2 Txꞌojxa swatxꞌil yili jun wonan tuꞌ, yutol naat eya steel. Jaꞌ bꞌey ẍumuc txꞌotxꞌ wonan Sión tuꞌ, bꞌey spacꞌul yetcꞌulal norte, jaꞌ tituꞌ ey stzalacꞌulal masanil ebꞌ caan sat txꞌotxꞌ txꞌotxꞌ tiꞌ, jaꞌton sconobꞌ Naj Rey Tol Yel xacꞌal Miman Yeloc Apnoj.

3 Jaꞌ Dios eyecꞌ bꞌey sdespacho bꞌey txꞌotxꞌ tzalan Sión tuꞌ, jix yakꞌon kotajne eloj tol jaꞌ Dios eyoc cu Colomaloj.

4 Jix syambꞌa sbꞌa ebꞌ rey, jix too bꞌululoj ebꞌ yakꞌon jowal bꞌey tzalan Sión.

5 Jaxa yet jix yilon jun conobꞌ tuꞌ ebꞌ. Jix somcha el snaꞌbꞌal ebꞌ, jix el jininoj ebꞌ yu xiwcꞌulal.

6 Jix michꞌcha ebꞌ yu xiwcꞌulal, cꞌal yu somcꞌulal, jaxca chi yun junoj ix ix eyoc yalan syaꞌil yet chi ali yuneꞌ.

7 Jaxca chi yun spoꞌotoj teꞌ barco yet conobꞌ Tarsis yu sjowal cajxuchum kaꞌeꞌ chi tit bꞌey chi aol cꞌu, queytuꞌ jix yun smichꞌcha ebꞌ.

8 Jaꞌ bꞌey sconobꞌ Jehová cu Diosal, Naj Yaaw yibꞌan masanil, jix kil yeloc jaxca jix yun yal-le ey jon. Jaꞌ Dios oj colwa cꞌal yin conobꞌ Jerusalén.

9 Jaach cu Diosal, chi cu naꞌtej ja miman camcꞌulal bꞌey ja templo.

10 Al-le ojabꞌ watxꞌ kꞌane ey jaach bꞌey masanil yul yibꞌankꞌinal tiꞌ, yutol ja moo yiꞌle a can ja bꞌi. Yetoj ja jelanil cha waꞌnen yeoc masanil tzetyetal yin sjichanil.

11 ¡Tzala ojabꞌ ebꞌ ánima caan bꞌey txꞌotxꞌ tzalan Sión! ¡Ey ojabꞌ tzalacꞌulal snan xol ebꞌ conobꞌ Judá, yutol jichan cꞌal chi yun ja waꞌnen yeoc masanil!

12 Ecꞌanwej joyoyoj yinlaj tzalan Sión, catuꞌ che bꞌison jayebꞌ storreal.

13 Chi cam je seyon je yil smuroal; chi cam pax je seyon je yilon snail yet ebꞌ yaaw, yet watxꞌ oj skeꞌ je yalon el skꞌaneal tet ebꞌ unin tol to oj aloj.

14 Jaꞌ sDiosal Sión, jaꞌton cu Diosal. Jaꞌ chi cu iꞌon bꞌey tinaniꞌ masantaꞌcꞌal slawubꞌal.