2 Jaꞌ bꞌey tzalan Sión, jaꞌ tituꞌ ey scalubꞌal, jaꞌ bꞌey Jerusalén chi majwa jaxca junoj noꞌ bꞌalam.^a

3 Jaꞌ tituꞌ jix qꞌueyle can el chꞌen mitxꞌkꞌabꞌe yet jowal, jaꞌton chꞌen julbꞌal, cꞌal chꞌen espada, cꞌal chꞌen majbꞌal sat julbꞌal, yu Dios.

4 Jaach jin Diosal, caw miman yeoc ja wipalil. Yel xacꞌal ecꞌbꞌan ja wipal yintaj masanil txꞌotxꞌ mimej wonan.

5 Jaꞌ ebꞌ soldado jelan yakꞌon jowal jix iꞌle ecꞌ masanil smitxꞌkꞌabꞌ ebꞌ. Jaꞌ ebꞌ caw ey yip, cꞌamxa tzet jix yal ebꞌ, pilan jix cam ebꞌ.

6 Jaach sDiosal Jacob, jaꞌ yet jix el ja waw yu ja wakꞌon jowal, ma xa skeꞌ scolon sbꞌa ebꞌ akꞌom jowal tuꞌ, ma xa skeꞌ yiꞌontoj scarruaje ebꞌ, tam wal noꞌ che chi yakꞌbꞌalne ebꞌ yin jowal,

7 yutol caw ey ja mey sicꞌlebꞌil. ¿Macto wal txequel junoj chi skeꞌ yoc linan ja sattaj yet chi tit ja jowal?

8 Jata cꞌal bꞌey satcan tuꞌ jix ja walaꞌ yu tzet oj yun ja naꞌon oc yin ebꞌ ánima. Jaxa ebꞌ ánima ey sat txꞌotxꞌ txꞌotxꞌ tiꞌ, tzꞌin xacꞌal ẍi ebꞌ yu xiwcꞌulal.

9 Jaꞌ yet jix jaach a waan yu ja naꞌon oc yin ebꞌ, cꞌal ja colon can el ebꞌ okꞌbꞌal cꞌul yeoc bꞌey yul yibꞌankꞌinal tiꞌ.

10 Jaꞌ yet chi tit sjowal scꞌul ebꞌ ánima, oj ja wakꞌ meltzo oc yin alo watxꞌ kꞌane ey jaach. Jaxa jaywanojxa ebꞌ man oj cam yu jowal, jaxca tol ja corona yeoc ebꞌ.

11 Kakꞌwej cu tiꞌ tet Jehová cu Diosal, kunwej cꞌal bꞌey chi kakꞌ can cu tiꞌ tet. Jaxa jex conobꞌlaj tol ey jex ecꞌ scawilal sconobꞌ Dios, iꞌwejtej je saꞌbꞌeal tet.

12 Yutol jaꞌ Dios chi iꞌon el skꞌinal ebꞌ yaaw. Ey xiwcꞌulal ebꞌ rey yet yul yibꞌankꞌinal tiꞌ tet Naj.