2 Alwej watxꞌ kꞌane tet Jehová yetoj arpa. Bꞌitnanwej tet yetoj mitxꞌkꞌabꞌe laonebꞌ xꞌanil.

3 Bꞌitnanwej tet yetoj acꞌ bꞌit. Watxꞌ che yute je tenon wan mitxꞌkꞌabꞌe tet yin tzalacꞌulal.

4 Yutol jaꞌ skꞌane Jehová yel ton chi yalaꞌ; jaꞌ tzet jix swaꞌne, jaꞌ chi txꞌoxon eloj tol chi yun cꞌal tzet chi yalaꞌ.

5 Jaꞌ Jehová chi yoche sjichanil cꞌal watxꞌ bꞌeybꞌale. Chi xꞌoxel sbꞌa scamcꞌulal bꞌey masanil yul yibꞌankꞌinal tiꞌ.

6 Asan cꞌal yet jix yalon Jehová, queytuꞌ jix yun swaꞌxi satcan yetoj cꞌal masanil tzet ey bꞌey.

7 Jaꞌ Naj jix poꞌon ecꞌ jaꞌ jaꞌ, jix yambꞌale can oc jaꞌ mar yu.

8 Ey ojabꞌ yeloc apnoj Jehová yul sat masanil tzetyetal ey sat txꞌotxꞌ txꞌotxꞌ tiꞌ. Je masanil jex caan bꞌey yul yibꞌankꞌinal tiꞌ, ey ojabꞌ je xiwcꞌulal tet Naj.

9 Yutol jaꞌ Naj jix aloni yuxan jix waꞌxi masanil tzetyetal. Jaꞌ Naj jix aloni, yuxan jix txeclo jantaj tzetyetal.

10 Jaꞌ Jehová chi akꞌon lawoj ey tzet chi snaꞌ ebꞌ mimej conobꞌ, yet watxꞌ cꞌam chi yiꞌ sbꞌa tzet chi yoche ebꞌ chi yunne.

11 Jaxa tzet chi snaꞌ Jehová, ey cꞌal ecꞌ yin tobꞌalkꞌinal.

12 Tzalacꞌulal yet ebꞌ conobꞌ tol jaꞌ Jehová eyoc sDiosaloj, tol jaꞌ chi sicꞌon eloj yu yakꞌon Yaawil yibꞌan.

13 Jaꞌ bꞌey satcan tꞌanan eytej Jehová, catuꞌ chi yilon eytej masanil tzet chi yun ebꞌ ánima.

14 Jaꞌ bꞌey satcan tuꞌ caan ecꞌ Dios, tꞌanan pax eytej yin masanil ánima caan sat txꞌotxꞌ txꞌotxꞌ tiꞌ.

15 Jaꞌ Naj jix waꞌnen spixan ebꞌ ánima. Chi smajon cꞌal pax yilaꞌ tzet chi el yunen ebꞌ.

16 Cꞌam junoj rey chi colcha el yu ecꞌaloj sbꞌisil soldado, tam wal chi colcha el ebꞌ akꞌom jowal, caxcꞌal caw ey yip ebꞌ.

17 Jaꞌ noꞌ che, cꞌam yopiso noꞌ yin scolon el ebꞌ ánima; caxcꞌal caw ey yip noꞌ, cꞌam chi skeꞌ scolwa noꞌ kin.

18 Jal pax Jehová xin, teynebꞌil ebꞌ ánima yu ta ey yeloc apnoj Naj yul sat ebꞌ, jaꞌton ebꞌ chi camcꞌulnen Jehová, catuꞌ eyoc yipoj scꞌul ebꞌ.

19 Chi col-le el ebꞌ yul skꞌabꞌ camich yu, catuꞌ chi akꞌle sloꞌbꞌe ebꞌ yu Naj yet ey wail.

20 Jaon tiꞌ jaꞌ Jehová eyoc yipoj cu cꞌul. Jaꞌ Naj chi cu coloni, catuꞌ chi cu steyneni.

21 Yu tuꞌ xin, kakꞌwej tzalabꞌoj cu cꞌul yin Naj. Chi kaon oc Naj yipoj cu cꞌul, yutol asanxane ocoj.

22 Jaach jin Diosal, ey ojabꞌ cꞌal ja camcꞌulal kin, yutol chach kaoc yipoj cu cꞌul.