Jaach Jin Diosal, Okꞌ Ojabꞌ Ja Cꞌul Win
Jaꞌton sbꞌit naj David yet jix tzule yu Natán, jun ẍejabꞌ Dios, yet jix oc ix Betsabé yistiloj, jaꞌton ix yistil camom Urías.
51
Jaach jin Diosal caw ey ja camcꞌulal,yuxan okꞌ ojabꞌ ja cꞌul win an. Joꞌqꞌuey masanil jin penail yu ja miman camcꞌulal.
2 Txꞌa jin el yin masanil jin penail. Sajbꞌane jin el xol jin mul.
3 Yel toni jix oc jin penail, caw ecꞌnaj chi wute jin bꞌa ey jaach; cꞌam chi too qꞌueycꞌulal jin penail junoj txolan ja wu.
4 Jix oc jin penail ey jaach. Jix wun tzetyetal caw pena yul ja sat. Yu jun tuꞌ, yuxan smoo cha waoc jin yaꞌilal; cꞌam chi skeꞌ yal-le pena kꞌane ja win yet chin ja wakꞌon cuenta.
5 Caw yel, pena jin yet tax cꞌal waalubꞌal. Penawom jin xa yet tax ijbꞌil jin to oc yu jin txutx.
6 Caw ey ja camcꞌulal yin mactxequel jijem chi yute sbꞌa ey jaach. Yuxan akꞌ cꞌal ja jelanilal ey jin an.
7 Iꞌcan el jin penail, yet watxꞌ chin sajbꞌican eloj. Txꞌa jin eloj, yet watxꞌ saj xacꞌal chi wun can jaxca yili sajbꞌacom.
8 Akꞌ chꞌibꞌ jin tzalacꞌulal. Akꞌ tzala jin cꞌul junelxa, caxcꞌal jix ja waoc jin yaꞌilal sicꞌlebꞌil.
9 Cꞌam ojabꞌxa cha naꞌtej jin penail, chi woche cha joꞌqꞌuey masanil jin mul.
10 Jaach jin Diosal, jaꞌ ojabꞌ watxꞌ naꞌbꞌale cha waoc win. Akꞌ acꞌbꞌoj jin naꞌbꞌal, yet watxꞌ jijem chi wute jin bꞌa ey jaach.
11 Cꞌam ojabꞌ chin ja bꞌejcanoj, cꞌam ojabꞌ cha wiꞌel ja Santo Espíritu win.
12 Akꞌ jin tzalacꞌulal junelxa yu jin colbꞌanil. Akꞌ jin bꞌeybꞌalne jijemal yin masanil jin cꞌul,
13 yet watxꞌ chin cuy ebꞌ pena chi yute sbꞌeybꞌal, catuꞌ chi yaon oc sbꞌa ebꞌ penawom yul ja kꞌabꞌ.
14 Jaach jin Diosal, jix ja wakꞌ jin colbꞌanil, cꞌam ojabꞌxa chin makꞌwi cam ánima, col jin el tet spenail, catuꞌ oj walon el ja watxꞌilal yin bꞌitalil.
15 Akꞌ tzalabꞌoj jin cꞌul, catuꞌ oj jaach jin bꞌitneni.
16 Ta tol jaꞌ ofrenda cꞌal xaambꞌal cha woche, chim la wakꞌ ey jaach, jal xin, cꞌam cha woche pax oj.
17 Jaꞌ tzet cha woche, jaꞌton ebꞌ chi cus scꞌul yu spenail. Jaach jin Diosal, cꞌam ojabꞌ cha wintajne el ebꞌ ánima tol chi yiꞌey sbꞌa ey jaach yutol chi snaꞌ sbꞌa scꞌul ebꞌ.
18 Akꞌ ja watxꞌcꞌulal bꞌey Sión yu swatxꞌil ja cꞌul. Waꞌne a smuroal conobꞌ Jerusalén junelxa.
19 Queyton tuꞌ oj yun stzala ja cꞌul yet oj ja chaꞌon xaambꞌal cha woche, jaꞌton noꞌ noꞌ chi akꞌle tzꞌaꞌoj. Queyton tuꞌ oj yun yakꞌle noꞌ wacax yin xaambꞌal ja sattaj bꞌey jun yet xaambꞌal.