2 Masanil ebꞌ ánima chi jul ey jaach, yutol cha wabꞌ cꞌal tzet chi yal ebꞌ yin xa.

3 Jaꞌ jantaj cu penail jon, jaꞌ chi cu akꞌon eyqꞌuey jon, jaxa jaach cha joꞌqꞌuey cu penail.

4 Caw tzalacꞌulal yet mactxequel tol jaach jix ja sicꞌ eloj, yet watxꞌ chi cu eecꞌal ecꞌ bꞌey ja templo. Watxꞌ xacꞌal keoc yu swatxꞌilal tzet ey bꞌey ja templo, yutol snail eyilal yeocoj.

5 Jaach Dios cu Colomal jaach, cha pajtze cu txa yutol qꞌueyubꞌtaj tzet cha wun yetoj sjichanil. Masanil ebꞌ ánima caan sat txꞌotxꞌ txꞌotxꞌ tiꞌ, cꞌal ebꞌ caan skꞌaxepal ecꞌtoj jaꞌ mar, oj jaach yaoc ebꞌ yipoj scꞌul.

6 Caw ey yip jix yun ja waꞌnen can txꞌotxꞌ mimej wonan yetoj ja wipal.

7 Jaach ton cha mitxꞌoc tucan jaꞌ mar yet chi bꞌilwi sat jaꞌ, catuꞌ cha tenon oc numna ebꞌ ánima yet ey jowal xol ebꞌ conobꞌ.

8 Jaꞌ ebꞌ ánima caan bꞌey junojxa conobꞌ caw naat, chi bꞌilwi a ebꞌ ja sattaj yutol qꞌueyubꞌtaj xacꞌal yili tzet cha wunne. Ja wu, yuxan chi oc aw yin tzalacꞌulal bꞌey chi aol cꞌu, masantaꞌcꞌal bꞌey chi too cꞌu.

9 Ey jaach cꞌal oc ja wilon yul yibꞌankꞌinal tiꞌ, cha waeytej nabꞌ yibꞌan txꞌotxꞌ txꞌotxꞌ, catuꞌ cha wakꞌon chꞌibꞌ yawoal sat txꞌotxꞌ. Cha wakꞌon chꞌibꞌ ixim tiriw yetoj jaꞌ jaꞌ chi el sne. Queyton wal tuꞌ chi yun ja waꞌnen a yili sat txꞌotxꞌ txꞌotxꞌ tiꞌ.

10 Jaach cha wakꞌ yaaxbꞌoj sat txꞌotxꞌ txꞌotxꞌ, catuꞌ cha wakꞌon noel sjobꞌeal txꞌotxꞌ yu jaꞌ, catuꞌ cha wakꞌon cꞌuumbꞌoj txꞌotxꞌ yu yaax nabꞌ, cha wakꞌon ja yaxilal yibꞌan sat yawoal txꞌotxꞌ.

11 Manxa jantajoj sat awo chi yakꞌ junjun abꞌil ja wu, jaxa asun jaꞌ chi oc yin nabꞌil.

12 Chi yaaxbꞌi el an cꞌultaj bꞌey txꞌotxꞌ cusiltaj txꞌotxꞌ, jaxa txꞌotxꞌ tzalquiltaj watxꞌ xacꞌal yili txꞌotxꞌ.

13 Jaꞌ satlaj acꞌal chi noel yu noꞌ meꞌ, jaxa jobꞌelaj chi noel yu ixim tiriw, catuꞌ chi bꞌitni masanil ebꞌ ánima, chi el yaw ebꞌ yu tzalacꞌulal.