2 Jaꞌ ebꞌ penawom chi syambꞌa sbꞌa ebꞌ win yet chin sqꞌueyon el ebꞌ yaloni, jacꞌal oc ebꞌ oj smitxꞌle oc sbꞌa catuꞌ oj eyqꞌuey ebꞌ.

3 Caxcꞌal ey junoj bꞌulan soldado chi sjoymone oc sbꞌa win, cꞌam cꞌaltaꞌ chin xiwi. Caxcꞌal chi jul ebꞌ yakꞌ jowal win, jacꞌalaꞌ waon oc Dios yipoj jin cꞌul.

4 Ey jun tzetyetal jix jin kꞌan tet Jehová, jaꞌton jun tuꞌ caw chi woche: Tol ey jin cꞌal ecꞌ bꞌey snail scalubꞌal Dios yajbꞌan iquis jin ecꞌoj, yet chin oc eyilal tet Dios bꞌey yul snail skꞌane, catuꞌ oj wilon oc yin swatxꞌilal yili.

5 Jaꞌ yet oj jul syaꞌilal wibꞌan, jaꞌ Naj oj jin cꞌubꞌan eloj. Oj jin scꞌubꞌa a bꞌey stemplo. Oj jin yaon atoj Naj sjolom junoj chꞌen miman chꞌen yet chin colcha eloj.

6 Queyton wal tuꞌ oj yun jin colcha el yul skꞌabꞌ ebꞌ chi jowi oc win. Yetoj aw yet tzalacꞌulal oj wakꞌon jin xaambꞌal tet Jehová yul stemplo. Oj walon jin watxꞌ kꞌane yin bꞌitalil tet Naj.

7 Jaach jin Diosal, chi a waw ey jaach an, abꞌ tzet chi walaꞌ. Okꞌ ojabꞌ ja cꞌul win, takꞌwan ey jin.

8 Jaach Jehová jin Diosal, jix ja wal ey jin jaxca tiꞌ: Jitztej ja bꞌa jin cꞌatan. Yuxan chi woche chin jitztoj jin bꞌa ja cꞌatan.

9 Cꞌam ojabꞌ cha cꞌubꞌa el ja bꞌa ey jin. Cꞌam ojabꞌ chin ja chej meltzo yetoj sjowal ja cꞌul. Col jin cꞌal eloj, cꞌam ojabꞌ chin ja bꞌejcan jin txꞌojli, yutol jin Diosal jaach, jin Colomal jaach.

10 Jaach Jehová jin Diosal, caxcꞌal mi chin bꞌejlecan yu jin mam cꞌal yu jin txutx, jal jaach cꞌam cꞌaltaꞌ bꞌey oj jin ja bꞌejcan jin txꞌojli.

11 Txꞌox ja bꞌeybꞌal ey jin; ijbꞌa jintoj yul bꞌe tol jichan, caxcꞌal mi chi yoche ebꞌ jin cajat chin eyqꞌueyi.

12 Cꞌam ojabꞌ chin ja waoc yul skꞌabꞌ ebꞌ chi jowi oc win. Chi yal xijbꞌal kꞌane ebꞌ win; chi yoche ebꞌ chin yakꞌ camoj.

13 Xax mi somcha el jin naꞌbꞌal ta man eyoj jaach oc yipoj jin cꞌul yet iquis jin to ecꞌoj.

14 ¡Jex wet animail, awej oc Jehová yipoj je cꞌul! ¡Yelcꞌulal che yaoc je naꞌbꞌal yin, cꞌam ojabꞌ che yakꞌ caabꞌcꞌulal! ¡Awej cꞌal oc Naj yipoj je cꞌul!