2 Iꞌa ja mitxꞌkꞌabꞌ yet jowal, catuꞌ chin ja coloni.

3 Iꞌa chꞌen ja lanza yetoj chꞌen ja julbꞌal, catuꞌ chach oc sattaj ebꞌ chin ujten ecꞌoj. Yutol jin Colomal jaach.

4 Jaꞌ ebꞌ chi ochen chin makꞌon camoj, somcha ojabꞌ a snaꞌbꞌal ebꞌ yin qꞌuixwilal, jaxa ebꞌ chi yoche ey tzet chin yute; meltzo ojabꞌ ebꞌ yin xiwcꞌulal.

5 Ujtele ojabꞌ ebꞌ yu ja wángel, jaxca chi yun yijletoj skꞌail ixim tiriw yu kaꞌeꞌ.

6 Kꞌej jolinaj ojabꞌ yili yul sbꞌe ebꞌ, jaꞌ ojabꞌ ja wángel chi ujtentoj ebꞌ.

7 Caxcꞌal cꞌam jin penail, caw jix yaey yaal ebꞌ jin sattaj; cꞌam tzet chi wute ebꞌ, jix swaꞌne jun jolan ebꞌ yet watxꞌ chin eyqꞌuey snaꞌon ebꞌ.

8 Michꞌcha ojabꞌ ebꞌ yu mimej syaꞌilal. Man ojabꞌ naꞌanoj yu ebꞌ, catuꞌ chi eyqꞌuey ebꞌ yul yaal jix swaꞌne ey ebꞌ tuꞌ; kꞌa ojabꞌtoj ebꞌ yet chi eyqꞌuey ebꞌ yul jolan jix swaꞌne tuꞌ.

9 Ta jaxca tuꞌ, oj wakꞌ tzalabꞌoj jin cꞌul ja win; yutol oj wil ja colwal.

10 Oj walon yin masanil jin cꞌul jaxca tiꞌ: ¿Macto wal txequel laan ja wetoj jaach Jehová jin Diosal? Jaꞌ ebꞌ mebꞌa cꞌal ebꞌ cꞌam tzet ey tet, cha colcan el ebꞌ yul skꞌabꞌ ebꞌ ey yip, cꞌal ebꞌ chi iꞌon ecꞌ stzettaj yetal ebꞌ.

11 Chi tit ebꞌ lekꞌtiꞌ testigo win. Jaꞌ tzetyetal man wotaj oj chi skꞌanle ebꞌ ey jin.

12 Jaꞌ jin watxꞌcꞌulal jix spajtze ebꞌ yin cuscꞌulal ey jin, catuꞌ jix xꞌemon cus jin cꞌul ebꞌ.

13 Jal jin jain tiꞌ, jaꞌ yet yaꞌey ebꞌ, jaꞌ an pichile yet cuscꞌulal chi waocoj, chi wijle nocha jin bꞌa yu jin txꞌoxon eloj tol yel chin cus yu ebꞌ, yaꞌ chi yabꞌ jin pixan; cꞌam chin bꞌej jin txali yu ebꞌ.

14 Cusiltaj jin cꞌul yet chin ecꞌabꞌi, jaxca wal tol jin watxꞌil ánima ebꞌ, ma jaxca junoj wuẍtaj, ma jin txutx, queytuꞌ chi yun jin cus yu ebꞌ.

15 Jaxa yet jix jin eyqꞌueyi, jix a bꞌulna masanil ebꞌ jin stzeeni. Jaxca tol txꞌoj animail jin yul sat ebꞌ, jaxca tol man otajbꞌiloj jin yu ebꞌ, cꞌam chi sbꞌej sbꞌuchwa ebꞌ win.

16 Caw yaꞌtaj weoc yu ebꞌ, jix jin sbꞌuchon el ebꞌ, chi tit tꞌanan ebꞌ win yetoj chichoncꞌulal.

17 Jaach Jehová jin Diosal, ¿tumi tucꞌal oj jaach oc cꞌal tꞌanan yin jun tiꞌ? Col jin el yul skꞌabꞌ ebꞌ chi el yaw stit win jaxca junoj noꞌ bꞌalam.

18 Oj walel skꞌaneal ja watxꞌcꞌulal sattaj ecꞌaloj ánima yaman ocoj. Sattaj ebꞌ conobꞌ oj wal watxꞌ kꞌane ey jaach.

19 Cꞌam ojabꞌ cha wakꞌ tzalabꞌoj scꞌul ebꞌ chi jowi oc win; cꞌam ojabꞌ chin stzꞌeyan ilnetej ebꞌ chi chichon oc scꞌul win, yutol cꞌam jin penail tet ebꞌ.

20 Cꞌam chi yoche watxꞌcꞌulal ebꞌ. Jaꞌ tiꞌ yet ebꞌ, tol chi nanon scꞌul ebꞌ yakꞌon lekꞌtiꞌal, chi seyon ebꞌ tzet chi yun ya jowal xol ebꞌ ánima tol cꞌam jowal chi yun bꞌey sconobꞌ.

21 Caw ip chi yun yaon el yaw ebꞌ win, chi yalon ebꞌ jaxca tiꞌ: Tuxa jix kilaꞌ, tuxa jix kilaꞌ, ẍi ebꞌ.

22 Jaach jin Diosal, akꞌ sowalil wan tuꞌ tet ebꞌ. Cꞌam ojabꞌ chach el jin cꞌatan.

23 Aan waan jaach jin Diosal. Col jin eloj, waꞌne yeoc jun jin kꞌane tiꞌ, ocan cꞌal wetoj.

24 Jaach jin Diosal, pajtze tzet chi walaꞌ jatacꞌalaꞌ ja watxꞌcꞌulal, chi woche tol cꞌam chin tzeele yu ebꞌ.

25 Cꞌam ojabꞌ chi yal ebꞌ win jaxca tiꞌ: Junelne jix ketne cantoj, man ojabꞌ ẍi oj ebꞌ win.

26 Eyqꞌuey ojabꞌ ebꞌ, somcha ojabꞌ el snaꞌbꞌal ebꞌ, tit ojabꞌ syaꞌtajilal yibꞌan ebꞌ. Qꞌuixwoj ojabꞌ a ebꞌ chi smimanbꞌane sbꞌa jin sattaj.

27 Jal pax ebꞌ chi yoche chi yilaꞌ tol watxꞌ chin elocoj, tzala ojabꞌ ebꞌ. El ojabꞌ yaw ebꞌ yu tzalacꞌulal, yal ojabꞌ ebꞌ yin junjun txolan jaxca tiꞌ: Jaꞌ Jehová miman ton yeocoj; ey scamcꞌulal Naj yin ebꞌ ẍejabꞌ, ẍi ojabꞌ ebꞌ.

28 Oj walel ja watxꞌilal, oj walon jin watxꞌ kꞌane ey jaach junjun cꞌu.