2 Jaxca wal chi yun sqꞌueya mucꞌ xol kaꞌeꞌ, queytuꞌ chi yun sqꞌueya ebꞌ, jaxca chi yun yulitoj noꞌ ixcabꞌ xol kꞌakꞌ, queytuꞌ chi yun sqꞌueya ebꞌ chi unen spenail sattaj Dios.

3 Jal pax ebꞌ watxꞌ sbꞌeybꞌal xin, caw oj tzala a scꞌul ebꞌ sattaj Dios. Tol oj a tꞌujna ebꞌ yu tzalacꞌulal.

4 Bꞌitnojonwej tet Dios, yutol miman yeloc apnoj sbꞌi. Kalwej watxꞌ kꞌane tet Jehová, Naj tol chi ecꞌ yibꞌan asun. ¡Kakꞌwej tzalabꞌoj cu cꞌul yin Jehová, tzalajonwej sattaj Naj!

5 Jaꞌ Dios, caan ecꞌ bꞌey scalubꞌal yet eyilal, jaꞌton eyoc sMamoj ebꞌ cꞌamxa smam, sColomal cꞌal pax ebꞌ ix ix camnajxa yichamil.

6 Jaꞌ ebꞌ mebꞌa, jaꞌ Dios chi akꞌon bꞌey chi skeꞌ scaey ecꞌ ebꞌ. Jaꞌ ebꞌ eyoc yul preso chi jajcha el ebꞌ yu, chi lawi tuꞌ, chi iꞌle a can ebꞌ. Jaxa ebꞌ pena chi yute sbꞌa tet, jaꞌ bꞌey txꞌotxꞌ cusiltaj txꞌotxꞌ oj caey ecꞌ ebꞌ yu.

7 Jaach cu Diosal, jaꞌ yet jix jaach eltej sattaj ebꞌ ja conobꞌ, catuꞌ jix jaach bꞌey yetoj ebꞌ bꞌey txꞌotxꞌ cusiltaj txꞌotxꞌ,

8 chi bꞌilwi txꞌotxꞌ txꞌotxꞌ tiꞌ ja wu, chi tit yaxnabꞌ bꞌey satcan, chi bꞌilwi txꞌotxꞌ wonan Sinaí ja sattaj, jaach cu Diosal.

9 Jaach cu Diosal, manxa jantajoj nabꞌ cha waeytej, yet watxꞌ chi yaaxbꞌi yili sat txꞌotxꞌ cusiltaj txꞌotxꞌ junelxa.

10 Jaꞌton tituꞌ jix eecꞌ ebꞌ ja conobꞌ jaach cu Diosal; yu ja watxꞌcꞌulal yuxan jix ja wakꞌ sloꞌbꞌe ebꞌ mebꞌa.

11 Jaach Kaawil, jaꞌ yet jix ja waloni, tol jix eyqꞌuey ebꞌ ja cajat. Ecꞌal ebꞌ ix ix, jix alon jaxca tiꞌ:

12 ¡Lalan yela ebꞌ naj rey yetoj ebꞌ soldado! ẍi ebꞌ ix. Jaꞌ tzet jix bꞌet tokꞌle ecꞌ tet ebꞌ chi ela tuꞌ, lalan spoꞌon ecꞌ ebꞌ ix tzettaj yetal xol-laj na,

13 jaꞌton wan yechel noꞌ uch bꞌonbꞌil xicꞌ yetoj chꞌen plata cꞌal yetoj chꞌen oro. ¿Caxcꞌal ma jex toj yin jowal, jix jex cancan xol noꞌ meꞌ, jix je yiꞌ pax je yet?

14 Jaꞌ yet jix ela ebꞌ naj rey sattaj Naj chi cꞌal skeꞌ yu masanil, txequel yili jaxca yet chi tit sajbꞌacom yibꞌan txꞌotxꞌ wonan Salmón?

15 ¡Jaꞌ txꞌotxꞌ wonan yet Basán! ¡Caw naat yea steel txꞌotxꞌ! ¡Caw ecꞌal wanxa niẍtej wonan eya bꞌey sjolomlaj atoj txꞌotxꞌ tuꞌ!

16 Mac jex caan jex bꞌey sjolomlaj wonan tuꞌ, ¿tzet yu, yuxan chi chichon je cꞌul yet che yilon eytej jun txꞌotxꞌ wonan yet Jehová, yutol jaꞌ sicꞌnen eloj yet chi oc can yetoj? Jaꞌ tituꞌ oj caey ecꞌ Dios.

17 Jaꞌ Dios, yin xa smillonal sbꞌisil scarruaje yet jowal. Jaꞌ bꞌey Sinaí jix tit yul scarruaje, catuꞌ jix jul bꞌey scalubꞌal.

