2 Col jin eloj, col jin el yul skꞌabꞌ ebꞌ jin cajat, yutol watxꞌ jaach toni. Abꞌ tzet chi walaꞌ, catuꞌ chin ja colon eloj.

3 Ocan weneloj jaxca junoj miman nachꞌen bꞌey chi skeꞌ jin colon jin bꞌa. Ocan jin colal chꞌenoj yet chi skeꞌ jin colon jin bꞌa. ¡Wotaj jaxca tol jin nachꞌen ja weocoj, jaxca tol jin cuartel jaach!

4 Jaach jin Diosal, col jin el yul skꞌabꞌ ebꞌ penawom cꞌal yul skꞌabꞌ ebꞌ makꞌom cam ánima cꞌal yul skꞌabꞌ ebꞌ etnem ánima.

5 Jaach jin Diosal, Waawil jaach, ey jaach cꞌaltaꞌ oc yipoj jin cꞌul yin tax cꞌal wachꞌeal.

6 Yet tax cꞌal jix jin ali yin jin txutx, jaꞌ ja win chi wiꞌ wip. Jaach jix jin ja wakꞌ aloj. Yuxan oj jin bꞌitnoj cꞌal ey jaach.

7 Ecꞌal ebꞌ jix naꞌcha el yu, yu jix yil ebꞌ tzet weocoj, yutol jaach jix jin ja coloꞌ.

8 Masanil cꞌual quey cꞌal tiꞌ walon jin watxꞌ kꞌane yin wiꞌon a can ja bꞌi.

9 Cꞌam ojabꞌ chin ja wintajne el yet icham winaj jin xa. Cꞌam ojabꞌ chin ja bꞌejcan yet cꞌamxa wip.

10 Jaꞌ ebꞌ chi jowi oc win, ebꞌ chi yoche chin yakꞌ camoj, chi syambꞌa sbꞌa ebꞌ, catuꞌ chi swa alnen ebꞌ yu tzet oj jin yute.

11 Chi yalon ebꞌ jaxca tiꞌ: ¡Ujtewej, mitxꞌwej eyoj! ¡Tumi eyto oc Dios yetoj, tumi eyto mactxequel oj colon el tinaniꞌ! ẍi ebꞌ.

12 Jaach jin Diosal, man ojabꞌ naat to cha wiꞌel ja bꞌa jin cꞌatan. Titan yin eymanil, yet chach oc wetoj.

13 Jaꞌ ebꞌ chi jowi oc win, can ojabꞌ ebꞌ yin qꞌuixwilal. Cꞌam ojabꞌ yeloc apnoj ebꞌ chin ujten ecꞌoj.

14 Jal jin jain tiꞌ, junjun txolan ey jaach cꞌaltaꞌ oc yipoj jin cꞌul. Oj jaach jin bꞌitne cꞌal yetoj tzalacꞌulal.

15 Masanil tiempo oj walel skꞌaneal ja watxꞌilal, cꞌal ja colwal, caxcꞌal manxa oj naꞌcha walon el masanil.

16 Jaach Jehová jin Diosal, Waawil jaach, jaꞌ wan mimej tzetyetal jix ja wunne, jaꞌ oj jin bꞌitne. Oj walel skꞌaneal tol asanne jaach caw watxꞌ jaach toni.

17 Jaach jin Diosal, yin tax cꞌal jin yaliẍal jix jin ja cuyoni. Jacꞌalaꞌ cꞌal walon el skꞌaneal jantaj tzet qꞌueyubꞌtaj yili waꞌnebꞌil ja wu.

18 Jaach jin Diosal, cꞌam ojabꞌ chin ja bꞌejcan jin txꞌojli, caxcꞌal sajxa xil jin jolom yu icham winajil. Oj wal cꞌal el skꞌaneal ja wipalil tet ebꞌ oj aloj yet bꞌakꞌin.

19 Jaach jin Diosal, yel xacꞌal miman yeoc ja watxꞌilal, chi apni taꞌcꞌal oc bꞌey satcan. Mimej tzetyetal jix ja wunne. ¡Tumi ey junoj mactxequel laan jaxca jaach tiꞌ!

20 Caxcꞌal mi ecꞌal tujan tzetyetal jix jin ioni, cꞌal syaꞌilal jix ja wakꞌ ey jin, oj to ja wakꞌ cꞌal yakꞌil jin kꞌinal junelxa. Oj skeꞌ watej yul scꞌul txꞌotxꞌ txꞌotxꞌ tiꞌ junelxa.

21 Yel xacꞌal miman oj yun weloc apnoj ja wu, oj ja wakꞌon smimanil jin cꞌul.

22 Jain tiꞌ, oj jin bꞌitnoj ey jaach, yutol chi cꞌal yun tzet cha walaꞌ, catuꞌ oj walon yu diosalil yin arpail cꞌal yin waabꞌ. Jaach jin Diosal, cu Diosal jaach jaon Israel jon tiꞌ.

23 Oj a waw yin tzalacꞌulal yet oj jin bꞌitnoj ey jaach, yutol jix jin ja coloꞌ.

24 Oj walel ja watxꞌilal. Jaꞌ ebꞌ chi yoche ey tzet chin ioni, jix eyqꞌuey ebꞌ, jix cancan ebꞌ yin qꞌuixwilal.