2 Yetoj ja wipalil jix ja wujten el ebꞌ txꞌoj conobꞌal, jix ja qꞌueyon can el ebꞌ mimej conobꞌ, yuxan jaxa ebꞌ cu mam icham jon jix ja wakꞌ caey ecꞌ titiꞌ.

3 Manaj yetoj yipal ebꞌ xꞌojli, tam wal yetoj yespada ebꞌ jix yakꞌbꞌalne yet jix yiꞌon can oc jun txꞌotxꞌ tiꞌ ebꞌ. Man yu oj jix yakꞌ jowal ebꞌ, yuxan jix yiꞌoc jun txꞌotxꞌ tiꞌ ebꞌ. Asanne ton yetoj ja wipalil jix ja wakꞌon eyqꞌuey jowal tuꞌ, yutol ey jaach ecꞌ yetoj ja wipalil cꞌal yetoj ja camcꞌulal yin ebꞌ kichmam tuꞌ jon.

4 Jaach jin Diosal, jin Reyal jaach. Ja wu yuxan chi kakꞌ eyqꞌuey jowal jaon ja conobꞌ jon tiꞌ.

5 Jaach ton chach oc ketoj, yuxan chi eyqꞌuey ebꞌ cu cajat ku jon. Yetoj ja wipalil yuxan jix eyqꞌuey ebꞌ jix yakꞌ jowal kin jon.

6 Man oj waoc jin julbꞌal tiꞌ yipoj jin cꞌul, man yu oj chꞌen wespada tiꞌ oj wakꞌon eyqꞌuey jowal.

7 Ja wu yuxan jix kakꞌ eyqꞌuey ebꞌ cu cajat tuꞌ jon. Jaach jix ja wakꞌ eyqꞌuey ebꞌ chi chichon oc scꞌul kin jon.

8 Asanne ja win oj kakꞌ cꞌal tzalabꞌoj cu cꞌul, asanne jaach oj jaach cu bꞌitne.

9 Jaxa tinaniꞌ xin jaach jin Diosal, jix jon ja wintajne can eloj, jix jon ja waoc xol qꞌuixwilal. Cꞌamxa chi yal ja cꞌul chach colwa yetoj ebꞌ cu soldado jon.

10 Jix jon ja bꞌejcanoj, yuxan chi cu el tet ebꞌ cu cajat jon. Jaꞌ ebꞌ chi chichon oc scꞌul kin jon, jix yelkꞌanetoj cu tzetyetal ebꞌ jon.

11 Jix jon ja waoc yul skꞌabꞌ ebꞌ. Jaxca noꞌ meꞌ chi iꞌletoj bꞌey chi makꞌle camoj. Jix cu sajlem cantoj xol-laj wanxa ebꞌ conobꞌlaj yu ebꞌ.

12 Jaxca tol jix jon ja txon can el jaon ja conobꞌ jon tiꞌ yin kꞌojbꞌil stool. Tumi miman tzetyetal jix ja wiꞌ yet jix jon ja txonon cantoj tuꞌ.

13 Jix jon ja waoc yul skꞌabꞌ ebꞌ ánima caan cu cawilal tiꞌ yet chi cu sbꞌuchon ebꞌ jon. Caw chi txꞌemwa oc ebꞌ nacionlaj ey cu cawilal tiꞌ jon, catuꞌ cꞌamxa keloc apnoj yul sat ebꞌ.

14 Caw chi cu bꞌuchle yu ebꞌ conobꞌlaj ey cu cawilal tiꞌ jon. Jaꞌ yet chi cu yilon ebꞌ, chi syum sjolom ebꞌ sbꞌuchwa kin jon.

15 Junjun cꞌu, tuxa cꞌal chi cu ey noan yu qꞌuixwilal tet ebꞌ jon.

16 Chi cu xꞌem ebꞌ jon. Chi spajtze sbꞌa ebꞌ ey jon, cꞌam keloc apnoj yul sat ebꞌ.

17 Jaꞌton wan tiꞌ jix tit kibꞌan jon, man yu oj tol jix jaach too qꞌueycꞌulal ku. Ilaꞌ tol jijem cꞌal kunen bꞌey jix ja wakꞌcan ja tiꞌ ey jon.

18 Cꞌam bꞌey chach too qꞌueycꞌulal ku jon, cꞌam ja cuybꞌanil jix cu bꞌejcan jon.

19 Caxcꞌal mi jaxca tuꞌ, tuxa jix jon ja bꞌejoc yul skꞌabꞌ xiwcꞌulal, jix jon ja majche can ey xol kꞌejkꞌinal tol ey smey.

20 Jaach jin Diosal, ta tol jix jaach too qꞌueycꞌulal ku, jaxam tet comon dios chi kiꞌey cu bꞌa jon,

21 xax mi ja wiltej, yutol cꞌam junoj tzet ewan cꞌuan tol man ja wotaj oj.

22 Yu jun tuꞌ xin, ja wu yuxan junjun txolan ian chi cu yakꞌ cam ebꞌ, jaxca noꞌ meꞌ chi iꞌletoj yet chi makꞌle camoj, queytuꞌ chi cu yute ebꞌ jon.

23 Jaach jin Diosal, ¿tzet yu, yuxan jaxca tol chach weyi? Il jontej xin, cꞌam ojabꞌ chon ja wintajne el yin junelne.

24 ¿Tzet yu, yuxan cha webꞌa el ja bꞌa ey jon? ¿Tzet yu, yuxan chi cu too qꞌueycꞌulal ja wu xol jun miman syaꞌilal tiꞌ?

25 Tuxa jix el kip jon, cꞌamxa tzet watxꞌ kalon jon, jaxca wal tol ipan cu too jutxontoj sat txꞌotxꞌ jon.

26 ¡Titan colwa ketoj yin eymanil. Col jon el yetoj ja miman camcꞌulal, catuꞌ chon ja jajon eloj!