2 Jaꞌ oj teynen ebꞌ, oj akꞌle scawil ebꞌ cꞌal stzalacꞌulal ebꞌ yet caan ecꞌ ebꞌ sat txꞌotxꞌ txꞌotxꞌ tiꞌ. Man oj ale oc ebꞌ yul skꞌabꞌ ebꞌ chi jowi oc yin ebꞌ.

3 Jaꞌ Jehová oj akꞌon waꞌxoj scꞌul ebꞌ xol syaꞌilal, jaxa smeltzo oc jun syaꞌilal ebꞌ tuꞌ yin tzalacꞌulal.

4 Jain tiꞌ jix walaꞌ: Jaach jin Diosal, okꞌ ojabꞌ ja cꞌul win. Ante jin, caxcꞌal mi jix oc jin penail ey jaach.

5 Jaꞌ ebꞌ chi jowi oc win chi yal pena kꞌane ebꞌ win: ¿Bꞌakꞌin wal oj camoj, yet watxꞌ manxa oj naꞌletej? ẍi ebꞌ, chi yalon ebꞌ.

6 Chi julecꞌ ebꞌ jin yilaꞌ, man yin oj masanil scꞌul ebꞌ chin jul yilon ecꞌ ebꞌ. Tucꞌal chi jul smaj yil ebꞌ tzet weocoj, jaxa yul-laj bꞌe chi yal jin kꞌumal ebꞌ.

7 Jaꞌ ebꞌ cꞌam chin ocheni, chi syambꞌa sbꞌa ebꞌ, catuꞌ chi yalon jin kꞌumal ebꞌ. Pena chi yal ebꞌ win.

8 Chi yalon ebꞌ jaxca tiꞌ: Jaꞌ syaꞌilal jun tiꞌ cꞌamxa yanil. Tuxa jix too sat xꞌat, manxa oj waꞌxoj scꞌul, ẍi ebꞌ win.

9 Laan xacꞌal chi yute sbꞌa ebꞌ jin watxꞌil ánima yetoj ebꞌ, junoj tol yip jin cꞌul yeoc waloni, ebꞌ junne chi low wetoj, jaꞌjun ebꞌ chi meltzo oc win.

10 Jaach Jehová jin Diosal, okꞌ ojabꞌ ja cꞌul win. Iꞌ jin a waanoj, catuꞌ cha waon ecꞌ spaj tet ebꞌ.

11 Queyton tuꞌ oj yun snaꞌcha el wu, tol jix wun jaxca cha woche, yutol ma yakꞌ tzalabꞌoj scꞌul ebꞌ chi jowi oc win.

12 Jal jin jain tiꞌ, cꞌam cꞌaltaꞌ jin penail ja sattaj, yuxan quetz jin bꞌey yetoj ja watxꞌ kꞌabꞌ, ey jin cꞌal ecꞌ ja sattaj.

13 ¡Al-le ojabꞌ watxꞌ kꞌane tet Jehová cu Diosal jaon Israel jon tiꞌ, tinaniꞌ cꞌal yin tobꞌalkꞌinal! ¡Yun ojabꞌi!