2 ¡Jaach rey, asanne jaach watxꞌ ja wili yintaj masanil ebꞌ winaj! Caw chi al-le watxꞌ kꞌane ja win, yutol chi yakꞌ swatxꞌcꞌulal Dios ja wibꞌan.

3 Kꞌalbꞌil oc chꞌen ja wespada yin ja nan, jaach winaj tol akꞌom jowal. Tol caw bꞌinabꞌil jaach yetoj ja wopiso.

4 Ocan yibꞌan noꞌ ja che cha kꞌan yin ja wopiso yu ja wakꞌon jowal, yu swatxꞌiloj kꞌane tol jichan chi al-le ja win, cꞌal ja waꞌnen yeoc junoj kꞌane yin yeynajil.

5 Jaꞌ ja julbꞌal tol caw eel xaam, jaꞌ oj tejon xaamscꞌul ebꞌ conobꞌ chi jowi oc ja win jaach Rey.

6 Jaach jin Diosal, Rey jaach yin tobꞌalkꞌinal, caw jichan cꞌal chi yun ja naꞌon oc yin junoj mactxequel.

7 Jaꞌ sjichanil chi ẍaꞌ ja cꞌul, cꞌam cha woche spenail. Yutol jaꞌ Dios jix jaach sicꞌon ocoj; jix yakꞌ miman tzalacꞌulal ey jaach yintaj wanxa ebꞌ ey yopiso ja wetoj.

8 Caw chi el sabꞌ sperfumeal teꞌ mirra cꞌal yet teꞌ áloe yetoj cꞌal teꞌ canela yin ja pichil eyocoj, catuꞌ oj ja wakꞌon tzalabꞌoj ja cꞌul yetoj tenle wan mitxꞌkꞌabꞌe eyoc xꞌanil, tol eyoc chꞌen marfil yelawiloj.

9 Oj apnoj oc ebꞌ ix scutzꞌin ebꞌ rey bꞌey xol ja yambꞌabꞌail. Jaꞌ bꞌey ja despacho yet ja watxꞌ kꞌabꞌ, jaꞌ tituꞌ eyecꞌ ix reina. Eyoc chꞌen oro yel xacꞌal watxꞌ yili yelawiloj spichil ix.

10 Jaach scutzꞌin rey, abꞌ tzet oj wal ey jaach. Cꞌam ojabꞌxa cha naꞌtej ebꞌ ja wican cꞌal ebꞌ ja wet conobꞌ,

11 yutol jaꞌ naj rey chi ochen swatxꞌil ja wili, jaꞌton naj ja waawil yeocoj. Yuxan jijem ojabꞌ jaach cꞌal tet naj.

12 Oj yakꞌ saꞌbꞌeal ebꞌ ix scutzꞌin rey a conobꞌ Tiro ey jaach. Jaꞌ ebꞌ caw bꞌeom oj yoche ebꞌ oj jaach oc swatxꞌil animaoj.

13 Ti chi jul ix kꞌopo ix oj nupoj yetoj naj rey, tol scutzꞌin junoj ebꞌ rey. Caw watxꞌ yili ix yetoj spichil, eyoc chꞌen oro yinlaj spichil ix.

14 Watxꞌ yili spichil ix eyocoj. Chi iꞌletej ix tet naj rey. Jaꞌjun ebꞌ ix kꞌopo ix yucꞌlemoj ix, jaꞌton ebꞌ ix swatxꞌil ánima ix.

15 Caw tzalacꞌulal chi yun stit ebꞌ ix, tzalacꞌulal chi yun yapni oc ebꞌ ix bꞌey spalacio naj rey.

16 Jaach rey, jaꞌ ebꞌ ja wuninal, oj ey chotan ebꞌ bꞌey sdespacho ebꞌ ja wichmam, catuꞌ oj ja waon oc yopiso ebꞌ yin yakꞌon cuenta masanil yul ja nación bꞌey cha wakꞌ yaawil.

17 Jain oj wakꞌ naꞌletej ja bꞌi xol masanil ebꞌ ánima tol to oj aloj yul yibꞌankꞌinal tiꞌ. Jaxa ebꞌ ánima bꞌey junjun conobꞌ, oj iꞌle a can ja bꞌi yu ebꞌ yu yalon watxꞌ kꞌane ebꞌ.