2 Naꞌontej jaon ja conobꞌ jon tiꞌ, yutol jaach jix jon ja man can el yet tax peyxa. Jaach jix jon ja colcan el yet chi cu oc ja conobꞌoj. Naꞌtej txꞌotxꞌ tzalan Sión bꞌey caan jaach cꞌaltaꞌa.

3 Titan xin, yet chi jul ja wilon wan jix uchle ey yin junelne tiꞌ. Jaꞌ ebꞌ chi jowi oc ja win, jix uchle lawoj masanil ja calubꞌal yu ebꞌ.

4 Jaꞌ ebꞌ chi jowi oc ja win, jix el yaw ebꞌ yu sjowal scꞌul bꞌey ja calubꞌal bꞌey chi kiꞌey cu bꞌa ey jaach, yutol jix eyqꞌuey yu ebꞌ, jaxa sbandera ebꞌ txꞌoj conobꞌal jix yiꞌa ebꞌ tituꞌ.

5 Jaxca xacꞌal yet chi tzokꞌwi teꞌ ebꞌ siꞌwom bꞌey xol-laj teꞌ,

6 jix low eche cꞌal chꞌen martillo yin teꞌ chemteꞌ eyoc yul ja calubꞌal, jix lawi el swatxꞌil yili ja calubꞌal yu ebꞌ.

7 Jix snusletoj snail ja calubꞌal yu ebꞌ. Jix etextoj bꞌey chi oc eyilal ey jaach. Tuxa cꞌal jix ey can bꞌulan sat txꞌotxꞌ yu ebꞌ.

8 Jix yoche ebꞌ tol chi cu qꞌueyle can el cu masanil jon. Pilan jix yaoc skꞌakꞌal masanil yul cu nación ebꞌ tiꞌ jon, bꞌey chi cu yambꞌa cu bꞌa yet chi kiꞌon ey cu bꞌa yin eyilal ey jaach.

9 Manxa txequeloj ta tol ja conobꞌ jon, cꞌamxa junoj ja chejabꞌ eyecꞌ cu xol, man kotajoj tinaniꞌ jantaj to tiempo oj yakꞌ jun tiꞌ.

10 Jaach jin Diosal, ¿jantaj to wal tiempo oj jon txꞌemle yu ebꞌ cu cajat tiꞌ jon? ¿Bꞌakꞌin oj sbꞌej yalon pena kꞌane ebꞌ ja win?

11 ¿Tzet yuxan cha cꞌubꞌa el ja wipalil ey jon? ¿Tzet yuxan cꞌam cha wakꞌ ja wip ja wakꞌon lawoj el ebꞌ?

12 Jaꞌ yet tax cꞌaltaꞌ peyxa, cu Reyal jaach cꞌaltaꞌa. Jaach jin Diosal, ecꞌal bꞌey jix kakꞌ eyqꞌuey jowal yetoj ja colwal.

13 Jix ja poꞌo snan jaꞌ mar yetoj ja wipal. Jix ja makꞌ poꞌo sjolom noꞌ mimej noꞌ ey yul jaꞌ mar.

14 Jix ja tecꞌey sjolom noꞌ miman Leviatán, catuꞌ jix ja wakꞌon tet noꞌ chiꞌwawom noꞌ bꞌey txꞌotxꞌ cusiltaj txꞌotxꞌ.

15 Jaach jix ja wakꞌ aol jaꞌ snukꞌ jaꞌ chi el sne, catuꞌ jix ja wakꞌon tan jaꞌ mimej jaꞌ cꞌam cꞌaltaꞌ chi tantoj.

16 Jaach ey ja wet cꞌualil cꞌal akꞌbꞌalil, jaach jix ja waꞌne cꞌu cꞌal xꞌaaw.

17 Jix ja waon can ey smoonal yul yibꞌankꞌinal tiꞌ. Jaach jix ja wal canoj tol ey waresma cꞌal nabꞌilkꞌinal.

18 Jaach jin Diosal, naꞌcꞌaltej tol jaꞌ ebꞌ chi jowi oc ja win, chi bꞌuchwa ebꞌ. Caw chi ecꞌ ebꞌ yibꞌan, yuxan caw chach yintajne el ebꞌ.

19 Cꞌam ojabꞌ chi too qꞌueycꞌulal jun tuꞌ ja wu. Yutol jaon tiꞌ jon, caw cꞌuun jon chꞌan jon jaxca noꞌ cuateꞌ. Cꞌam ojabꞌ chon ja waoc yul skꞌabꞌ ebꞌ, yutol laan ebꞌ jaxca junoj noꞌ chiꞌwawom noꞌ.

20 Cꞌam ojabꞌ chi too qꞌueycꞌulal ja wa kꞌane jix ja wakꞌcan ey jon, yutol jaꞌ bꞌey masanil cu conobꞌ tiꞌ jon, caw ecꞌalxa sbꞌisil ebꞌ penawom chi yetne yet animail.

21 Cꞌam ojabꞌ cha chaꞌ etex ebꞌ yeynajil ánima. ¡Bꞌitnoj ojabꞌ ebꞌ mebꞌa ey jaach, cꞌal ebꞌ okꞌbꞌalcꞌule yeocoj!

22 Jaach jin Diosal, ocan ketoj jaon ja conobꞌ jon tiꞌ. Naꞌtej tol jaꞌ ebꞌ chi unen spenail caw chi bꞌuchwa ebꞌ ja win.

23 Cꞌam ojabꞌ chi too qꞌueycꞌulal ja wu, yet jix el yaw ebꞌ chi jowi oc ja win, manxa jantajoj yel yaw ebꞌ yutol caw pena chi yute sbꞌa ebꞌ ey jaach.