2 Tzalacꞌulal yet mactxequel cꞌam chi oc spenail tuꞌ smuloj sattaj Jehová, catuꞌ cꞌamxa etne ánima chi yunne.

3 Jaꞌ yet cꞌamto chi walatej jin penail, yelcꞌulal jix lawi ey jin mimanil jix wabꞌe, yutol caw chi el waw yu syaꞌil.

4 Yet cꞌualil cꞌal akꞌbꞌalil yelcꞌulal jix ja waoc tzꞌuum win; jaxca wal an tajin cꞌultaj chi tajel yu waresma, queytuꞌ wili chi wabꞌe.

5 Catuꞌ jix walon atej jin penail ey jaach, cꞌamxa tzet jix webꞌa el ey jaach. Pilan jix walatej; jix ja wakꞌon mimancꞌulal wibꞌan.

6 Yuxan jaꞌ tinaniꞌ, yal ojabꞌ sbꞌa ebꞌ jijem ey jaach, yajbꞌan chi to skeꞌ; caxcꞌal chi jul syaꞌilal ebꞌ jaxca jaꞌ elom jaꞌ, man oj apnoj oc yin ebꞌ.

7 Jaach ey jaach oc weneloj, jaach oj jin ja colcan el yul skꞌabꞌ syaꞌilal. Oj jin bꞌitnoj ey jaach yutol jix jin ja coleloj.

8 Jix yal Jehová ey jin jaxca tiꞌ: Oj jaach jin cuy yin tzet oj ja wunne; oj jin txꞌox ey jaach bꞌey oj jaach toj, catuꞌ oj jaach jin teyne.

9 Cꞌam ojabꞌ cha wute ja bꞌa jaxca noꞌ che, ma jaxca noꞌ caballo; jaꞌ jun tujan noꞌ tuꞌ, cꞌam chi naꞌcha el yu; sowalil tol chi quetzle bꞌey noꞌ yetoj chꞌen freno cꞌal yetoj xꞌanil stiꞌ noꞌ, jaꞌ chi mitxꞌon oc tucan noꞌ; ta man jaxca oj tuꞌ chi utele noꞌ, man skeꞌ stoo noꞌ bꞌey chi iꞌle bꞌeyoj, ẍi Jehová ey jin.

10 Jaꞌ ebꞌ penawom, caw ecꞌal tujan syaꞌilal ebꞌ oj juloj; jal ebꞌ eyoc Dios yipoj scꞌul xin, caw teynebꞌil ebꞌ yu scamcꞌulal Dios.

11 Jex ánima tol watxꞌ je naꞌbꞌal, akꞌwej tzalabꞌoj je cꞌul yin Jehová. Bꞌitnanwej yin tzalacꞌulal, je masanil jex ey jex oc yin sjichanil.