2 Jaach jin Diosal, chi yoche jin cꞌul cha wabꞌ jin txa yet chi walon jin bꞌa ey jaach; chin kꞌan ja colwal yet chi wiꞌon a jin kꞌabꞌ jin txali bꞌey snail ja kꞌane.

3 Cꞌam ojabꞌ cha waoc syaꞌilal win yetoj ebꞌ penawom, caxcꞌal mi watxꞌ chi yute kꞌanabꞌ sbꞌa ebꞌ, jal yin snaꞌbꞌal ebꞌ, asanne spenail chi snaꞌ ebꞌ.

4 Akꞌ spaj tet ebꞌ, jatacꞌalaꞌ tzet chi el sbꞌeybꞌalne junjun ebꞌ; queyton wal tuꞌ chi yun ja waon oc syaꞌilal ebꞌ.

5 Masanil tzet waꞌnebꞌil ja wu, cꞌam niꞌoj yeloc apnoj yul sat ebꞌ penawom. Jaꞌ ebꞌ tuꞌ smoo cha qꞌueycan eloj, yet watxꞌ cꞌamxa bꞌakꞌin chi bꞌinale ecꞌ ebꞌ.

6 Al-le ojabꞌ watxꞌ kꞌane tet Jehová, yutol jix yabꞌ tzet jix wal yin jin txa.

7 Jaꞌ Jehová, wipomal, jaꞌ yin chin col jin bꞌa jaxca junoj chꞌen nachꞌen chi oc weneloj. Jaꞌ Jehová chi waoc yipoj jin cꞌul, chi oc cꞌal wetoj; yuxan caw chi tzala jin cꞌul. Oj jin bꞌitnoj tet. Oj walon yu diosalil tet.

8 Jaꞌ Jehová chi colwa yetoj ebꞌ sconobꞌ; jaꞌ eyoc yipomaloj ebꞌ, catuꞌ chi colwa cꞌal pax wetoj jain sreyal ebꞌ tol sicꞌbꞌil jin el yu.

9 Jaach Jehová jin Diosal, colcan el ebꞌ ja conobꞌ tiꞌ; akꞌ ja watxꞌcꞌulal yibꞌan ebꞌ yutol ja wet cꞌaltaꞌ ebꞌ; teyne cꞌal ebꞌ yin tobꞌalkꞌinal.