2 Jaach Waawil, cha wal jaxca tiꞌ: Jaꞌ yet oj aapnoj stiempoal, watxꞌ cꞌal oj wute jin naꞌon oc yin ebꞌ ánima yin sjichanil.

3 Caxcꞌal mi chi wakꞌ bꞌilwoj txꞌotxꞌ txꞌotxꞌ yetoj masanil tzetyetal ey sat txꞌotxꞌ, jain ton chi waoc yip sbꞌatxlubꞌal yalan txꞌotxꞌ.

4 Jaꞌ tet ebꞌ chi smeyne sbꞌa, cꞌal ebꞌ penawom chi wal jaxca tiꞌ, tol cꞌam ojabꞌ che yiꞌa can je bꞌa.

5 Cꞌam ojabꞌ che yaloꞌtane yu jantaj tzetyetal chi skeꞌ je yu je yaloni. Cꞌam ojabꞌ chex kꞌanabꞌ yin meynebꞌail.

6 Jex wet animail, jaꞌ yet chi iꞌle a can junoj ánima ma yet chi al-le watxꞌ kꞌane kin, manaj bꞌey chi aol cꞌu chi tita, tam wal bꞌey chi too cꞌu, tam wal bꞌey norte tam wal bꞌey sur, tam wal bꞌey txꞌotxꞌ cusiltaj txꞌotxꞌ chi tita.

7 Yutol jaꞌ Dios, Juez ton yeocoj. Ey mactxequel chi iꞌle a can yu. Ey pax mactxequel yeynajil chi utele yu.

8 Yutol jaꞌ Jehová, caw ey sjowal scꞌul, laan jaxca junoj vaso nonaj yetoj vino caw jow spail. Jaꞌ yet oj secon ey sjowal scꞌul yibꞌan masanil ebꞌ penawom bꞌey sat txꞌotxꞌ tiꞌ, jaxca tol oj yucꞌ masanil ebꞌ.

9 Jal pax jin, jain tiꞌ, yin tobꞌalkꞌinal oj wal cꞌal el skꞌaneal cu Diosal jaon yicꞌaal jon Jacob tiꞌ, oj wal watxꞌ kꞌane tet yin bꞌitalil.

10 Yutol jaꞌ Dios oj akꞌon lawoj el yipalil ebꞌ chi unen spenail, jal pax ebꞌ ánima watxꞌ sbꞌeybꞌal xin, oj akꞌle cꞌal yip ebꞌ yu Dios.