Jaꞌ Dios Chi Akꞌon Tzalacꞌulal Tet Ebꞌ Ánima
Jaꞌ sbꞌit naj David yet eyecꞌ bꞌey txꞌotxꞌ cusiltaj txꞌotxꞌ yul yet Judá.
63
¡Jaach jin Diosal, tucꞌaltaꞌ jin Diosal jaach!Chach woche yetoj masanil jin cꞌul, chach woche yetoj jin pixan, jaxca wal yochen nabꞌ txꞌotxꞌ tajin txꞌotxꞌ.
2 Chi yoche jin cꞌul chi wil ja win bꞌey ja calubꞌal, chi yoche jin cꞌul chi wil ja wipalil cꞌal ja tzejejial.
3 ¡Jaꞌ ja camcꞌulal, yel xacꞌal tol miman yeloc apnoj yintaj wiquisal! Yu jun tuꞌ, oj jin bꞌitnoj cꞌal ey jaach.
4 Masanil tiempo yet iquis jin ecꞌoj, oj wal jin watxꞌ kꞌane ey jaach, catuꞌ oj wiꞌon a jin kꞌabꞌ yet oj jin txaloj ey jaach.
5 Watxꞌ xacꞌal oj yun can el jin cꞌul yu, jaxca junoj mactxequel chi yakꞌ snaꞌbꞌal sloꞌon junoj watxꞌ loꞌbꞌe; oj jaach jin bꞌitne yin tzalacꞌulal.
6 Jaꞌ yet akꞌbꞌalil, yet telan jin xa eyoj, chach jin naꞌontej, catuꞌ ey jaach cꞌal ecꞌ yin jin naꞌbꞌal.
7 Jaach ton chach colwa wetoj, yuxan cꞌam tzet chin naꞌ jaxca noꞌ yuneꞌ caẍlan chi scol sbꞌa yalan xicꞌ xutx.
8 Junne wakꞌon ja wetoj sicꞌlebꞌil. Cꞌam chin ja bꞌejcan yetoj ja watxꞌ kꞌabꞌ.
9 Jaꞌ ebꞌ chi yoche scꞌul chin yakꞌ camoj, oj tojcan ebꞌ yul sjolanil ebꞌ camom.
10 Oj akꞌle cam ebꞌ yu chꞌen espada, jaxa noꞌ ooj, oj chiꞌon eytoj ebꞌ.
11 Jal pax jin jain rey jin tiꞌ, oj wakꞌ tzalabꞌoj jin cꞌul yin Dios. Oj bꞌitnoj masanil ebꞌ chi yakꞌ bꞌina Dios yin bꞌey jix yakꞌ can stiꞌ, jal pax ebꞌ lekꞌtiꞌ xin, tuxa cꞌal oj qꞌueycan a scꞌul ebꞌ.