2 Ipan jin paxey yich jun jaꞌ jaꞌ naat yich chi wabꞌe, cꞌamxa bꞌey chi apni oc tecꞌan wajan. Jaxca tol tuxa jix jin ey apnoj bꞌey snaatil yich jaꞌ, jaxca tol lalanxa jin yijon bꞌey jaꞌ.

3 Caw chi poꞌotoj yul jin nukꞌ yel waw. Yaꞌ xa yul jin nukꞌ. Tuxa jix cꞌuumbꞌi el sbꞌakꞌ jin sat yu jin majon sjul jin Diosal.

4 Jaxa ebꞌ cꞌam chin ocheni, caw miman sbꞌisil ebꞌ, laan sbꞌisil ebꞌ jaxca xil jin jolom, caxcꞌal cꞌam tzet chi wute ebꞌ. Caw miman sbꞌisil ebꞌ cꞌam chin ocheni, chi yoche ebꞌ chin yakꞌ camoj. Chi yoche ebꞌ chi wakꞌ meltzo tzetyetal tol man welkꞌanoj.

5 Jaach jin Diosal, ja wotaj jaxca wal tol cꞌam jin naꞌbꞌal, cꞌam chi skeꞌ webꞌan el wan jin penail tuꞌ ey jaach.

6 Jaach Jehová jin Diosal, yaaw jaach yibꞌan masanil, jaꞌ ebꞌ chach aon oc yipoj scꞌul, man oj qꞌuixwoj a ebꞌ yu jin penail. Jaach cu Diosal jaon Israel jon tiꞌ, cꞌam ojabꞌ chi tac can a scꞌul ebꞌ yu jin penail, jaꞌton ebꞌ chi jul yiꞌey sbꞌa ey jaach yin masanil scꞌul.

7 Yu jin camcꞌulal ja win, yuxan chi wakꞌ techa wan bꞌuchwal kꞌane chi yal ebꞌ win. Cꞌamxa chi yal jin cꞌul chin txꞌox jin sat yu qꞌuixwilal.

8 Jaxca wal tol man otajbꞌiloj jin yu ebꞌ wuẍtaj, ilaꞌ tol junne pax jin txutx yetoj ebꞌ.

9 Caw chi oc pitzꞌan yin jin cꞌul yu jin yaꞌilnen ja calubꞌal, jaꞌ yet chi bꞌuchwa ebꞌ ja win, jain jun chi wabꞌ cꞌal pax syaꞌil.

10 Jaꞌ yet chin okꞌi, cꞌal yet chi wijlen nocha jin bꞌa, jaꞌ yet tuꞌ chi bꞌuchwa ebꞌ win.

11 Ta eel pichile chi waocoj, chi a bꞌulna ebꞌ jin stzeeni.

12 Jain xacꞌal chin yaloꞌtane ebꞌ yet chi ey chotan ebꞌ bꞌey spuertail conobꞌ, chin yakꞌon bꞌina ebꞌ ukꞌem an xol sbꞌit.

13 Jal jin jain tiꞌ, jaach jin Diosal, jaꞌ ey jaach chi wal jin bꞌa. ¡Jaach jin Diosal, ocan wetoj tinaniꞌ! ¡Yu ja miman camcꞌulal, takꞌwan ey jin xin! Yutol chach colwa wetoj, yuxan ocan wetoj tinaniꞌ.

14 Col jin el yul skꞌabꞌ ebꞌ cꞌam chin ocheni. Cꞌam ojabꞌ chin ja bꞌejtoj jaxca xol stzokꞌom, ma jaxca xol jaꞌ jaꞌ naat yich.

15 Cꞌam ojabꞌ chin ja chaꞌ ijletoj yu jaꞌ jaꞌ. Cꞌam ojabꞌ chin ja chaꞌ paxey xol snaatil yich jaꞌ, catuꞌ chin qꞌueycan a tituꞌ.

16 Jaach Jehová jin Diosal, pajtze jin txa. Watxꞌ jaach toni, ey cꞌal ja camcꞌulal yin masanil. Ocan tꞌanan win yu ja miman camcꞌulal.

17 Cꞌam ojabꞌ chin ja wintajne el jain ja chejabꞌ jin tiꞌ. Takꞌwan ey jin yin eymanil, yutol ey smey bꞌey ey jin ecꞌoj.

18 Col jin eloj, titan jin cꞌatan, col jin el tet ebꞌ chi jowi oc win.

19 Yutol ja wotaj ebꞌ chi alon bꞌuchwal kꞌane win, jix jin etex el yu ebꞌ, qꞌuixwiltajxa weocoj, manxa animaoj jin yul sat ebꞌ. Ja wotaj wal mactxequel ebꞌ chi jowi oc win.

