Qꞌueyubꞌtaj Xacꞌal Yili Smulnail Dios
66
Je masanil jex ánima caan bꞌey yul yibꞌankꞌinal tiꞌ,bꞌitnanwej tet Dios yin tzalacꞌulal.
2 Bꞌitnewej smimanbꞌilal Dios. Bꞌitnewej bꞌit manxa jantajoj swatxꞌil yalon skꞌaneal.
3 Alwej tet Dios jaxca tiꞌ: Yel xacꞌal tol qꞌueyubꞌtaj yili tzet jix ja waꞌne. Ja sattaj chi eyqꞌuey ebꞌ chi jowi oc ja win yetoj ja wipalil.
4 Masanil ebꞌ ánima yul yibꞌankꞌinal tiꞌ chi yiꞌey sbꞌa ebꞌ ey jaach, catuꞌ chi sbꞌitnen ja bꞌi ebꞌ.
5 Titanwej, ilwej tzet jix swaꞌne Dios. Qꞌueyubꞌtaj xacꞌal yili tzet chi yunne, yu cu watxꞌiloj jaon ánima jon tiꞌ.
6 Ocnaj jaꞌ mar yin tajin txꞌotxꞌal yu Dios. Jaꞌ bꞌey snan jaꞌ miman mar tuꞌ jix bꞌey ecꞌtoj ebꞌ kichmam yetoj yajan. Kakꞌwej tzalabꞌoj cu cꞌul yin Dios.
7 Jaꞌ yetoj yipalil Dios chi yakꞌon yaawil. Tꞌanan cꞌal oc Naj yin junjun conobꞌ, yet watxꞌ cꞌamxa chi meltzo oc ebꞌ penawom yin ebꞌ.
8 ¡Jex ánima bꞌey junjun conobꞌ, alwej je watxꞌ kꞌane tet cu Diosal! ¡Abꞌle ojabꞌ yoc je bꞌit yu je yalon je watxꞌ kꞌane tet Naj!
9 Yutol jaꞌ chi akꞌon cu kꞌinal, cꞌam chi yoche tol chi cu eyqꞌueyi.
10 Jaach cu Diosal, ja wotaj cu naꞌbꞌal jon. Jaxca chi yun sajbꞌanele chꞌen plata, queytuꞌ jix jon ja wute.
11 Jix jon ja wakꞌ eyqꞌuey yul yaal, yel cꞌal tol al jun ijatz jix ja waoc kibꞌan jon.
12 Jaꞌ ebꞌ comon ánima jix ja wakꞌbꞌalne cu stecꞌon ey jon. Jix cu ecꞌ eltoj xol kꞌakꞌ, cꞌal xol jaꞌ mimej jaꞌ. Yin xa slawubꞌal jix jon ja wiꞌontoj bꞌey ey tzalacꞌulal.
13 Oj jin octoj yul ja templo, catuꞌ oj wakꞌon jin xaambꞌal ey jaach. Queyton tuꞌ oj yun wakꞌon eloc bꞌey jix wakꞌcan jin tiꞌ ey jaach,
14 jaꞌton tzet jix wal ey jaach yet ey jin oc yin syaꞌilal.
15 Jaꞌ noꞌ noꞌ caw bꞌakꞌech oj wakꞌ tzꞌaꞌ bꞌey jun yet xaambꞌal. Oj wakꞌ noꞌ wacax cꞌal noꞌ icham chiw yetoj cꞌal noꞌ icham meꞌ yin xaambꞌal ey jaach, jaꞌton wan chi ẍaꞌ ja cꞌul.
16 Titanwej je masanil, mac jex ey yeloc apnoj Dios yul je sat. Majwej je yabꞌ tzet oj walaꞌ, oj wal ey jex jantaj swatxꞌcꞌulal Dios ey jin.
17 Jix jin kꞌan scolwal wetoj, catuꞌ jix walon watxꞌ kꞌane tet.
18 Ta ma jin naꞌ jin bꞌa yin jin penail, ma cꞌaltaꞌ yal scꞌul Naj Kaawil jix yabꞌ tzet jix walaꞌ.
19 Jal xin, tol jix yabꞌ Naj tzet jix walaꞌ, catuꞌ jix spajtzen jin txa.
20 ¡Al-le ojabꞌ watxꞌ kꞌane tet Dios, yutol ma yintajne el jin txa, caw jix yakꞌ cꞌal scamcꞌulal ey jin!