Alo Watxꞌ Kꞌane Yu Swatxꞌcꞌulal Dios
Jaꞌ jun bꞌit tiꞌ jix stzꞌibꞌe naj David yet jix yuten sbꞌa yin locoal sattaj naj rey Abimélec, yet jix ujtele eltej naj yu.
34
Oj wiꞌa can sbꞌi Jehová,oj walon jin watxꞌ kꞌane tet.
2 Asan yin Jehová chi wiꞌ jin tzalacꞌulal. Abꞌwej jex yeynajil ánima, akꞌwej tzalabꞌoj je cꞌul yin Jehová wetoj an.
3 Kalwej el skꞌaneal smimanbꞌilal Jehová, catuꞌ junne chi yun kiꞌon a can sbꞌi Naj.
4 Jaꞌ yet chin txali tet Jehová, chi takꞌwi ey jin; chi yiꞌon el masanil xiwcꞌulal win an.
5 Jaꞌ mactxequel chi yaoc Jehová yipoj scꞌul, caw watxꞌ xacꞌal yili sat ebꞌ yu tzalacꞌulal, cꞌam cꞌal bꞌey oj el sqꞌuixwil ebꞌ.
6 Jix wal jin bꞌa tet Jehová, caxcꞌal cꞌam niꞌoj weloc apnoj, jaxa Naj jix abꞌen jin txa, catuꞌ jix jin scolon el xol masanil jin bꞌiscꞌulal.
7 Jaꞌ ebꞌ ey yeloc apnoj Jehová yul sat, jaꞌ ebꞌ yángel Naj joyan oc yinlaj ebꞌ, catuꞌ chi col-le el ebꞌ yu.
8 ¡Akꞌlewej ton abꞌi, catuꞌ oj je yiloni tol ey scamcꞌulal Jehová! ¡Yutol tzalacꞌulal yet ebꞌ chi yaoc yin scꞌul!
9 Ey ojabꞌ yeloc apnoj Jehová yul cu sat mac jon tol sconobꞌ jon xa tiꞌ; yutol tzꞌajan cꞌal ey tet ebꞌ ey yeloc apnoj Dios yul sat.
10 Jaꞌ noꞌ bꞌalam chi pax yip noꞌ yu wail, jal pax ebꞌ chi yiꞌey sbꞌa tet Jehová xin, cꞌam cꞌaltaꞌ bꞌakꞌin oj pax yip ebꞌ, yutol tzꞌajan ey tet ebꞌ.
11 Jex unin, titanwej, abꞌwej tzet chi walaꞌ, oj jex jin cuy yin je yaon oc je naꞌbꞌal yin Jehová.
12 Ta chi yal je cꞌul chi naatbꞌi je kꞌinal, catuꞌ tzalacꞌulal cꞌal chi ecꞌ junjun cꞌu je yu,
13 cꞌam ojabꞌxa che yal pena kꞌane, cꞌam ojabꞌ che yakꞌ lekꞌtiꞌal.
14 Bꞌoswej el je bꞌa xol spenail, jaꞌ ojabꞌ swatxꞌilal che waꞌne, cꞌam ojabꞌxa jowal che yunne, jaꞌ ojabꞌ swatxꞌilal che bꞌeybꞌalne.
15 Jaꞌ Jehová chi teynen ebꞌ ánima watxꞌ sbꞌeybꞌal, catuꞌ chi yaon oc xiquin yet chi yalon sbꞌa ebꞌ tet.
16 Jal pax ebꞌ chi unen spenail xin, jaꞌ sjowal scꞌul Jehová eytej yibꞌan ebꞌ yu sqꞌueyle can el ebꞌ, yet watxꞌ cꞌamxa mac oj naꞌontej ebꞌ.
17 Chi yabꞌ Jehová yet chi yalon sbꞌa ebꞌ ánima watxꞌ snaꞌbꞌal, catuꞌ chi col-le el ebꞌ xol masanil bꞌiscꞌulal.
18 Jaꞌ Jehová eyecꞌ scꞌatan ebꞌ ánima eyoc xol bꞌiscꞌulal, catuꞌ chi scolon can el ebꞌ chi somcha el scꞌul yu cuscꞌulal.
19 Jaꞌ ebꞌ ánima watxꞌ snaꞌbꞌal, caxcꞌal ecꞌal tzet chi jul yibꞌan ebꞌ, jaꞌ Jehová chi colon el ebꞌ xol masanil wan syaꞌilal tuꞌ.
20 Jaꞌ Naj chi teynen ebꞌ, cꞌam junoj sbꞌajil ebꞌ chi kꞌatoj.
21 Jal pax ebꞌ penawom xin, jaꞌ spenail ebꞌ tuꞌ chi akꞌon camoj: Jaꞌ ebꞌ chi chichon oc scꞌul yin ebꞌ watxꞌ sbꞌeybꞌal, oj ale oc syaꞌilal yibꞌan ebꞌ.
22 Jaꞌ Jehová chi colon el spixan ebꞌ ẍejabꞌ; man oj ale oc syaꞌilal ebꞌ chi yaoc scꞌul yin Dios.