2 Yutol chi yaloc sbꞌa ebꞌ watxꞌil, cꞌam chi yiltej sbꞌa ebꞌ yin spenail, tam wal chi sbꞌejcan yunen spenail ebꞌ.

3 Pena kꞌane cꞌal chi yal ebꞌ, catuꞌ naꞌom a kꞌane ebꞌ; jix elcan ebꞌ yin watxꞌ bꞌeybꞌale, jix sbꞌejcan swatxꞌilal ebꞌ.

4 Jaꞌ yet telan ey ebꞌ sat xꞌat chi naꞌnon scꞌul ebꞌ yunen spenail, man watxꞌoj bꞌeybꞌale bꞌey eyoc ebꞌ, cꞌam chi yal scꞌul ebꞌ chi yiꞌel sbꞌa xol spenail.

5 Jaach Jehová jin Diosal, jata cꞌal xol asun bꞌey satcan chi apni ja camcꞌulal, chi cꞌal yun tzet cha walaꞌ.

6 Jaꞌ ja watxꞌilal ecꞌbꞌan yintaj txꞌotxꞌ mimej wonanlaj. Jaꞌ ja jichanil ecꞌbꞌan yeoc jaxca jaꞌ miman mar caw naat yich. Caw teynebꞌil masanil ebꞌ ánima ja wu yetoj cꞌal noꞌ noꞌ.

7 Jaach jin Diosal, qꞌueyubꞌtaj xacꞌal yoc ja camcꞌulal. Yuxan jaꞌ ja win chin col jin bꞌa, jaxca chi yun yoctoj noꞌ yuneꞌ caẍlan yalan xicꞌ xutx.

8 Chi noel cu cꞌul yu miman loꞌbꞌe cha wakꞌ ey jon. Chi kuqꞌuen jaꞌ bꞌey jaꞌ miman jaꞌ yet ja watxꞌcꞌulal.

9 Yutol jaꞌ ja win ey snukꞌ jaꞌ yet kꞌinale; jaxa yet oj cu apnoj oc ja cꞌatan oj kilon yu ja sajkꞌinal.

10 Ey ojabꞌ ecꞌ ja camcꞌulal yetoj ja watxꞌilal ey jon. Col jon cꞌal el jaon watxꞌ xa cu naꞌbꞌal tiꞌ.

11 Cꞌam ojabꞌ cha chaꞌ jul ebꞌ chi jowi oc win jin cꞌatan; cꞌam ojabꞌ chin yujte ecꞌ ebꞌ penawom.

12 Jex wet conobꞌ, ilwej ton abꞌ tzet jix yun yeyqꞌuey ebꞌ penawom. Jix eyqꞌuey ebꞌ, cꞌamxa bꞌakꞌin chi a waan ebꞌ.