2 Jaach jin Diosal, jix jin kꞌan ja colwal, catuꞌ jix ja wakꞌon waꞌxoj jin cꞌul xol jin yaꞌilal.

3 Jaach jix jin ja colel yul skꞌabꞌ camich. Jix ja wakꞌ jin cawil, ma jin ja chaꞌtoj xol ebꞌ camnaj.

4 Jex sconobꞌ jex xa Jehová, bꞌitnewej sbꞌi Naj, yutol Asanxane Ocoj.

5 Yutol junne txolan ey sjowal scꞌul; jaxa swatxꞌcꞌulal, ey cꞌal ecꞌ yin tobꞌalkꞌinal. Caxcꞌal chi cu okꞌ yet akꞌbꞌalil, jaxa yet chi kꞌinibꞌi, chi jul cu tzalacꞌulal.

6 Jaꞌ yet watxꞌ xacꞌal ey jin chi wabꞌe, jix jin naꞌ jaxca tiꞌ: Cꞌam bꞌakꞌin chin eyqꞌuey yu junoj tzetyetal, jin chi.

7 Jaach Jehová jin Diosal, yu swatxꞌil ja cꞌul yuxan jix jin ja waoc bꞌey cꞌam tzet chin ioni. Jaxa pax yet jix ja wiꞌel ja bꞌa jin cꞌatan, jix somcha can el jin cꞌul.

8 Jaach jin Diosal, chi el waw ey jaach, yu jin kꞌanon ja colwal:

9 ¿Tzet to wal cha wiꞌ yin, kꞌinaloj ta tol chin cami catuꞌ chin mujle eytoj? Tumi oj to skeꞌ jaach sbꞌitnen ebꞌ xax oc yin pojojal. Ma xacꞌal pax skeꞌ yalon watxꞌ kꞌane ebꞌ ey jaach yu jantaj tzet jix ja waꞌne.

10 Jaach jin Diosal, abꞌ tzet chi walaꞌ, okꞌ ojabꞌ ja cꞌul win, ocan cꞌal wetoj.

11 Jix ja wakꞌ qꞌuexchatoj jin yaꞌilal yin tzalacꞌulal. Jix ja wiꞌel jin cuscꞌulal, jix ja waon can oc an pichile yet kꞌin jin pichiloj.

12 Yu tuꞌ xin, jaach jin Diosal, cꞌam bꞌakꞌin oj oc tucan walon watxꞌ kꞌane ey jaach yu tzalacꞌulal. Oj jin bꞌitnoj ey jaach yu walon jin watxꞌ kꞌane, cꞌal yu walon yu diosalil ey jaach.