2 Col jin el tet ebꞌ chi unen spenail, caxcꞌal ey tzetyetal chi snaꞌ ebꞌ win yin ewantajil. Col jin el yul skꞌabꞌ ebꞌ penawom, yutol pena cꞌal chi snaꞌ ebꞌ win.

3 Laan stiꞌ ebꞌ jaxca chi yun snijle yee chꞌen espada. Jaꞌ pena kꞌane chi yal ebꞌ win, laan jaxca junoj chꞌen julbꞌal.

4 Yin xacꞌal ewantajil chi yun sjulwatoj ebꞌ yin ebꞌ cꞌam penail, cꞌam niꞌoj xiwcꞌulal ebꞌ.

5 Jacꞌal oc ebꞌ chi yiptzele sbꞌa yunen spenail. Chi naꞌnon yecꞌ snaꞌbꞌal ebꞌ yaon ey yaal yin ewantajil. Cꞌam mactxequel chi ilon ebꞌ yaloni.

6 Chi cam wal snaꞌon ebꞌ tzet chi yun swaꞌnen junoj spenail. Watxꞌ xacꞌal yeoc yu ebꞌ. Jaꞌ tzetyetal chi snaꞌ ebꞌ tuꞌ, ewantaj yeoc yin snaꞌbꞌal ebꞌ.

7 Jaꞌ Dios oj akꞌon yasoj ebꞌ yetoj sjulbꞌal, ey wal oc ebꞌ yin qꞌueycꞌulal catuꞌ oj akꞌle yasoj ebꞌ.

8 Jaꞌ skꞌane ebꞌ oj akꞌon eyqꞌueyoj. Jaxa mactxequel oj ilontej ebꞌ, oj bꞌuchwa can yin ebꞌ.

9 Queyton tuꞌ oj yun masanil ebꞌ ánima tet Dios. Masanil tzet waꞌnebꞌil yu Dios oj yalel ebꞌ. Masanil cꞌal tzet jix yun Dios oj snaꞌoꞌtane ebꞌ.

10 Jaꞌ ebꞌ ánima watxꞌ sbꞌeybꞌal oj yakꞌ tzalabꞌoj scꞌul ebꞌ yin Dios, catuꞌ oj seyon ecꞌ scolwal Dios ebꞌ. Masanil ebꞌ ánima watxꞌ snaꞌbꞌal oj caey ecꞌ ebꞌ yin watxꞌcꞌulal.