2 Yutol yin eymanil oj yun slawi el ebꞌ, jaxca chi yun stajtoj an chꞌim, ma jaxca chi yun stajtoj xaj teꞌ teꞌ chi pujeloj.

3 Aoc Jehová yipoj ja cꞌul, catuꞌ cha wunen tzetyetal watxꞌ. Watxꞌ cꞌal oj yun ja bꞌeytoj sat txꞌotxꞌ txꞌotxꞌ tiꞌ, catuꞌ oj jaach low yin tzalacꞌulal.

4 Akꞌ tzalabꞌoj ja cꞌul yin Jehová, catuꞌ oj yakꞌon tzet chi yoche ja cꞌul tol qꞌueyubꞌtaj xacꞌal yili.

5 Akꞌ abꞌenal ja bꞌa yul skꞌabꞌ Jehová. Aoc Naj yipoj ja cꞌul, catuꞌ oj colwa Naj ja wetoj.

6 Oj yakꞌon txeclo a cu watxꞌil, jaxca yajan cꞌu yet chuman cꞌu.

7 Tzꞌin ojabꞌ cu chi sattaj Jehová. Miman ojabꞌ chi kute cu cꞌul kechbꞌanen scolwa ketoj. Cꞌam ojabꞌ chi somcha el cu cꞌul yu ebꞌ chi a can yin spenail.

8 Cu bꞌejwej can jowal, cꞌal chichoncꞌulal. Man ojabꞌ comonoj chi chichon cu cꞌul. Ta cꞌamaj, pena cꞌal tzet oj elol cu sattaj.

9 Caw yel oj qꞌueyle el ebꞌ chi unen spenail; jal pax ebꞌ chi yaoc Jehová yipoj scꞌul, oj yiꞌ smajul txꞌotxꞌ ebꞌ bꞌey sat txꞌotxꞌ txꞌotxꞌ tiꞌ.

10 Jaꞌ yet jayebꞌ cꞌu, cꞌamxa ebꞌ chi unen spenail tuꞌ. Caxcꞌal oj toj cu seyecꞌ ebꞌ, manxa oj ilcha ebꞌ ku.

11 Jaxa ebꞌ yeynajil ánima xin, oj caey cꞌal ecꞌ ebꞌ sat txꞌotxꞌ txꞌotxꞌ tiꞌ, catuꞌ oj yakꞌon snaꞌbꞌal ebꞌ scaey ecꞌ yin tzalacꞌulal.

12 Jaꞌ mactxequel chi unen spenail, chi naꞌnon scꞌul tzet chi yun yakꞌon spenail yin ebꞌ ánima watxꞌ sbꞌeybꞌal. Caw jow ebꞌ, caw chi natxꞌatxꞌi yee ebꞌ yu chichoncꞌulal.

13 Jaxa Jehová tucꞌal chi tzee yin ebꞌ, yutol yotaj xa tol tuxa oj jul syaꞌilal yibꞌan ebꞌ.

14 Jaꞌ ebꞌ penawom chi yiꞌeltej yespada ebꞌ, catuꞌ chi swaꞌnen ey sjulbꞌal ebꞌ, yet chi akꞌle eyqꞌuey ebꞌ yeynajil ánima yu ebꞌ, queytuꞌ chi yun scam ebꞌ watxꞌ sbꞌeybꞌal tuꞌ snaꞌon ebꞌ.

15 Jaꞌ yespada ebꞌ tuꞌ, jacꞌal oc chꞌen oj ecꞌ el yin spixan ebꞌ, jaꞌ sjulbꞌal ebꞌ oj kꞌacantoj.

16 Yel xacꞌal watxꞌ tol txenne stzetyetal ey tet ebꞌ ánima watxꞌ snaꞌbꞌal, yintaj pax tol miman sbꞌeomal ebꞌ ánima pena tzet chi el yuneni.

17 Yutol oj qꞌueyle el ebꞌ penawom tuꞌ yu Jehová, jal ebꞌ ánima watxꞌ snaꞌbꞌal xin, oj col-le el ebꞌ yu Naj.

18 Jaꞌ Dios chi teynen ebꞌ cꞌam spenail, jaꞌ smajul tzetyetal ebꞌ ey cꞌal ecꞌ yin tobꞌalkꞌinal.

19 Jaxa yet oj jul stiempoal yet caw ey wail, cꞌam bꞌey oj sqꞌuex stzetyetal ebꞌ. Ey cꞌal sloꞌbꞌe ebꞌ.

20 Jaꞌ ebꞌ chi unen spenail, oj lawoj ey ebꞌ jaxca chi yun stajtoj an xumac teꞌ ey xol-laj teꞌ. Jaꞌ ebꞌ chi jowi oc yin Jehová, oj qꞌueycan a ebꞌ jaxca chi yun sqꞌueya mucꞌ.

21 Jaꞌ ebꞌ chi unen spenail chi oc ebꞌ maan tet junojxa, cꞌamxa chi yakꞌ pax smaan tumin ebꞌ tuꞌ. Jal ebꞌ watxꞌ snaꞌbꞌal xin, caw ey scamcꞌulal ebꞌ, catuꞌ bꞌejan cꞌal yel tzetyetal yu ebꞌ.

