2 Chin txali tet Naj yet ey jin cuscꞌulal. Cꞌam cꞌal chin bꞌej jin mobꞌan jin kꞌabꞌ junjun akꞌbꞌal, cꞌam cꞌal pax bꞌey chi wiꞌ smimanil jin cꞌul.

3 Jaꞌ yet chin naꞌontej Dios, caw chin okꞌi, chi cꞌoli jin naꞌon oc win, jaxa chi yunne, chi jul jin caabꞌcꞌulal.

4 Jaach jin Diosal, cꞌam chin ja chaꞌ weyoj, catuꞌ cꞌamxa chi skeꞌ jin kꞌanabꞌi.

5 Chin naꞌontej wan scꞌual cꞌal wan abꞌil ecꞌnajxa el yet yalantoj.

6 Naꞌan cꞌal wu tinaniꞌ yet chin bꞌitni yet akꞌbꞌalil. Chin naꞌ cꞌal yin jin naꞌbꞌal, chi walon jaxca tiꞌ:

7 ¿Tumi wal quey cꞌal tiꞌ sjowal scꞌul Jehová win? ¿Tumi tol manxa oj okꞌ scꞌul Naj win?

8 ¿Tumi tol jix lawi a scamcꞌulal Naj? ¿Tumi junelne jix lawi a bꞌey yakꞌnaj can stiꞌ?

9 ¿Tumi jix too qꞌueycꞌulal swatxꞌcꞌulal Dios? ¿Yel xacꞌal mi tol caw jow, manxa mi oj okꞌ scꞌul win? jin chi yin jin naꞌbꞌal.

10 Ey jun tzetyetal yel xacꞌal yaꞌ chi wabꞌe, yutol chin naꞌ yul wet jaxca tiꞌ: Tol jaꞌ yipalil Dios, Naj Tol Jaxa Cꞌal Ocoj, cꞌamxa tzet eyecꞌ ketoj tinaniꞌ, man jaxca oj yet yalantoj, jin chi.

11 Jaach jin Diosal, jaꞌ tinaniꞌ oj jin naꞌtej jantaj tzet qꞌueyubꞌtaj yili jix ja wun kin yet yalantoj.

12 Oj jin naꞌtej masanil tzet jix ja wunne.

13 Jaach jin Diosal, caw watxꞌ ton ja bꞌeybꞌal. ¿Bꞌeytuꞌ eyoc junojxa comon dios tol laan yeloc apnoj ja wetoj?

14 Jaach tiꞌ, Dios jaach, qꞌueyubꞌtaj yeoc jantaj tzet cha wunne. Jix ja txꞌoxel ja wipal tet masanil nacionlaj.

15 Jix ja colcan el ebꞌ conobꞌ yetoj ja wipal, jaꞌton ebꞌ yicꞌaal Jacob cꞌal José.

16 Jaach cu Diosal, jaꞌ yet jix jaach yilon jaꞌ mar, jix xiwcan a jaꞌ. Jix bꞌilwi a jaꞌ masantaꞌcꞌal bꞌey chi ina snaatil yich jaꞌ.

17 Chi eytej nabꞌ xol asun, catuꞌ chi bꞌilwi cꞌu bꞌey satcan, catuꞌ chi ey letzꞌlom bꞌey masanil sat txꞌotxꞌ txꞌotxꞌ tiꞌ.

18 Chi abꞌle smakꞌwa cꞌu xol cajxuchum. Chi sajbꞌi el yul yibꞌankꞌinal tiꞌ yu letzꞌlom. Jix bꞌilwi txꞌotxꞌ txꞌotxꞌ tiꞌ yu.

19 Jix ja jajtoj ja bꞌe yul jaꞌ mar, caw miman jaꞌ jaꞌ bꞌey jix jaach kꞌaxbꞌo ecꞌtoj, cꞌam cꞌal junoj mactxequel jix ilontej yechel ja wajan bꞌey jix jaach ecꞌtoj.

20 Jix ja wiꞌ bꞌey ebꞌ ja conobꞌ jaxca noꞌ meꞌ. Jix ja kꞌanbꞌalne naj Moisés cꞌal Aarón, yet jix ijbꞌale ja conobꞌ yu ebꞌ.