2 Jaꞌ Dios jix jin iꞌon atej yul jun jolan ey smey. Jix jin yiꞌon eltej xol sokꞌom. Jix jin slinbꞌa can oc yibꞌan jun chꞌen chꞌen, yet watxꞌ sakꞌal chi yun woc linanoj.

3 Jix yakꞌon jun acꞌ bꞌit ey jin, bꞌit yin alo watxꞌ kꞌane tet cu Diosal. Ecꞌal ebꞌ oj qꞌueya scꞌul yet oj yilon jun tiꞌ ebꞌ. Jaxa Jehová oj yaoc ebꞌ yipoj scꞌul.

4 Tzalacꞌulal yet mactxequel tol jaꞌ Jehová chi yaoc yipoj scꞌul, catuꞌ cꞌam chi yaoc sbꞌa xol ebꞌ chi yiꞌey sbꞌa tet comon dios tol cꞌam yeloc apnoj.

5 Jaach Jehová jin Diosal, caw miman tzet qꞌueyubꞌtaj jix ja waꞌne, yetoj jantaj ja watxꞌcꞌulal jix ja wakꞌ ey jon. Cꞌam junoj mactxequel laan ja wetoj. Chi yoche jin cꞌul chi walel skꞌaneal ja watxꞌcꞌulal, caw cꞌam chi naꞌcha waloni, yutol ecꞌbꞌan sbꞌisil yibꞌan jayebꞌoj jin kꞌane chi skeꞌ waloni.

6 Cꞌam cha woche noꞌ noꞌ yetoj ixim tiriw yin ofrendail. Cꞌam junoj xaambꞌal jix ja kꞌanaꞌ, noꞌ xaambꞌal chi akꞌle tzꞌaꞌoj, cꞌal xaambꞌal yet chi akꞌle tan spenail. Jaꞌ jun jix ja wute, tol jix ja jaj jin txiquin yet watxꞌ jijem chi wute jin bꞌa ey jaach.

7 Yu tuꞌ xin, yuxan chi wal jaxca tiꞌ: Ti ey jin, jin chi ey jaach, jaxca taꞌ ye stzꞌibꞌelecan skꞌaneal yul an juun tzꞌibꞌebꞌilcanoj.

8 Jaach jin Diosal, chi yoche jin cꞌul chin jije ja wochwan. Ey cꞌal oc ja chejbꞌanil yin jin naꞌbꞌal.

9 Jix wal can el skꞌaneal ja watxꞌilal snan xol syambꞌabꞌail ebꞌ ja conobꞌ. Ja wotaj sicꞌlebꞌil tol cꞌam chin oc tucan walon eloj.

10 Cꞌam bꞌey tol cꞌam chi walel skꞌaneal ja watxꞌcꞌulal. Jix waleloj tol chi yun cꞌal tzet cha walaꞌ, cha wakꞌon colbꞌanile. Cꞌam bꞌey jix webꞌa el ja camcꞌulal sattaj ebꞌ ja conobꞌ yaman ecꞌoj.

11 Jaach jin Diosal, cꞌam ojabꞌ chi oc tucan ja wakꞌon ja watxꞌcꞌulal ey jin. Jaꞌ ja camcꞌulal chin teynen cꞌal jaxca ja waloni.

12 Yutol caw miman tzet chi jul wibꞌan, cꞌamxa chi bꞌischa wu. Lalanxa jin michꞌcha yu jin penail chi wabꞌe. Cꞌamxa chi skeꞌ wilwani. Ecꞌbꞌan xacꞌal sbꞌisil jin penail tuꞌ yintaj sbꞌisil xil jin jolom. Ey jin xa toj yin somcꞌulal tinaniꞌ chi wabꞌe.

13 Jaach jin Diosal, titan yet chin ja colon eloj. Jaach Jehová, titan yin eyman yu jin ja colon eloj.

14 Jaꞌ ebꞌ chi yoche scꞌul chin yakꞌ camoj, qꞌuixwoj ojabꞌ a ebꞌ, catuꞌ somcha ojabꞌ el snaꞌbꞌal ebꞌ. Jaꞌ ebꞌ chi yoche chin cami, meltzo ojabꞌ ebꞌ yintaj yin mimej qꞌuixwilal.

15 Jaꞌ ebꞌ chin bꞌuchoni, can ojabꞌ ebꞌ yin cꞌamxa snaꞌbꞌal yu somcꞌulal.

16 Jaxa masanil ebꞌ chach camcꞌulneni, tzala ojabꞌ ebꞌ ja win. ¡Caw miman yeloc apnoj Jehová! ẍi ojabꞌ ebꞌ chi ochen ja colwal.

17 Jal jin jain tiꞌ, caw okꞌbꞌal jin cꞌul, catuꞌ ey jin oc yin bꞌiscꞌulal, cꞌam ojabꞌ chin too qꞌueycꞌulal ja wu, jaach jin Diosal. Jaach cꞌaltaꞌ oj jin ja coleloj, col jin cꞌal el yin eymanil.