2 Chaꞌ ja wabꞌ tzet chi walaꞌ, catuꞌ chin ja colon el yin eymanil. Ocan jin nachꞌenoj bꞌey chin col jin bꞌa.

3 Yutol jin nachꞌen jaach, jin cuartel jaach yuxan ocan weneloj, catuꞌ chin ja wiꞌon bꞌey yin watxꞌ bꞌeybꞌale yetoj ja mimanbꞌilal.

4 Col jin el tet jun yaal jix ale ey jin sattaj, yutol jin Colomal jaach.

5 Jaꞌ jin pixan cꞌal jin naꞌbꞌal chi wakꞌ abꞌenal yul ja kꞌabꞌ. Col jin cꞌal eloj, yutol chi cꞌal yun tzet cha walaꞌ.

6 Caw chi tit jin jowal yin ebꞌ ánima chi oc yin eyilal tet echele cꞌam yeloc apnoj; jal jin jain tiꞌ, chach waoc yipoj jin cꞌul, yutol jin Diosal jaach.

7 Chin tzala yu ja watxꞌcꞌulal. Jaach jix ja wiꞌel jin cuscꞌulal, ja wotaj jin yaꞌilal.

8 Ma jin ja waoc yul skꞌabꞌ ebꞌ jin cajat. Caw watxꞌ bꞌey jix jin ja linbꞌa can eyoj.

9 Jaach jin Diosal, okꞌ ojabꞌ ja cꞌul win, yutol ey jin oc yin bꞌiscꞌulal. Chi cꞌuumbꞌi jin sat yu okꞌilal, cꞌamxa yip jin pixan cꞌal jin mimanil.

10 Jaꞌ jin kꞌinal chi lawi ey yu syaꞌilal; lalan xacꞌal wichambꞌi el yu yel waw. Jaꞌ cuscꞌulal chi iꞌon el wip; lalan xacꞌal yel yip jin mimanil.

11 Chin tzeele yu ebꞌ jin cajat, chin bꞌuchle xacꞌal yu ebꞌ caan jin cꞌatan. Yaabꞌetaj jin yu ebꞌ otajnen jin. Jaꞌ ebꞌ chin ilon yul-laj bꞌe tol chi el ebꞌ ey jin.

12 Junelne jix jin toocan qꞌueycꞌulal yu ebꞌ, jaxca tol manxa ánima oj jin chi wabꞌe; jaxca xacꞌal junoj txꞌotxꞌ ẍalu poꞌonajtoj, queytuꞌ wili chi wabꞌe.

13 Chi wabꞌ sason ebꞌ wet conobꞌ win; ey xacꞌal xiwcꞌulal bꞌey chin eqꞌui. Jun laan snaꞌon ebꞌ win, chi snaꞌ ebꞌ tzet chi yun jin yakꞌon camoj.

14 Jal jin jain tiꞌ jaach jin Diosal, asan jaach ey jaach oc yipoj jin cꞌul. Tuxa jix wal jaxca tiꞌ: ¡Jaach tiꞌ jin Diosal jaach!

15 Yul ja kꞌabꞌ ey jin kꞌinal. Col jin el tet ebꞌ chi jowi oc win, yutol tzajan cꞌal ebꞌ wintaj.

16 Ocan tꞌanan win jain ja chejabꞌ jin tiꞌ yu swatxꞌil ja cꞌul, catuꞌ chin ja colon el yu ja camcꞌulal.

17 Jaach jin Diosal, lalan walon jin bꞌa ey jaach. Cꞌam ojabꞌ chin ja chaꞌ eyqꞌueyoj, cꞌam ojabꞌ chi el jin qꞌuixwil. Akꞌ eyqꞌuey ebꞌ penawom yet chi el sqꞌuixwil ebꞌ; a cantoj ebꞌ bꞌey tzꞌinini bꞌey mujan ebꞌ camom.

18 Tzꞌin ojabꞌ xacꞌal ẍi ebꞌ naꞌom a kꞌane, yutol chi yal pena kꞌane ebꞌ yin ánima watxꞌ sbꞌeybꞌal; caw chi txꞌemwa ebꞌ win.

19 ¡Yel cꞌal tol miman ja watxꞌcꞌulal tet ebꞌ chi iꞌon a can ja bꞌi. Sattaj wal ebꞌ conobꞌ cha wakꞌon spajtzebꞌal tet ebꞌ! Cha waon ey ja watxꞌcꞌulal xol ebꞌ chach yaoc yipoj scꞌul.

20 Yetoj ja colwal cha colon can el ebꞌ yul skꞌabꞌ ebꞌ pena snaꞌbꞌal; cha cꞌubꞌa el ebꞌ tet pena kꞌane chi yal ebꞌ cꞌam swatxꞌil snaꞌbꞌal.

21 Al-le ojabꞌ watxꞌ kꞌane tet Jehová, yutol qꞌueyubꞌtaj xacꞌal tzet jix yun win yu scamcꞌulal, yet joyan oc ebꞌ chi jowi oc win.

22 Jaꞌ yet ey jin oc xol jin yaꞌilal, jix jin naꞌ tol jix jin ja bꞌejcanoj, jaxa wal yet jix jin kꞌanon ja colwal, jix ja wabꞌ yet jix walon jin bꞌa ey jaach.

23 Camcꞌulnewej Jehová je masanil jex tol sconobꞌ jex xa, yutol jaꞌ Naj chi teynen ebꞌ jijem; catuꞌ tzꞌajan chi yun yaon oc syaꞌilal yibꞌan ebꞌ chi smimanbꞌane sbꞌa, cꞌal tet ebꞌ chi ecꞌ yibꞌan.

24 Iptzewej je bꞌa mac jex che yaoc Jehová yipoj je cꞌul.