2 Abꞌwej jex bꞌeom cꞌal jex mebꞌa, mac jex miman je yeloc apnoj, cꞌal jex cꞌam je yeloc apnoj.

3 Tol oj jin kꞌanabꞌ yin jelanil, oj wal wan naꞌbꞌale tol caw yaꞌtaj snaꞌcha eloj.

4 Oj jin maj wabꞌ skꞌane ebꞌ jelan; catuꞌ oj jin bꞌitne tzet oj wabꞌoc tuꞌ yetoj sonal arpa.

5 ¿Tzet yuxan oj jin xiw yet oj jul scꞌual syaꞌtajilal win, yet oj oc joyan ebꞌ chi jowi oc win?

6 Jaꞌ ebꞌ chi jowi oc win, jaꞌ sbꞌeomal ebꞌ chi yaoc yipoj scꞌul, catuꞌ chi smeyne sbꞌa ebꞌ yu jantaj tzetyetal ey yul skꞌabꞌ ebꞌ,

7 yuxan cꞌam junoj mactxequel chi skeꞌ scolon el sbꞌa yul yet, tam wal smanon skꞌinal tet Dios.

8-9 Cꞌam chi skeꞌ smancha el junoj ánima yu chꞌen tumin, yet watxꞌ iquis cꞌal ecꞌoj, catuꞌ cꞌam chi cami.

10 Tutun chi kil xin, tol jun laan chi yun scam ebꞌ ánima masanil. Chi cam ebꞌ jelan snaꞌbꞌal, chi cam pax ebꞌ man jelanoj snaꞌbꞌal, jaxa sbꞌeomal ebꞌ xin, chi cancan bꞌulanoj, txꞌojxa mac chi iꞌon can ocoj.

11 Caxcꞌal ey mimanoj xꞌotxꞌ ebꞌ, caw naꞌbꞌacꞌal. Jaꞌ bꞌey oj mujle ebꞌ, jaꞌ tituꞌ ey cꞌal ecꞌ ebꞌ, junelne chi cancan ebꞌ tituꞌ.

12 Jaon ánima jon tiꞌ, man masaniloj tiempo ey jon ecꞌ yul yibꞌankꞌinal tiꞌ. Caxcꞌal mi yel xacꞌal ey mimanoj cu bꞌeomal, laan cꞌal chi yun cu cam jaxca noꞌ noꞌ.

13 Queyton tuꞌ chi yun sqꞌueyel ebꞌ chi yaloc sbꞌa jelanil, jaꞌ tzet eyoc yipoj scꞌul ebꞌ oj cancan yu ebꞌ.

14 Jaꞌ ebꞌ ánima tuꞌ, jaꞌ camich eyoc steynemaloj ebꞌ. Jaꞌ chi iꞌon cantoj ebꞌ bꞌey chi mujle ebꞌ camom jaxca chin yun yiꞌletoj noꞌ meꞌ yet chi makꞌle camoj. Jaꞌ yet chi kꞌinibꞌi eloj, jaꞌ ebꞌ ánima watxꞌ snaꞌbꞌal oj akꞌon eyqꞌuey ebꞌ. Niẍtejal cꞌal oj yun spax yip smimanil ebꞌ, jaxa bꞌey smujbꞌanil ebꞌ camom oj oc snaoj ebꞌ.

15 Jal jin jain tiꞌ, jaꞌ Dios oj jin colon el yul skꞌabꞌ camich, catuꞌ oj jin yiꞌontoj yetoj.

16 Cꞌam ojabꞌ chi koche oc jantaj tzet ey yul skꞌabꞌ ebꞌ bꞌeom, caxcꞌal mi txꞌojxa swatxꞌil yili sbꞌeomal ebꞌ bꞌey sna.

17 Yu jun tuꞌ, cꞌam ojabꞌ che yoche oc sbꞌeomal ebꞌ, yutol jaꞌ yet oj camtoj ebꞌ, cꞌam niꞌoj sbꞌeomal ebꞌ oj yiꞌtoj yetoj.

18 Caxcꞌal mi caw jix yakꞌ tzalabꞌoj scꞌul yet iquis ecꞌ ebꞌ, caxcꞌal chi al-le watxꞌ kꞌane yin ebꞌ yu sbꞌeomal tuꞌ yu yet animail,

19 jaxa yet oj jul scꞌual scamtoj ebꞌ; jaxca cꞌal jix yun scam smam icham ebꞌ queytuꞌ oj yun scam ebꞌ, cꞌamxa bꞌakꞌin oj yil sajilkꞌinal ebꞌ.

20 Jaon ánima jon tiꞌ, man iquis oj jon cꞌal ecꞌoj, caxcꞌal mi caw ey mimanoj cu bꞌeomal, laan cꞌal oj yun cu cam jaxca chi yun scam noꞌ noꞌ.