20 Caw chi etextoj jin naꞌbꞌal yu bꞌuchwal kꞌane chi yal ebꞌ, caw chi tac jin cꞌul, cꞌamxa wip. Naꞌbꞌacꞌal jix jin sey mactxequel chi akꞌon smimanil jin cꞌul, cꞌal mac chi okꞌ scꞌul win.

21 Jix yaeytoj veneno ebꞌ xol jin loꞌbꞌe, jaꞌ yet chi taj jin tiꞌ, vinagre jix yakꞌ ebꞌ wuqꞌue.

22 Jaꞌ jun skꞌin ebꞌ chi yaoc tuꞌ, meltzo ojabꞌ oc yin ebꞌ jaxca junoj yaal. Eyqꞌuey ojabꞌ ebꞌ yin jun skꞌin tuꞌ.

23 Cꞌam ojabꞌxa chi skeꞌ yilwan ebꞌ, catuꞌ bꞌilwoj ojabꞌ a xubꞌ ebꞌ yu xiwcanil.

24 Aoc sjowal ja cꞌul yibꞌan ebꞌ. Michꞌcha ojabꞌ ebꞌ yu sjowal ja cꞌul.

25 Can ojabꞌ sna ebꞌ yin cusiltaj txꞌotxꞌ. Cꞌam ojabꞌxa mactxequel chi caey ecꞌ bꞌey ey ebꞌ tuꞌ.

26 Yutol chin yujte ecꞌ ebꞌ jain chin ja wakꞌ cus tiꞌ, catuꞌ chi bꞌuchwa ebꞌ win jain jix jin ja wakꞌ yasoj tiꞌ.

27 Tzꞌajan ojabꞌ chi yun ja wakꞌon spaj tet ebꞌ, jaxca smooal ẍaꞌon spaj junjun ebꞌ yu spenail tuꞌ. Cꞌam ojabꞌxa yalon yet ebꞌ yin colbꞌanile cha wakꞌa.

28 Iꞌcan el sbꞌi ebꞌ yul an libro yet kꞌinale. Cꞌam ojabꞌxa cha tzꞌibꞌe ey sbꞌi ebꞌ yul slibroal yet ebꞌ watxꞌ sbꞌeybꞌal yul ja sat.

29 Jaxa jin jain tiꞌ xin, tol yaꞌ jin ey, catuꞌ ey jin oc yin cuscꞌulal. Iꞌ jin a waanoj, col jin el jaach jin Diosal.

30 Jaach jin Diosal, oj jin bꞌitnoj yu walon watxꞌ kꞌane ey jaach, oj jaach jin bꞌitne yu walon yu diosalil ey jaach.

31 Jaach Jehová, oj ton tzala a ja cꞌul yet oj jin bꞌitnoj ey jaach, yintaj pax junoj noꞌ wacax eyoc yucꞌaꞌ cꞌal yiskꞌaj chi wakꞌ ey jaach yin xaambꞌalil.

32 Jaꞌ yet oj il-le jun tiꞌ, caw oj tzala a scꞌul ebꞌ eyoc yin cuscꞌulal. Ta tol oj yal sbꞌa ebꞌ tet Jehová, oj akꞌle stecꞌanil snaꞌbꞌal ebꞌ.

33 Chi yabꞌ Jehová tzet chi yal ebꞌ mebꞌa, cꞌam chi yintajne el ebꞌ majan oc yul preso.

34 Masanil tzetyetal iquis bꞌey satcan cꞌal bꞌey sat txꞌotxꞌ txꞌotxꞌ tiꞌ, yetoj cꞌal jantaj tzet ey yul jaꞌ mar, yal ojabꞌ watxꞌ kꞌane ebꞌ tet Dios.

35-36 Jaꞌ Dios oj colon el conobꞌ Sión, catuꞌ oj scaꞌ waꞌnen a conobꞌ yul yet Judá junelxa. Jaꞌ yuninal wan yakꞌomal servil ebꞌ, oj caey ecꞌ ebꞌ bꞌey wan conobꞌ tuꞌ. Jaꞌ tituꞌ oj caey ecꞌ ebꞌ, catuꞌ oj oc ebꞌ a conobꞌal tituꞌ. Jaꞌ ebꞌ chi camcꞌulnen Dios oj caey ecꞌ ebꞌ tituꞌ.