2 Numomi jin xacꞌal, cꞌamxa jin watxꞌ kꞌane chi walaꞌ, yutol jix jowbꞌi jin yaꞌilal.

3 Lalan yoc skꞌakꞌal yin jin pixan chi wabꞌe. Jaꞌ yet chin naoꞌtane, caw chi oc pitzꞌan yin jin pixan chi wabꞌe, yuxan jix jin kꞌanabꞌ aoj, jix walon jaxca tiꞌ:

4 Jaach Jehová jin Diosal, al ey jin, ¿tzet oj jin ionoj? ¿Jayebꞌto abꞌil iquis jin ecꞌoj? Chi woche chi wotajne eloj, yutol txenne jin kꞌinal.

5 Txenne sbꞌisil jin kꞌinal jix ja wakꞌa. Jaxca wal tol cꞌam weloc apnoj yul ja sat. Laan jon jaxca yet chi kiꞌon cu kaꞌeꞌ, jaxca tuꞌ yeoc cu kꞌinal jon.

6 Jaꞌ cu kꞌinal laan jaxca junoj enele. Naꞌbꞌacꞌal chi cu makꞌ cꞌuumbꞌoj cu bꞌa yin mulnail. ¿Tumi chi kakꞌ cu naꞌbꞌaloj yetoj cu bꞌeomal chi cu yambꞌatoj bꞌulanoj. Man kotajoj mactxequel oj iꞌon can ocoj.

7 Jaxa tinaniꞌ, jaach Waawil, ¿tzet chi wechbꞌane? Asanne jaach ey jaach oc yipoj jin cꞌul.

8 Col jin el tet masanil spenail. Cꞌam ojabꞌ chin ja chaꞌ bꞌuchle yu ebꞌ pena snaꞌbꞌal.

9 Jix wute jin bꞌa jaxca ebꞌ cꞌam chi skeꞌ skꞌanabꞌi. Cꞌam tzet jix walaꞌ, yutol jaach jix ja waoc wan tiꞌ win.

10 Iꞌel jin yaꞌilal jix ja waocoj. Lalanxa jin lawi ey chi wabꞌ yu sjowal ja cꞌul.

11 Jaach cha waoc cu yaꞌilal jaon ánima jon tiꞌ. Cha wakꞌon kij tzꞌuum yu cu penail, pojoj xacꞌal chi yun cantoj tzetyetal chi cu camcꞌulne. Caw cꞌam niꞌoj yeloc apnoj cu kꞌinal cu masanil jon, laan jaxca yet chi kiꞌon cu kaꞌeꞌ juneloj.

12 Jaach Jehová jin Diosal, abꞌ jin txa chi wal ey jaach, ocan tꞌanan yet chi walon jin bꞌa ey jaach. Cꞌam ojabꞌ chin ja bꞌejcan xol wokꞌilal. Yel toni, ecꞌabꞌwom jin yul yibꞌankꞌinal tiꞌ jaxca ebꞌ wichmam.

13 Iꞌel sjowal ja cꞌul win, yet watxꞌ chi wiꞌ jin tzalacꞌulal junoj txolan, yajbꞌan cꞌamto chin cami.