuꞌ, yuxan jix qꞌueyle el ebꞌ yu Dios snan xol mimej xiwcꞌulal. Junne mutzꞌsatil, ma jaxca chi yun kiꞌon cu kaꞌeꞌ, queytuꞌ jix yun sqꞌueyle el ebꞌ yu Dios.

34 Jaꞌ yet jix cam jaywanoj ebꞌ tuꞌ, jaxa wanojxa ebꞌ jix yal sbꞌa ebꞌ tet Dios. Jix txali ebꞌ yin masanil scꞌul.

35 Queyton wal tuꞌ bꞌian, jix yun snaꞌletej Dios yu ebꞌ, Naj Tol Jaxa Cꞌal Ocoj, yutol jaꞌ Naj chi teynen ebꞌ cꞌal scol-le el ebꞌ yu.

36 Asan xin, tucꞌal chi tzꞌaj yal watxꞌ kꞌane ebꞌ tet Dios yin lekꞌtiꞌal kꞌane.

37 Cꞌam cꞌal bꞌey watxꞌ jix yute sbꞌa ebꞌ, ma yakꞌ eloc bꞌey jix yakꞌ can stiꞌ ebꞌ tet Dios.

38 Asan xin, jix okꞌ scꞌul Dios yin ebꞌ, yuxan jix joꞌole qꞌuey spenail ebꞌ yu, ma akꞌle cam ebꞌ yu. Ecꞌal el jix oc tucan sjowal scꞌul Dios yibꞌan ebꞌ, catuꞌ ma yatej sjowal scꞌul yin ebꞌ.

39 Jix snaꞌ Dios tol ánima cꞌal ton ebꞌ. Laan ebꞌ jaxca kaꞌeꞌ chi toocan junelne catuꞌ cꞌamxa chi meltzotej.

40 Cꞌamxa chi alcha jantaj el jix oc spitalil ebꞌ tet Dios; jix yabꞌ syaꞌil Dios yu ebꞌ bꞌey txꞌotxꞌ cusiltaj txꞌotxꞌ,

41 jacꞌalaꞌ cꞌal yakꞌle porobꞌal Dios yu ebꞌ. Jix akꞌle cus scꞌul cu Diosal yu ebꞌ, Naj Tol Asanxane Ocoj.

42 Cꞌamxa chi snaꞌtej niꞌoj ebꞌ, tzet jix yun scol-le el ebꞌ yul skꞌabꞌ scajat ebꞌ yu yipal Dios.

43 Cꞌamxa chi snaꞌtej wan milagro jix xꞌox Dios yil ebꞌ bꞌey txꞌotxꞌ panan Soan, yul yet Egipto.

44 Jaꞌ yet tuꞌ, jix oc jaꞌ miman jaꞌ yin chicꞌal yul yet Egipto; ma xa skeꞌ yuqꞌuen jaꞌ ebꞌ.

45 Jix aletej noꞌ yaax jaꞌ us xol ebꞌ a Egipto, mucꞌ xacꞌal yecꞌ noꞌ, jix etex ebꞌ yu noꞌ. Jix ale pax tej noꞌ pejey xol ebꞌ, yaabꞌetaj xacꞌal jix yuntoj sat txꞌotxꞌ tuꞌ yu noꞌ.

46 Masanil tzetyetal awbꞌil yu ebꞌ, jix jajle xacꞌal oc noꞌ kochiꞌ noꞌ yin yawo ebꞌ yu Dios, pilan jix lawi el sat yawo ebꞌ tuꞌ yu noꞌ.

47 Jaxa chꞌen sajbꞌat, cꞌal chꞌen cheew jix akꞌon qꞌueyel teꞌ higo, cꞌal an uva awbꞌil yu ebꞌ.

48 Jix cam noꞌ swacax ebꞌ cꞌal noꞌ smeꞌ ebꞌ yu chꞌen sajbꞌat tuꞌ, cꞌal yu smakꞌwa cꞌu.

49 Jix aletej syaꞌilal yibꞌan ebꞌ yu Dios, cꞌamxa chi alcha jantaj sjowal scꞌul. Manxa jantajoj ebꞌ yángel jix ẍejtej yet chi qꞌueyle el ebꞌ a Egipto tuꞌ.

50 Junelne jix tit sjowal scꞌul, cꞌamxa bꞌey jix okꞌ scꞌul yin ebꞌ. Jix ale oc ebꞌ yul skꞌabꞌ camich.

51 Jix makꞌle cam ebꞌ bꞌabꞌel unin bꞌey junjun nail ebꞌ a Egipto tuꞌ.

52 Jaxa ebꞌ conobꞌ Israel, jix iꞌle bꞌey ebꞌ yu Dios bꞌey txꞌotxꞌ cusiltaj txꞌotxꞌ yin tzalacꞌulalil, jaxca chi yun yiꞌle bꞌey noꞌ meꞌ yu mac chi teyneni.

