2 Asanne Naj chin colon eloj, jaꞌ chi oc pax weneloj. Cꞌam cꞌaltaꞌ bꞌakꞌin oj jin akꞌle eyqꞌueyoj, yutol jaꞌ Dios eyoc jin Colomaloj.

3 ¿Bꞌakꞌin oj jex oc bꞌulna win, catuꞌ oj jin je yakꞌon eyqꞌuey je yaloni? Jaxca xacꞌal junoj icham na tol tuxa chin ecꞌ bꞌulnaoj, ma jaxca icham colal tuxa chi ecꞌ wejnaoj.

4 Asanne tzet chi yun yetex el jin bꞌinabꞌilal che naoꞌtane. Asanne naꞌo a kꞌane che yoche. Che tzꞌaj je yal watxꞌ kꞌane ey jin, jal pax yin je naꞌbꞌal xin, chin je yintajne can eloj.

5 Asan yin Dios chi ilcha watxꞌcꞌulal wu. Asanne Naj eyoc yipoj jin cꞌul.

6 Asan Naj chin colon eloj, catuꞌ chi oc cꞌal pax weneloj. Man oj jin eyqꞌueyoj, yutol jaꞌ Naj eyoc jin Colomaloj.

7 Jaꞌ yin Dios chi tit jin colbꞌanil, yuxan ey weloc apnoj. Jaꞌ eyoc weneloj cꞌal jin Colomaloj.

8 Jex wet conobꞌ, asanne Dios che yaoc yipoj je cꞌul, txalanwej tet yin masanil je cꞌul, yutol cu Colomal yeoc Naj.

9 Cꞌam chi skeꞌ kaon oc ebꞌ ket animail yipoj cu cꞌul, caxcꞌal mebꞌa ma bꞌeom ebꞌ. Laan ebꞌ jaxca junoj tzetyetal cꞌam yalil chi oc yul echbꞌal. Caxcꞌal junne chi kute ey ebꞌ scawanil, cꞌam cꞌaltaꞌ niꞌoj yeloc apnoj ebꞌ.

10 Cꞌam ojabꞌ che yaoc yin je cꞌul yu je yetnen je yet animail; cꞌam ojabꞌ chex too yin elkꞌan. Ta kꞌuxan chex oc bꞌeomal, cꞌam ojabꞌ pax che yaoc je bꞌeomal tuꞌ yipoj je cꞌul.^a

11-12 Caw ecꞌal el jix wabꞌ yalon Dios jaxca tiꞌ: Jain Dios jin tiꞌ, masanil chi skeꞌ wu, catuꞌ ey cꞌal jin camcꞌulal. Jain chin pajtze tet junjun ánima, jatacꞌalaꞌ tzet chi el yunen junjun ebꞌ, ẍi Dios.