2 Tol oj wal jix yakꞌ niꞌojxa, xax mi jin eyqꞌueyi, ian wal jix wiꞌel jin naꞌbꞌal yin Dios an.

3 Yutol jix chichon a jin cꞌul wilon oc ebꞌ chi smeyne sbꞌa, cꞌal wiloni tol watxꞌ yet ebꞌ penawom.

4 Tumi ey camich chi jul yin ebꞌ. Caw watxꞌ yet ebꞌ, cꞌam syaꞌilal chi jul yin smimanil ebꞌ.

5 Cꞌam syaꞌilal chi ecꞌ el yibꞌan ebꞌ, cꞌam bꞌey chi xiw ecꞌ ebꞌ yu mebꞌail.

6 Yu jun tuꞌ, jaxca tol scorona ebꞌ yeoc jun meynebꞌail tuꞌ, jaxa spenail chi el yunen ebꞌ jaxca spichil ebꞌ yeocoj.

7 Ian cꞌamxa chi txeclo sbꞌakꞌ sat ebꞌ yu bꞌakꞌechal. Yel xacꞌal miman spenail ey yin snaꞌbꞌal ebꞌ.

8 Asanne bꞌuchwal kꞌane chi yal ebꞌ yet chi ẍaꞌlen sbꞌa ebꞌ, cꞌam chi qꞌuixwi ebꞌ yakꞌon jowal, cꞌal yetnen yet animail ebꞌ.

9 Asanne bꞌuchwal kꞌane chi yal ebꞌ yin Dios a satcan. Catuꞌ comon cꞌal chi yetne yet animail ebꞌ bꞌey sat txꞌotxꞌ tiꞌ.

10 Yu jun tuꞌ, chi oc tzajan ebꞌ ánima yintaj ebꞌ, chi ẍaꞌon yabꞌ ebꞌ ánima jantaj spenail chi yal ebꞌ.

11 Chi snaꞌon ebꞌ jaxca tiꞌ: ¿Tumi oj yabꞌ Dios? ¿Tumi oj yiltej Naj Tol Jaxa Cꞌal Ocoj? ẍi ebꞌ, chi yalon ebꞌ.

12 Ilwej ton ebꞌ penawom tiꞌ. Tumi ey tzet chi snaꞌ ebꞌ, tol yelcꞌulal chi oc ebꞌ bꞌeomal.

13 Jaxa jin jain tiꞌ, tumi ey tzet jix wiꞌ yu ma waoc jin naꞌbꞌal yin wunen spenail, tumi ey tzet jix wiꞌ yutol watxꞌ jix wute jin bꞌeybꞌal.

14 Kocꞌtaj cꞌal chin makꞌlei, junjun cꞌal skꞌinibꞌalil chi makꞌle oc tzꞌuum win.

15 Ta jix wal pena kꞌane jaxca ebꞌ tuꞌ, jix mi wetne ebꞌ wet conobꞌ tiꞌ.

16 Jix yoche jin cꞌul tol jix naꞌcha el wan tiꞌ wu, asan xin, tucꞌal jix somcha el jin naꞌbꞌal yu.

17 Jato wal yet jix jin apni oc bꞌey ja calubꞌal, catuꞌ jix naꞌcha el wu tzet oj yun cantoj ebꞌ penawom tuꞌ.

18 Jix ja tecꞌbꞌa can ey ebꞌ bꞌey cꞌuun stelkꞌotoj, catuꞌ cha tenon cantoj ebꞌ bꞌey chi etex el ebꞌ.

19 Junne txolan oj yun yuchchatoj ebꞌ, xol xiwcꞌulal oj qꞌueyle el ebꞌ.

20 Jaach Waawil, oj ja wintajne can el ebꞌ pena tzet chi el yuneni. Jaxca chi yun stoo qꞌueycꞌulal sweyich junoj mactxequel yet chi el sweyan, queytuꞌ oj yun cantoj ebꞌ.

21 Jaꞌ yet cꞌamto chi naꞌcha el jun tiꞌ wu, caw yaꞌ chi wabꞌe, caw chi oc pitzꞌan syaꞌilal yin jin pixan.

22 Yu cꞌam jin naꞌbꞌal, yuxan cꞌam chi naꞌcha el niꞌoj wu, jix jin naꞌ jaxca tiꞌ. Yu jun tuꞌ, caw laan chi wute jin bꞌa jaxca junoj noꞌ noꞌ cꞌam snaꞌbꞌal.

23 Yu tuꞌ xin, ey jin cꞌaltaꞌ ecꞌ ja wetoj, catuꞌ quetzbꞌil jin oc ja wu.

24 Chin ja cuyon yin tzet chi yun jin bꞌeytoj, jaxa slawubꞌal, oj jin chaꞌ ja yaxilal.

25 ¿Mactxequel junoj ey bꞌey satcan tuꞌ chi skeꞌ waon oc yin jin cꞌul? Asanne jaach toni. Jaꞌ yet ey jin ecꞌ ja wetoj, cꞌamxa tzet oj yoche jin cꞌul sat txꞌotxꞌ txꞌotxꞌ tiꞌ.

26 Caxcꞌal mi chi pax yip jin mimanil ma chi pax yip jin pixan, asanne jaach Wipomal ja weocoj, asanne ja win ey masanil tzet chi yoche jin cꞌul.

27 Jaꞌ ebꞌ chi yiꞌel sbꞌa ja cꞌatan, oj cam ebꞌ, oj ja qꞌueycan el ebꞌ man jijemoj ey jaach.

28 Jaach Jehová jin Diosal, Waawil jaach, watxꞌ tol chin jitztoj jin bꞌa ja cꞌatan, jaach chach oc weneloj. Oj walon el jantaj tzet jix ja wunne.