18 Jaach jin Diosal, jaꞌ yet jix jaach atoj bꞌey satcan tuꞌ, jix ja wiꞌon atoj ebꞌ eyoc yul preso. Jix ja chaꞌon saꞌbꞌeal tet ebꞌ ánima. Jix yakꞌon cꞌal pax yet ebꞌ pena chi yute sbꞌa ey jaach. Jaach Jehová cu Diosal, jix jaach aapnoj caan tituꞌ.

19 Al-le ojabꞌ watxꞌ kꞌane tet Naj Kaawil, jaꞌton cu Diosal, cu Colomal pax oj, tol teynebꞌil jon yu Naj junjun cꞌu.

20 Jaach cu Diosal, Colwawom jaach toni. Jaꞌ Jehová Kaawil toni, chi skeꞌ cꞌal pax yu cu scolon el tet camich.

21 Jaꞌ Dios oj makꞌon poꞌo sjolom ebꞌ chi jowi oc yin, jaꞌton sjolom ebꞌ chi naꞌnon scꞌul yunen spenail.

22 Jaꞌ Dios Kaawil chi alon jaxca tiꞌ: Jaꞌ bꞌey Basán oj jex wakꞌ meltzotej. Jaꞌ bꞌey jaꞌ mar naat yich oj jex wakꞌ titoj.

23 Yet watxꞌ oj je bꞌon je yajan yu ẍiqꞌuil ebꞌ je cajat, catuꞌ oj slekꞌon a noꞌ je txꞌiꞌ.

24 Jaach Dios, cu Diosal jaach, cu Reyal jaach; txequel chi yun stoo bꞌululoj ebꞌ ánima bꞌey ja calubꞌal. Ipan stoo bꞌululoj ebꞌ yu yiꞌon a can ja bꞌi ebꞌ.

25 Bꞌabꞌel ebꞌ chi bꞌitni, tzajan oc ebꞌ chi tenon wan mitxꞌkꞌabꞌe yet bꞌit. Jaxa snan xol ebꞌ, jatuꞌ eyoc ebꞌ ix kꞌopo chi tenon wan chꞌen patxquiltaj chꞌen chi yij pandereta.

26 ¡Kalwej watxꞌ kꞌane tet Dios, Naj Yaaw! ¡Kalwej watxꞌ kꞌane tet Naj, jex Israel tol yaman jex ecꞌoj!

27 Bꞌabꞌel stoo ebꞌ yicꞌaal Benjamín sattaj ebꞌ, jaꞌton naj tzunan unin. Tzajan cꞌal pax oc ebꞌ yaaw yet Judá, jaꞌjun cꞌal pax ebꞌ yaaw yet Zabulón cꞌal ebꞌ yet Neftalí.

28 Jaach cu Diosal, jaxca jix yun ja txꞌoxon el ja wipal yet yalantoj, quey ojabꞌ tuꞌ chi yun ja txꞌoxon el ey jon tinaniꞌ,

29 yu swatxꞌiloj ja templo bꞌey Jerusalén, jaꞌton bꞌey chi yiꞌtej saꞌbꞌeal ebꞌ naj rey ey jaach.

30 Tenchane ebꞌ a Egipto, yutol laan ebꞌ jaxca sjowal noꞌ noꞌ ey xol-laj teꞌ aa. Tenchane jun bꞌulan ebꞌ caw jow jaxca noꞌ ey yuneꞌ, jaꞌton wan mimej conobꞌ chi stecꞌbꞌa sbꞌa yakꞌon jowal, yutol asanne bꞌeomal chi yoche oc ebꞌ. Ujte sajlem ebꞌ mimej conobꞌ chi yoche chi yakꞌ jowal.

31 Jaach cu Diosal, oj tit ebꞌ a Egipto yakꞌ stoolabꞌal ey jaach. Oj smoobꞌa a skꞌabꞌ ebꞌ a Etiopía ey jaach.

32 ¡Jex tol yaaw je yeoc bꞌey junjun conobꞌ bꞌey sat txꞌotxꞌ txꞌotxꞌ tiꞌ! Bꞌitnanwej tet Dios, yutol Kaawil Naj,

33 jaꞌton Naj chi bꞌeyecꞌ yibꞌantoj satcan, jaꞌton satcan tol eyxa cꞌaltaꞌ yet yichbꞌanil. Abꞌwej yipal yel yaw yul snukꞌ, jaꞌton Naj Yaaw tol ey yipalil.

34 Chim skeꞌ je yalon el yipalil Dios. Naj eyecꞌ yipalil kibꞌan jaon sconobꞌ jon tiꞌ. Jaꞌ sjelanil eyecꞌ bꞌey satcan.

35 Caw qꞌueyubꞌtaj yili bꞌey scalubꞌal cu Diosal. Chi yakꞌon yipalil kibꞌan jaon conobꞌ Israel jon tiꞌ.

¡Al-le ojabꞌ watxꞌ kꞌane ey jaach cu Diosal!