2 Jaꞌ bꞌey tzalan Sión, jaꞌton jun conobꞌ watxꞌ yili, jaꞌ tituꞌ chi xꞌox stzejejial Dios.

3 Jaꞌ yet oj jul Jehová cu Diosal, man tucꞌal oj jul yin numomial. Yutol ey jun kꞌakꞌ bꞌabꞌel sattaj, jaꞌton jun kꞌakꞌ oj akꞌon qꞌueyel masanil tzetyetal. Joyan pax oc jun miman kꞌakꞌ tuꞌ yinlaj.

4 Jata cꞌal bꞌey satcan tuꞌ oj yambꞌale oc ebꞌ caan satcan, cꞌal ebꞌ caan sat txꞌotxꞌ txꞌotxꞌ tiꞌ, yet oj naꞌle oc yin ebꞌ ánima, jaꞌton ebꞌ sconobꞌ Dios.

5 Chi yalon jaxca tiꞌ: Yambꞌawej oc ebꞌ wet xa yeocoj, jaꞌton ebꞌ jix yakꞌ xaambꞌal ey jin yu yakꞌon swa kꞌane ebꞌ wetoj, ẍi Dios.

6 Jaꞌ satcan chi txꞌoxon eloj tol jaꞌ Dios, Juez ton yin sjichanil.

7 Chi yalon pax Dios jaxca tiꞌ: Jex jin conobꞌ Israel, abꞌwej tzet chi walaꞌ; watxꞌ chi yun walon can tzetyetal ey jex. Jain ton Dios jin, je Diosal jin pax oj.

8 Ma jex wakꞌ cuenta yu je yofrenda tol che yakꞌ cꞌaltaꞌ ey jin, cꞌal noꞌ noꞌ che yakꞌ tzꞌaꞌ bꞌey yet xaambꞌal jin sattaj.

9 Cꞌam chin kꞌan noꞌ achꞌe wacax xol noꞌ jobꞌbꞌil je yu. Cꞌam noꞌ icham chiw yul je colal chin kꞌan ey jex.

10 Yutol wet masanil noꞌ xol-laj teꞌal noꞌ. Wet cꞌal pax noꞌ jobꞌbꞌeal noꞌ ey sjolomlaj txꞌotxꞌ wonan.

11 Wet masanil noꞌ tzꞌiquin ey xol-laj teꞌ, cꞌal masanil tzetyetal chi bꞌilwi xol-laj txꞌotxꞌ eltzabꞌ.

12 Ta ey jin wail, man oj wal ey jex, yutol wet jun yul yibꞌankꞌinal tiꞌ yetoj cꞌal masanil tzetyetal ey bꞌey.

13 ¿Tumi jaꞌ ẍiꞌbꞌeal noꞌ wacax chin chiꞌ? Tumi jaꞌ ẍiqꞌuil noꞌ icham chiw chi wuqꞌue.

14 Jaꞌ je yofrenda chi ẍaꞌ jin cꞌul, jaꞌton je watxꞌ kꞌane che yal ey jin. Akꞌwej eloc bꞌey che yakꞌ can je tiꞌ ey jin, yutol Dios jin, tol miman weloc apnoj.

15 Jaꞌ yet ey je yaꞌilal, awtewej jin. Oj jex jin coloꞌ. Miman ojabꞌ weloc apnoj yul je sat, ẍi Dios.

16 Jaxa tet ebꞌ penawom chi yal Dios jaxca tiꞌ: ¿Tzet je yalon je yet yin je yalon el jin cuybꞌanil, ma je yalon el skꞌaneal jin wa kꞌane?

17 Ilaꞌ tol cꞌam chi yal je cꞌul chex wakꞌ cuenta, catuꞌ cꞌam yeloc apnoj jin kꞌane yul je sat.

18 Jaꞌ yet chi jul junoj elkꞌom, caw chex tzala yetoj ebꞌ. Catuꞌ chex tzala pax yetoj ebꞌ ixlom.

19 Asanne pena kꞌane che yalaꞌ, yelcꞌulal chex naꞌwi a lekꞌtiꞌal kꞌane.

20 Che yal pena kꞌane yin ebꞌ je yuẍtaj, tol junne je mam je txutx yetoj.

21 Jaꞌ tinaniꞌ cꞌamto tzet chi wal yu masanil je penail tuꞌ. Yuxan che naꞌ tol laan jin je yetoj; jaxa oj wun je yetoj tol oj wal oc je penail yin je sat yet oj wil-le oc jin sat je yetoj.

22 Jaex chin too qꞌueycꞌulal je yu, watxꞌ ojabꞌ chi yun snaꞌcha el jun tiꞌ je yu, jaxa tala chi yunne oj jex wakꞌ qꞌueyle eloj, catuꞌ cꞌamxa mactxequel oj jex colon el yul jin kꞌabꞌ.

23 Jaꞌ ebꞌ chi alon yu diosalil ey jin, ey weloc apnoj yul sat ebꞌ. Jaꞌ mactxequel jijem chi yute sbꞌa ey jin, oj jin colcan el ebꞌ, ẍi Dios.