53 Watxꞌ jix yun yiꞌle bꞌey ebꞌ yu, yet watxꞌ cꞌam chi xiw ebꞌ. Jaxa pax ebꞌ chi jowi oc yin ebꞌ Israel tuꞌ xin, jix cancan ebꞌ yich jaꞌ mar.

54 Jaꞌ Dios jix iꞌon apnoj oc ebꞌ sconobꞌ bꞌey jun txꞌotxꞌ txꞌotxꞌ sicꞌbꞌil el yu, bꞌey wan txꞌotxꞌ tzalquiltaj jaꞌcaw jix iꞌon ecꞌoj.

55 Sattaj ebꞌ conobꞌ Israel jix iꞌle can ecꞌ wan mimej conobꞌ tuꞌ yu Dios, catuꞌ jix poꞌole can ecꞌ txꞌotxꞌ txꞌotxꞌ tuꞌ yin majquiltajil xol junjun icꞌaaleal. Catuꞌ jix caey can ecꞌ ebꞌ bꞌey sconobꞌ wan scajat ebꞌ tuꞌ.

56 Jaxa ebꞌ ket Israelal tuꞌ, jix akꞌle porobꞌal Dios yu ebꞌ, Naj Tol Jaxa Cꞌal Ocoj, jix txꞌemletej sjowal scꞌul Naj yu ebꞌ, catuꞌ ma sjije ebꞌ tzet jix yalaꞌ.

57 Queyton tuꞌ yutenaj sbꞌa ebꞌ cu mam ichamwej tuꞌ, man jijemoj jix yute sbꞌa ebꞌ tet Dios. Jix el ebꞌ yul jun bꞌe jaxca junoj julbꞌal yet jowal tol cotxan.

58 Jix xꞌemtej sjowal scꞌul Dios ebꞌ, yutol chi bꞌet ebꞌ txaloj sjolomlaj wonan, yet chi bꞌet ebꞌ yiꞌon ey sbꞌa tet comon dios.

59 Jix tit sjowal scꞌul Dios yin ebꞌ yet jix yilon oc tzet jix yun ebꞌ tuꞌ, yuxan caw jix bꞌejlecan ebꞌ Israel tuꞌ yu Dios.

60 Jix sbꞌejcan snail scalubꞌal bꞌey Siló yu ebꞌ, tol sna Naj yeoc xol ebꞌ.

61 Jix el yin scꞌul Dios yiꞌletoj teꞌ Scaẍail Swa Kꞌane yu ebꞌ penawom, jaꞌton teꞌ scaẍail chi txꞌoxontej stzejejial cꞌal yipalil Dios.

62 Caw jix tit sjowal scꞌul Dios yin ebꞌ sconobꞌ tuꞌ, yuxan jix jajle cantoj ebꞌ yul skꞌabꞌ ebꞌ chi jowi oc yin ebꞌ, yet chi makꞌle cam ebꞌ yu chꞌen espada.

63 Jix nusle can tzꞌaꞌ ebꞌ achꞌe winaj, cꞌamxa bꞌey jix abꞌle yoc sbꞌital snupil ebꞌ ix kꞌopo.

64 Jix makꞌle cam ebꞌ yakꞌomal xaambꞌal yu chꞌen espada, ma skeꞌ yoc yistil ebꞌ naj jix cam tuꞌ.

65 Jix lawi tuꞌ, jix a jucna Dios, jaxca chi yun yel sweyan ánima, jaxca junoj soldado jelan yakꞌon jowal chi el yaw yu teꞌ an.

66 Catuꞌ jix akꞌle eyqꞌuey ebꞌ chi jowi oc tuꞌ, jix el ebꞌ, jix elcan sqꞌuixwil ebꞌ yu.

67 Jix lawi tuꞌ, jix sicꞌon el Dios jun chi oc yopiso xol ebꞌ sconobꞌ; manaj ebꞌ yicꞌaal José, cꞌal yicꞌaal Efraín jix sicꞌle el yu.

68 Jaꞌ xol ebꞌ yicꞌaal Judá jix sicꞌle eloj, cꞌal wonan Sión tol camcꞌulnebꞌil yu.

69 Jix swaꞌne a jun snail scalubꞌal caw naat jix yunna steel satcan, catuꞌ jix yaon ey yich jaxca txꞌotxꞌ txꞌotxꞌ tol ey cꞌal ecꞌ yin tobꞌalkꞌinal.

70 Catuꞌ jix sicꞌon el jun ẍejabꞌ, jaꞌton David, naj ilom meꞌ.

71 Jix iꞌle el naj yintaj noꞌ xutx meꞌ ey yuneꞌ, yet watxꞌ chi oc naj steynemaloj conobꞌ Israel, jaꞌton ebꞌ yicꞌaal Jacob. Jaxca junoj teynem meꞌ jix yun can oc naj steynemaloj ebꞌ conobꞌ Israel.

72 Jaꞌton David jix teynen ebꞌ sconobꞌ Dios yin masanil scꞌul, catuꞌ jix ijbꞌale ebꞌ conobꞌ tuꞌ yu yin watxꞌ naꞌbꞌale.