2 Yutol jix oc txolan ja julbꞌal win, jix ja waoc jin yaꞌilal.

3 Caw yaꞌey masanil jin mimanil yu sjowal ja cꞌul chi wabꞌe, yu cꞌal tol jix oc jin penail ey jaach.

4 Jaꞌ jin penail cheman oc wibꞌan jaxca junoj ijatz, tol cꞌamxa chi techa wu.

5 Yu cꞌal jin penail yuxan lalanxa ya sabꞌ jin yasil, catuꞌ chi kꞌaꞌtoj.

6 Noan jin xacꞌal eyoj chin bꞌeyi. Cꞌamxa cꞌal tzet watxꞌ waloni. Cꞌam chi oc tucan jin cusilal.

7 Caw chi tzꞌaꞌtoj jin nan yu skꞌakꞌal jin yaꞌilal, ian xacꞌal chin cꞌam chi wabꞌe.

8 Tuxa cꞌal wejan jintoj, cꞌamxa wip. Chi el waw yu jin cuscꞌulal.

9 Jaach Waawil, ja wotaj masanil tzet chin naꞌ. Jaꞌ wotaj pax yet chi siꞌson jin cꞌul, yutol cha wil masanil tzet chin naꞌ.

10 Tuxa cꞌal chi pucꞌxi jin pixan wabꞌen syaꞌil, chi el wip, cꞌamxa chi skeꞌ wilwani.

11 Jaꞌ ebꞌ jin watxꞌil ánima, cꞌal ebꞌ junne chin ecꞌ yetoj, jix el ebꞌ jin cꞌatan, yetoj ebꞌ caan jin cawilal, jix sbꞌoscan el sbꞌa ebꞌ jin cꞌatan yu jin yaꞌilal.^a

12 Jaꞌ ebꞌ chi yoche chin yakꞌ camoj, jix yaey yaal ebꞌ jin sattaj. Jaꞌ ebꞌ chi yoche chi etextoj jin naꞌbꞌal, lalan slatiꞌne sbꞌa ebꞌ tzet chi yun yakꞌon etextoj jin naꞌbꞌal. Cꞌam chi xew ebꞌ snaꞌon tzet oj jin yute yin ewantajil.

13 Jal jin jain tiꞌ xin, jaxca tol cꞌam chi wabꞌ tzet chi yal ebꞌ, jaxca tol majan jin txiquin; jaxca tol cꞌam chi skeꞌ jin kꞌanabꞌi, cꞌam niꞌoj tzet chi walaꞌ.

14 Laan jin jaxca junoj mactxequel cꞌam chi yabꞌe, catuꞌ cꞌam chi skeꞌ yalon sbꞌa.

15 Jaach Jehová jin Diosal, chach waoc yipoj jin cꞌul, wotaj tol oj jaach takꞌwoj ey jin.

16 Yuxan chin kꞌan ey jaach, tol cꞌam ojabꞌ chin tzeele yu ebꞌ. Cꞌam ojabꞌ chi bꞌitni ebꞌ yu tzalacꞌulal ta chin eyqꞌueyi.

17 Jaxca wal tol ian chin eyqꞌuey chi wabꞌe. Cꞌam chi oc tucan niꞌoj jin yaꞌilal.

18 Oj walatej jin penail ey jaach, caw chin cus yu tzet jix wunne.

19 Jaꞌ ebꞌ chi jowi oc win, caw ey yip ebꞌ, catuꞌ ecꞌal sbꞌisil ebꞌ, chi yoche ebꞌ chin cami, caxcꞌal cꞌam jin penail tet ebꞌ.

20 Pena cꞌal chi yute scꞌul ebꞌ win yu jin watxꞌcꞌulal chin txꞌox tet ebꞌ. Chi jowi oc ebꞌ win, yu cꞌal tol chin bꞌeybꞌalne swatxꞌilal.

21 Jaach jin Diosal, cꞌam ojabꞌ chin ja bꞌejcanoj. Cꞌam ojabꞌ cha bꞌosel ja bꞌa jin cꞌatan.

22 Jaach Waawil, jin Colomal jaach, titan yin eymanil yet chin ja colon eloj.