Naꞌbꞌacꞌal Chi Smeyne Sbꞌa Ebꞌ Ánima Pena Sbꞌeybꞌal
Jaꞌ sbꞌit naj David yet jix jul naj Doeg a Edom, catuꞌ jix yalon yabꞌ Saúl tol jix ecꞌ David bꞌey sna naj Abimélec.
52
Jaach jelan yin jowal, ¿tzet yuxan cha meyne ja bꞌa yin spenail?¡Jaꞌ scamcꞌulal Dios ey cꞌal ecꞌ yin tobꞌalkꞌinal!
2 Asanne cꞌal spenail cha woche cha wunne. Jaꞌ ja tiꞌ laan jaxca junoj chꞌen nawax caw eel yee, yutol asanne lekꞌtiꞌal kꞌane cha walaꞌ.
3 Jaꞌ spenail chi yoche ja cꞌul yintaj swatxꞌil; jaꞌ kꞌane man yeloj cha woche yintaj kꞌane yel.
4 Jaach alom lekꞌtiꞌal kꞌane, jaꞌ kꞌane yin etne ánima cha woche.
5 Yu jun tuꞌ, jaꞌ Dios oj jaach qꞌueyon el yin junelne. Oj oc mitxꞌan ja win, catuꞌ oj jaach yiꞌon can eltej yul ja na, oj yiꞌon el ja kꞌinal.
6 Jaꞌ ebꞌ jijem tet Dios oj yil jun tiꞌ ebꞌ, catuꞌ oj xiw ebꞌ tet Naj, asan xin, oj bꞌuchwa ebꞌ yin jun winaj tuꞌ.
7 Oj yalon ebꞌ jaxca tiꞌ: Ilwej chi yun yeloc ebꞌ naj ma yaoc Dios yipoj scꞌul tiꞌ, yutol asanne sbꞌeomal jix yaoc yipoj scꞌul, catuꞌ ey cꞌal oc snaꞌbꞌal yin spenail.
8 Jain tiꞌ, laan jin jaxca teꞌ olivo yaax yili xaj bꞌey snail scalubꞌal Dios. Asan scamcꞌulal Naj oj wa cꞌal oc yipoj jin cꞌul.
9 Jaach jin Diosal, tol oj wal cꞌaltaꞌ yu diosalil ey jaach yu ja watxꞌcꞌulal win, chach wa cꞌal oc yipoj jin cꞌul, yutol watxꞌ jaach. Oj walel ja kꞌaneal sattaj ebꞌ ja conobꞌxa yeocoj, yutol watxꞌ jaach cꞌaltaꞌa.