2 Jaach jin Diosal, iquis jaach yin tobꞌalkꞌinal, caw chach woche yetoj masanil jin cꞌul. ¿Bꞌakꞌin oj jin apnoj ja sattaj junelxa?

3 Yet cꞌualil cꞌal akꞌbꞌalil chin okꞌi. Jaxa cꞌal okꞌilal eyoc jin loꞌbꞌeoj, jaꞌ ebꞌ ánima chi jowi oc win chi skꞌanle ebꞌ ey jin jaxca tiꞌ: ¿Bꞌeytuꞌ eyoc jun ja Diosal tuꞌ?

4 Jaꞌ yet chin naꞌon wan tiꞌ, chi oc pitzꞌan cuscꞌulal yin jin pixan. Chin naꞌontej yet ey jin ecꞌ xol ebꞌ ánima chi wijbꞌatoj bꞌey snail scalubꞌal Dios. Manxa jantajoj aw chi oqui, mimej tzalacꞌulal cꞌal alo yu diosal chi oqui. Yutol miman kꞌin jun chi oc tuꞌ.

5 ¿Tzet wal yu, yuxan chi wakꞌ bꞌiscꞌulal? ¿Tzet yu, yuxan chi somcha el jin naꞌbꞌal? Jaꞌ Dios eyoc yipoj jin cꞌul, tol oj wal watxꞌ kꞌane tet Naj jin Colomal, yutol jin Diosal yeocoj.

6 Caw cuscꞌulal weoc tinaniꞌ. Yu jun tuꞌ, yuxan chin naꞌtej jin Diosal bꞌey chi aol jaꞌ Jordán, cꞌal bꞌey yul yet txꞌotxꞌ wonan Hermón, cꞌal Mizar.

7 Jaxca wal chi yun smakꞌon oc sbꞌa junoj jaꞌ miman paaw chi eltej satlaj pakꞌan, queytuꞌ wan mimej syaꞌilal jix ecꞌ el wibꞌan ja wu.

8 Yet cꞌualil chi xꞌox scamcꞌulal Jehová ey jin, jaxa yet akꞌbꞌalil, cꞌam chi oc tucan jin bꞌitni, cꞌam cꞌal chi oc tucan jin txali tet Dios, yutol jaꞌ chi akꞌon jin kꞌinal.

9 Chi walon tet jin Diosal jaxca tiꞌ: Jaach jin Colomal, ¿tzet yu, yuxan chin too qꞌueycꞌulal ja wu, tol cusiltaj xacꞌal jin cꞌul chin ecꞌabꞌi, yutol chi syambꞌa oc sbꞌa ebꞌ chi jowi oc win?

10 Chi wabꞌ syaꞌil, jaxca tol jix makꞌle poꞌo jin bꞌajil yu ebꞌ jin cajat chin etneni. Junjun cꞌal txolan chi skꞌanle ebꞌ ey jin jaxca tiꞌ: ¿Bꞌeytuꞌ eyoc jun ja Diosal tuꞌ?

11 ¿Tzet yu, yuxan chi jul jin bꞌiscꞌulal? ¿Tzet yu, yuxan chi somcha el jin cꞌul? Jaach jin Diosal, caw ey jaach oc yipoj jin cꞌul, tol chi wal jin watxꞌ kꞌane ey jaach. ¡Jin Colomal jaach, jin Diosal jaach pax oj!