Bꞌitnoj Ojabꞌ Ebꞌ Conobꞌlaj Tet Dios
67
Jaach cu Diosal, akꞌ ja watxꞌcꞌulal ey jon.Okꞌ ojabꞌ ja cꞌul kin jon, ẍaꞌ ojabꞌ ja cꞌul jon ja teyneni.
2 Yet watxꞌ, jaꞌ masanil ebꞌ nacionlaj bꞌey yul yibꞌankꞌinal tiꞌ, oj yotajne el ebꞌ tzet chi yoche ja cꞌul, cꞌal colbꞌanile cha wakꞌa.
3 Jaach cu Diosal, bꞌitnoj ojabꞌ junjun conobꞌ ey jaach. ¡Masanil ebꞌ conobꞌ, bꞌitnoj ojabꞌ ebꞌ ey jaach xin!
4 ¡El ojabꞌ yaw junjun conobꞌ yin tzalacꞌulal, yutol cha wakꞌ cuenta ebꞌ conobꞌ yin sjichanil! ¡Jaach ton cha wijbꞌa ebꞌ conobꞌ bꞌey yul yibꞌankꞌinal tiꞌ!
5 ¡Jaach jin Diosal, bꞌitnoj ojabꞌ ebꞌ conobꞌlaj ey jaach! ¡Masanil ojabꞌ ebꞌ conobꞌlaj, chi bꞌitni ey jaach!
6 Jaxa txꞌotxꞌ txꞌotxꞌ, oj yakꞌ sat awo sat txꞌotxꞌ. Oj yakꞌ syaaxilal Dios ey jon.
7 ¡Yakꞌ ojabꞌ syaaxilal Dios ey jon! ¡Ey ojabꞌ yeloc apnoj Dios bꞌey masanil yul yibꞌankꞌinal tiꞌ!