22 Jaꞌ ebꞌ chi chaꞌon syaaxilal Jehová, jaꞌ ebꞌ oj caey can ecꞌ sat txꞌotxꞌ txꞌotxꞌ tiꞌ. Jal pax ebꞌ penawom xin, oj iꞌle ebꞌ yu Naj.

23 Jaꞌ Jehová chi iꞌon bꞌey ebꞌ ánima watxꞌ snaꞌbꞌal, catuꞌ chi teynele ebꞌ yu Naj.

24 Caxcꞌal chi telcꞌotoj ebꞌ, yin eymanil chi iꞌle a waan ebꞌ, yutol quetzbꞌil oc ebꞌ yu Jehová.

25 Jaꞌ yet jix jin titoc yin achꞌeal masantaꞌcꞌal tinaniꞌ, cꞌam bꞌey jix wil sbꞌejlecan ebꞌ ánima watxꞌ snaꞌbꞌal yu Jehová, yin tol chi yetne scꞌul, tam wal ey bꞌey jix wil yecꞌ yuninal ebꞌ watxꞌ snaꞌbꞌal tuꞌ skꞌanon low sbꞌa stiꞌlaj na.

26 Jaꞌ ebꞌ ánima watxꞌ snaꞌbꞌal chi okꞌ scꞌul ebꞌ yin yet animail. Ey cꞌal tzet chi yakꞌ ebꞌ yin maanil. Jaꞌ yuninal ebꞌ yul sna, chi txeclo eloj tol ey ton syaaxilal Jehová tet ebꞌ.

27 Yu tuꞌ xin, cu bꞌejwej can spenail, catuꞌ chi kochen swatxꞌilal, yet watxꞌ oj naatbꞌoj cu kꞌinal.

28 Yutol chi tzala Jehová yetoj sjichanil, cꞌam bꞌey chi bꞌejlecan ebꞌ jijem chi yute sbꞌa tet. Chi col-le el ebꞌ yu Naj. Jal yicꞌaal ebꞌ chi unen spenail xin, oj qꞌueyle can el ebꞌ.

29 Jaꞌ ebꞌ ánima watxꞌ snaꞌbꞌal, jaꞌ ebꞌ oj iꞌon can oc txꞌotxꞌ txꞌotxꞌ tiꞌ yin smajuloj, catuꞌ oj caey cꞌal ecꞌ ebꞌ.

30 Jaꞌ ebꞌ watxꞌ sbꞌeybꞌal, chi kꞌanabꞌ ebꞌ yin jelanil, catuꞌ watxꞌ cꞌal tzet chi yal ebꞌ.

31 Jaꞌ cuybꞌanile chi yakꞌ Dios, ey cꞌal oc yin snaꞌbꞌal ebꞌ, yuxan cꞌam bꞌey oj eyqꞌuey ebꞌ.

32 Jaꞌ ebꞌ ánima chi unen spenail, ey cꞌal oc sat yin ebꞌ ánima watxꞌ snaꞌbꞌal, yutol chi yoche scꞌul ebꞌ chi yakꞌ camoj.

33 Man cꞌaltaꞌ oj chaꞌle eyqꞌuey ebꞌ yul skꞌabꞌ ebꞌ, yutol eyoc Jehová yetoj ebꞌ. Ma bꞌejle oc yibꞌan ebꞌ yu Jehová yutol cꞌam spenail ebꞌ.

34 Aoc Jehová yin ja cꞌul, jijem cꞌal cha wute ja bꞌa tet, jaxa Naj oj jaach iꞌon a can. Oj yakꞌ txꞌotxꞌ txꞌotxꞌ tiꞌ ja majuloj. Ja sattaj wal oj qꞌueyle el ebꞌ chi unen spenail.

35 Jaꞌ ebꞌ chi unen spenail, jix wil yetnen yet animail ebꞌ, yelcꞌulal chi yakꞌ yip ebꞌ jaxca chi yun ẍꞌibꞌ junoj teꞌ teꞌ ecꞌal skꞌabꞌ.

36 Jaxa jix yunne jix qꞌueyel ebꞌ, cꞌamxa mactxequel. Jix jin seyecꞌ ebꞌ, ma xa ilcha oc ebꞌ wu.

37 Chi cam ja naꞌon yin ebꞌ watxꞌ snaꞌbꞌal tuꞌ, ebꞌ cꞌam spenail, yutol watxꞌ oj eloc ebꞌ, yutol jaꞌ swatxꞌilal chi yoche ebꞌ.

38 Jal ebꞌ penawom xin, oj qꞌueyle el ebꞌ. Catuꞌ oj qꞌueyle cꞌal pax el yicꞌaal ebꞌ yet bꞌakꞌin.

39 Jaꞌ Jehová chi colon el ebꞌ ánima watxꞌ snaꞌbꞌal, jaꞌ Naj chi colwa yetoj ebꞌ yet chi jul syaꞌilal yibꞌan ebꞌ.

40 Jaꞌ Jehová oj colon el ebꞌ, yet watxꞌ oj colcha el ebꞌ yul skꞌabꞌ ebꞌ penawom, yutol jaꞌ Naj eyoc yipoj scꞌul ebꞌ, catuꞌ eyoc Naj yeneloj ebꞌ.