2 yet watxꞌ yin cꞌal sjichanil, cꞌal yin watxꞌ naꞌbꞌale chi yun yakꞌon yaawilal xol ebꞌ ja conobꞌ, cꞌal xol ebꞌ mebꞌa.

3 Ey ojabꞌ watxꞌcꞌulal cꞌal sjichanil xol ebꞌ conobꞌ caan bꞌey sjolomlaj wonan cꞌal bꞌey txꞌotxꞌ tzalquiltaj.

4 Yin ojabꞌ sjichanil oj yun swaꞌnen yeoc junoj jowal xol ebꞌ mebꞌa. Col-le ojabꞌ el ebꞌ eyoc yalan mebꞌail yu naj rey, jaxa ebꞌ etnem ánima, tol ojabꞌ chi ale oc syaꞌilal yibꞌan ebꞌ yu naj.

5 Yiꞌ ojabꞌ ey sbꞌa ebꞌ ja conobꞌ ey jaach, yajbꞌan eyto cꞌu, cꞌal xꞌaaw.

6 Jaꞌ swatxꞌcꞌulal naj rey, laan ojabꞌ jaxca nabꞌ, ma jaxca yal akꞌbꞌal chi akꞌon yaaxbꞌoj sat txꞌotxꞌ txꞌotxꞌ, yet chi chꞌibꞌa an cꞌultaj.

7 Tol yelcꞌulal ojabꞌ ey swatxꞌilal, cꞌal sjichanil yul stiempo syaawil naj rey, masantaꞌcꞌal yet cꞌamxa xꞌaaw.

8 Yakꞌ ojabꞌ yaawil bꞌey stiꞌ jaꞌ mar, masantaꞌcꞌal bꞌey scꞌaxepal ecꞌtoj stiꞌ jaꞌ mar, cꞌal bꞌey stiꞌ jaꞌ miman Éufrates, masantaꞌcꞌal bꞌey slawubꞌal txꞌotxꞌ txꞌotxꞌ tiꞌ.

9 Jaꞌ ebꞌ caan bꞌey txꞌotxꞌ cusiltaj txꞌotxꞌ, oj yiꞌey sbꞌa ebꞌ tet naj, jaxa ebꞌ chi jowi oc yin naj tol oj sloꞌ pojoj ebꞌ.

10 Masanil ebꞌ rey bꞌey Tarsis, cꞌal ebꞌ caan bꞌey stiꞌlaj jaꞌ mar, ma ebꞌ rey yet Sabá, cꞌal ebꞌ yet Sebá, yakꞌ ojabꞌ saꞌbꞌeal cꞌal stoolabꞌal ebꞌ tet naj.

11 Ey ojabꞌ kaan masanil ebꞌ rey tet naj. Akꞌle ojabꞌ servil naj yu masanil nacionlaj.

12 Jaꞌton naj oj colon el ebꞌ mebꞌa chi yal sbꞌa tet, yetoj cꞌal pax ebꞌ cꞌamxa junoj mactxequel chi coloni.

13 Oj okꞌ scꞌul naj yin ebꞌ yeynajil ánima. Oj col-le el ebꞌ mebꞌa yul skꞌabꞌ camich yu naj.

14 Oj col-le el ebꞌ yul skꞌabꞌ ebꞌ etnem ánima, cꞌal tet ebꞌ penawom, yutol miman yeloc apnoj skꞌinal ebꞌ yul sat naj.

15 Iquis ojabꞌ cꞌal ecꞌ naj rey. Akꞌle ojabꞌ chꞌen oro yet Sabá tet naj. Kꞌanle ojabꞌ cꞌal scawil naj tet Dios, akꞌle ojabꞌ cꞌal syaaxilal yibꞌan naj.

16 Miman ojabꞌ ixim tiriw chi yamcha yul sconobꞌ naj, miman ojabꞌ ixim chi yamcha bꞌey txꞌotxꞌ tzalquiltaj. Chꞌibꞌ ojabꞌ ixim tiriw jaxca chi yun ẍꞌibꞌ teꞌ teꞌ bꞌey Líbano, chꞌibꞌ ojabꞌ sbꞌisil ebꞌ ánima jaxca an cꞌultaj chi chꞌibꞌ sat txꞌotxꞌ txꞌotxꞌ.

17 Naꞌle ojabꞌ cꞌaltej naj rey, bꞌinale ojabꞌ cꞌal naj rey jaxca yajan cꞌu. Masanil ojabꞌ nacionlaj chi chaꞌon syaaxilal yu naj. Yal ojabꞌ ebꞌ tol watxꞌ yet ebꞌ.

18 Al-le ojabꞌ watxꞌ kꞌane tet Jehová, Naj cu Diosal jaon Israel jon tiꞌ. Asanne ton Naj chi skeꞌ yunen masanil tzetyetal qꞌueyubꞌtaj yoqui.

19 Al-le ojabꞌ watxꞌ kꞌane tet Naj. Bꞌinale ojabꞌ cꞌal smimanbꞌilal Naj bꞌey masanil yul yibꞌankꞌinal tiꞌ. Yun ojabꞌ jaxca tuꞌ.

20 Jaꞌ titiꞌ chi lawi can xa naj rey David, scꞌaal naj Jesé.